Atolón de Bokak

De Wikipedia
Saltar a navegación Saltar a la gueta
Blue globe icon.svgAtolón de Bokak
Bokak Atoll.png
Alministración
ProtectoráuFlag of German New Guinea.svg Nueva Guinea Alemana
PaísBandera de les Islles Márxal Islles Márxal
Tipu entidá atolón
Xeografía
Coordenaes 14°32′N 169°00′E / 14.53°N 169°E / 14.53; 169Coordenaes: 14°32′N 169°00′E / 14.53°N 169°E / 14.53; 169
Atolón de Bokak is located in Islles Márxal
Atolón de Bokak
Atolón de Bokak
Atolón de Bokak (Islles Márxal)
Superficie 81.28 km²
Altitú 3 m
Demografía
Cambiar los datos en Wikidata

Bokak (en marshallés Bokaak o Bok-ak [pˠʌ͡ɔɡʷɑ̯ɑk]) o Taongi ye un atolón coralín deshabitáu na cadena Ratak nel Océanu Pacíficu. Pertenez a les Islles Marshall. Por mor del so aisllamientu, Bokak nun ye un atolón habitáu.

Xeografía[editar | editar la fonte]

L’atolón de Bokak [1] ye’l más aislláu y llonxanu de tolos que formen el país marshallés. Allúgase a 685 km al norte de Majuro y a 280 de Bikar. La islla de Wake ta a 560 km. Tien un área terrestre emerxío de 3,2 km² y enzarra una llaguna de 78 km². Les islles que lu componen tán asitiaes toes na faza oriental, mientres na occidental, norte y sur l'atolón son castros que nun permiten siquiera la cobertoria vexetal. De norte a sur, les islles más grandes son Kamwome, Bwdije, Sibylla, Bokak o Potak y Bwokwla. La presencia de regodones y sable na superficie de les islles indiquen una hestoria de fuertes tormentes. Pela so parte, la llaguna algama una fondura inferior a los 30 m, mientres la superficie del agua ta elevada 1 m más que la del océanu circundante.

Clima[editar | editar la fonte]

El clima de Bokak ye’l más secu de los atolones de les Islles Marshall, siendo de calter semiáridu. La temperatura media añal ye d'aproximao 28 ºC. La precipitación media añal ye menos de 1000 mm y cai principalmente pel final de branu. El so clima áridu débese a una combinación de dellos factores: insuficiencia pluvial, escelente drenaxe y altes temperatures. Too ello torga’l fenómenu de Ghyben-Herzberg, lo que permite la intrusión marina y evita la presencia d'agua dulce nel atolón.

Vexetación[editar | editar la fonte]

En Bokak hai nueve especies de plantes -toes natives de les islles Marshall- ente les que nun s’atopen la palmera. La cobertoria vexetal carauterística ye’l matorral con especies como Heliotropium foertherianum [2], Scaevola taccada, Portulaca molokiniensis, Sida fallax o Boerhavia herbstii. Les mates de S. taccada son predominantes.

La vexetación acuática básase n’algues coralines y algues verdes.

Fauna[editar | editar la fonte]

Hai varies especies animales presentes nel atolón. La ornitofauna contabiliza 26 especies, atopándose tamién la rata polinesia, l'esculibiertu (Ablepharus sp), los cámbaros ermitaños (Paguroidea sp), la tortuga verde, l'amasuela xigante (Tridacnidae sp), delles especies de pexes, la morena y el tiburón gris.

Historia[editar | editar la fonte]

Probablemente la falta d'agua dulce fexo l'atolón inhabitable, yá que nun hai escatafinos tradicionales qu'indiquen l'asentamientu de población humano ancestral. El primer européu en rexistrar el descubrimientu de Bokak foi l'español Alonso de Salazar el 22 d'agostu de 1526 na espedición García Jofre de Loaísa. Llamáronlu Islla de San Bartolomé. En 1906 les Islles Marshall agregáronse al protectoráu alemán hasta que l'Imperiu de Xapón les tomó en 1914. Demientres la Segunda Guerra Mundial, hebo una guarnición xaponesa que foi bombardeada pol exércitu estauxunidense. Tres la Segunda Guerra Mundial pasaron al dominiu d'EE.UU hasta la independencia completa de les Islles Marshall en 1990.

En 1954 sufrió l'impautu de les ondes gamma de les prebes nucleares[3] de Castle Bravo entamaes nel atolón de Bikini.

Referencies[editar | editar la fonte]