Blade Runner

De Uiquipedia
Saltar a: navegación, buscar

Blade Runner ye una película de ciencia ficción norteamericana, dirixida por Ridley Scott, estrenada en 1982 ya inspirada na novela de Philip K. Dick ¿Suañen los androides con oveyes lléutriques?, escrita en 1968. Anguaño esta película considérase como una de les más importantes de la historia del cine fantásticu.

La película describe un futuru nel que los nomaos "replicantes", seres artificiales fechos gracies a la inxenería xenética, faen les xeres más peligroses y llacerioses nes colonies esteriores de la Tierra. Dellos d'esos "replicantes", los más perfeutos como yeren los Nexus-6 (asemeyaos físicamente a los humanos, con más axilidá y fuercia y con delles rempuestes emocionales) col tiempu declararánse illegales en Planeta Tierra depués d'una revuelta sangrienta. Una estaya especial de la policía "los blade runner" sedrán los encargaos de rastrexar y matar a esos replicantes fuxitivos que tornaren a la Tierra. L'axente Deckard, afincáu en Los Ánxeles sedrá'l que s'enfrente con un garrapiellu d'ellos especialmente hábiles, arteros y violentos.

Argumentu[editar | editar la fonte]

Nel añu 2019 la humanidá ya ye quién a facer robós físicamente idénticos a les persones pero con una fuercia sobrehumana y ensin degúna forma de sentimientos. Per otru llau, las so gran asemeyanza colos humanos fai que los replicantes tres pasar cuatro años desendolquen dalgunes sensaciones averaes a sentimientos. Esta realidá xenera un problema nos sos creadores porque l'oxetivu final yera'l d'usalos como esclavos nos trabayos más difíciles y peligrosos nes colonies estelares. Asina pos, que surdan sentimientos ente ellos podría otra vegada llevalos a una revuelta.

La historia entama cuando seis replicantes Nexus-6 se rebelen porque quieren vivir en llibertá y que naide llinde la so edá imponiendo-yos una fecha de caducidá.

Tres una rebelión anterior d'unos antiguos robós se decide que los replicantes nun puedan tar enxamás na Tierra. Ye entós cuando se formen los "blade runners" que tienen como xera la de "retirar" a los replicantes indisciplinaos. Sedrá Deckard, el personax principal, l'encargáu d'eliminar a esos Nexus-6. A lo llargo la película esti policía dirá camudando la idega que tien sobro los replicantes, too ello influenciáu pol amor que siente por Rachel, una d'eses replicantes.

Temes[editar | editar la fonte]

Magar que tien les traces d'una película d'acción, Blade Runner contién un bon númberu de fechos dramáticos. Dientru la estaya cyberpunk esta obra debe-y muncho al cine prietu ya que s'asoleyen figures como la muyer fatal, narraciones na primera persona, la cuestionable perspeutiva del héroe asina como la cinematografía escura y de solombres.

Afonda en dellos temes per importantes pala humanidá: temes filosóficos, relixosos asina como l'usu de la inxenería xenética. Hai un bon nivel de paranoya reflexada na manifestación visual del poder de les tresnacionales, la policía omnipresente, les lluces de les sondes y el control sobro la persona y la naturaleza (los animales son artificiales y fechos poles persones). Hai tamién un dominiu de la cultura xaponesa y de la so publicidá. Tamién hai una continua obsesión polos güeyos y les semeyes manipulables.

Repartu[editar | editar la fonte]

Blade Runner tuvo un nùmberu bien grande d'actores que naquella dómina nun yeren famosos.

1) Harrison Ford: Ye Rick Deckard. Ford venía de trunfar con Star Wars y taba a la gueta d'un papel dramáticu qu'atopó con Blade Runner.

2) Rutger Hauer: Ye Roy Batty. Hauer fizo una de les sos meyores actuaciones dientru del papel de cabezaleru violentu y complexu de los replicantes.

3) Sean Young: Ye Rachel. La semeya de la prefeición femenina a los 22 años.

4) Edward James Olmos: Ye Gaff. Utilizó'l so orixe étnicu p'axudar na creación de la interllingua que'l so personax usa durante la película. Amás, l'usu'l bastón crea un misteriu al so alrodiu.

5) Darly Hannah: Ye Pris. Hannah desendolca una interpretación alrodiu la inocencia peligrosa d'una replicante enamorada de Roy Batty.

Dalgunos actores secundarios son:

1) Brion James: Ye Leon. Destaca sobremanera pola so fuercia y la so intelixencia intuitiva.

2) Joe Turkel: Ye'l Doctor Eldon Tyrell. Magnate corporativu dirixe l'avance científicu y el desendolcu los replicantes.

3) James Hong: Ye Hannibal Chew. Un vieyu xenetista especialista na creación sintética de güeyos.

4) William Sanderson: Ye J. F. Sebastian. Inxenieru solitariu amuesa un calter compasivu y obediente de la humanidá.

Música[editar | editar la fonte]

La banda sonora de Blade Runner, fecha por Vagelis, ye una amestadura de composición clásica y l'usu de sintetizadores futuristes que reflexen el futuru retro y de cine prietu que Ridley Scott imaxinó. A la música de Vangelis solo se-y amestó'l saxo del compositor de jazz británicu, Dick Morrisey.

La banda sonora prestó asgaya ente'l públicu en xeneral y la crítica en particular pero magar que Polydor Records fizo la promesa de comercializar l'álbum esto nun ocurrió hasta una década dempués.

Crítica[editar | editar la fonte]

Blade Runner estrenóse en 1290 sales de cine'l 25 de xunu de 1982. La fecha foi esa pol deséu del productor Alan Ladd Jr. porque los sos anteriores éxitos (Star Wars y Alien) estrenárense tamién un día 25.

Nun entamu Blade Runner collechó crítiques contradictories de la prensa especializada. Dellos críticos amosáronse confusos y decepcionaos porque la obra nun tenía'l ritmu narrativu que s'esperaba d'una obra de ficción mientres otros daben-y gran valor a la so complexidá temática.

La película nun tuvo bonos resultaos de taquilla nos Estaos Xuníos pero sí en resto'l mundu.