Makalu

Makalu (en chinu, 马卡鲁山, Pinyin: Mǎkǎlǔ Shān) ye'l quintu monte más altu de la Tierra con 8.462 metros d'altitú. Asítisase nel cordal del Himalaya, na llende ente'l Tíbet y Nepal, 22 km al leste del monte Everest. Ye un picu aislláu con una forma qu'asemeya a la d'una pirámide de cuatro cares.

El Makalu ta consideráu un de los montes más difíciles d'esguilar del mundiu, les sos paredes pindies y la so climatoloxía faen que sea necesaria una técnica d'altu nivel, principalmente na parte final de la montaña.

El Makalu tien dos cumes secundaries: el Kangchungtse, o Makalu II, de 7.678 metros y el Chomo Lonzo, de 7.818 metros.

Primera ascensión

Howard-Bury fotografía la cara norte y la oeste en 1921 durante'l reconocimientu del Everest. En 1933, dende un avión, fotografíense les cares sur y oeste. Esti ye'l conocimientu que se tenía d'esta montaña cuando entamen a llegar les primeres espediciones nel añu 1954. Esi añu hai dos intentos d'ascensu, d'una parte una espedición norteamericana inténtalo pela arista sureste, aportando a los 7.100 metros. La segunda espedición que lo intenta, neozelandesa, nun consigue meyorar l'intentu norteamericanu.

A finales d'esi mesmu añu, una espedición francesa, con Lionel Terray y Jean Couzy, esploren la zona como preparación pal ascensu que teníen pensáu durante'l 1955. Nesta esploración faen cume nel Kangchungtse y nel Chomo Lonzo, les dos cumes secundaries del Makalu.

El 15 de meyu de 1955 Lionel Terray y Jean Couz, integrantes d'una espedición francesa dirixida por Jean Franco, consiguen facer cume pela cara norte y l'arista nordeste. Salen a les 7 de la mañana del campu VI, a 7.800m, y faen cume a les 11 de la mañana. Al día siguiente son G. Magnone y Sardar Gyaltsen Norbu los que aporten a la cume, seguíos el 17 de mayu por Bouvier, S. Coupe, Leroux y A. Vialatte. D'esta manera conviértense na primer espedición que ye quien a poner na cume d'un ochomil a tolos miembros de la espedición.

Otres ascensiones

• 1970 - El 23 de mayu, primer ascensión de l'arista sureste por dos escaladores, Y. Ozaki y A. Tanaka, d'una espedición xaponesa. Ye la segunda ascensión a la cume.
• 1971 - Los franceses Yannick Sagnier y Bernard Mellet, consiguen completar l'arista oeste y facer cume.
• 1980: En mayu, John Roskelley, Chris Kopczynski, James States y Kim Momb, completen el primer ascensu ensin ayuda d'osíxenu y ensin sherpas. La via escoyida voi'l Pilar Oeste.
• 1981: El 15 d'ochobre l'himalayista polacu Jerzy Kukuczka esguila'l Makalu abriendo una via nueva pola cara noroeste y la cresta norte. Kukuczka superó esti ascensu faciéndolu en solo, n'estilu alpinu y ensin ayuda d'osíxenu.
• 1990 - La norteamericana Kitty Calhoum Grissom conviértese na primer muyer en pisar la cume del Makalu.
• 2004 - Rosa Fernández y Nacho Orviz completen'l 19 de mayu la primer ascensión absoluta asturiana. Nacho Orviz fae cume ensin l'ayuda d'osíxenu.
• 2006 - El 27 de xineru, l'escalador francés Jean-Christophe Lafaille desapaez nel intentu de la primer ascensión ivernal.
• 2009 - El 9 de febreru, l'escalador italianu Simone Moro y l'uzbeku Denis Urubko conviértense nos primeros en completar una ascensión ivernal.
• 2011 - L'asturianu Jorge Egoechaga, acompañáu del zamoranu Martín Ramos, parten n'abril nuna espedición cola intención de facer cume nel Makalu nel mes de mayu.