Mahoma

De Uiquipedia
Saltar a: navegación, buscar
Wikipedia:Llista d'artículos que toa Wikipedia tien que tener

Muhammad o Mohammed, llamáu n'España Mahoma ye'l profeta (nabi) del Islam.

Ilustración del sieglu XV d'una copia d'un manuscritu de Al-Biruni que representa a Mahoma predicando "El Corán" en La Meca.

Mahoma ta consideráu'l «sellu de los profetes» (jātim al-anbiyā) , por ser el caberu d'una llarga riestra de mensaxeros, unviaos por Dios (Alá) p'actualizar el so mensaxe, que sería básicamente, el mesmu tresmitíu polos sos predecesores, ente los que se cuenten Isa (Xesús) y Musa (Moisés).

Árabe de la tribu de Coraix (Quraysh), el profeta nació en La Meca en 570, la tradición afita la fecha del 570 como la del nacimientu, faciéndola coincidir cola expedición del gobernador abisiniu escontra La Meca, pero dicha expedición ocurrió muncho enantes. Dalgunos autores asítien el nacimientu alrodiu del 580. Morrió en Medina, el 8 de xunu de 632. Les dos ciudaes alcuéntrense na rexón de Hiyaz n'actual Arabia Saudí. Fiyu póstumu de Abd Allah ibn Abd al-Muttalib, miembru del clan de los hashimíes, foi acoyíu y educáu primero pol so güelu Abd al-Muttalib y dempués por so tíu paternu Abu Talib, padre de so primu y futuru califa Alí.

Trabayó como mercader na ruta caravanera ente Damascu y La Meca a les órdenes de Jadiya, fiya de Juwaylid, una rica comerciante vilda, venti años mayor qu'él, cola qu'acabaría casándose. Tuvo cuatro fiyes, asina como dalgunos fiyos que nun llegaron a adultos. Dixo haber recibío la primera visita del ánxel Gabriel a los 40 años d'edá (aproximadamente en 612). Describió esta visita como un mandatu pa memorizar y recitar los versos unviaos por Dios que posteriormente fueron escritos nel Corán. L'arcánxel Gabriel indico-y qu'había sido elexíu como'l caberu de los profetes y como tal predicó la palabra de Dios sobre la base d'un estrictu monoteísmu, prediciendo el Día del Xuiciu Final.

Según el Corán Mahoma yera analfabetu (ummi), fechu que la tradición musulmana considera una prueba qu'autentifica'l Corán (Al-Qur'ān), llibru sagráu de los musulmanes, como portador de la verdá revelada. Durante la so vida, Mahoma confió la conservación de la palabra de Dios (Allah), tresmitida por Gabriel (Yibril) a los hafiz, quienes memorizábenla recitándola incansablemente. A la muerte del profeta, sos sucesores vieron la necesidá de plasmar les sos palabres por escritu, pola importancia de conservar el mensaxe orixinal en toda la so pureza, ensin el menor cambéu nin de fondu nin de forma. Pa ello emplegaron materiales como les escápules de camellu, sobre les que grababen los versículos del Corán.

Mahoma nun rechazó completamente les relixones xudía y cristiana, pero afirmaba haber sido unviáu por Dios pa completar y perfeccionar les sos enseñances: atacaes por muncha xente, viose obligáu a salir de La Meca y vivir en Yathrib (dempués llamada Medina) colos sos seguidores. Nesta ciudá entamó a consolidar el so movimientu relixosu. Hubo una guerra ente La Meca y Yathrib au los siguidores de Mahoma resultaron victoriosos. La organización militar que nació d'esta guerra continuó la llucha conquistando Arabia. A la fecha de la so muerte, yá tenía unificada toda la Península Arábiga, asina como parte de Siria y Palestina.

Posteriormente los sucesores de Mahoma estendieron el dominiu árabe a Palestina, Siria, Mesopotamia, Persia, Exiptu, el Norte d'África y España.