Bancu d'España

Coordenaes: nan°S nan°W / -nan°N -nan°E / -nan; -nan
De Wikipedia
Bancu d'España
bancu central y organización

Sede del Bancu d'España, en Madrid.
Llocalización
Sede Sede central del Banco de España (es) Traducir
Direición España
Coordenaes nan°S nan°W / -nan°N -nan°E / -nan; -nan{{#coordinates:}}: Llatitú inválida
Bancu d'España alcuéntrase n'España
Bancu d'España
Bancu d'España
Bancu d'España (España)
Historia
Fundación2 xunu 1782
Fundador Carlos III d'España
Organigrama
Dueñu España
Presidente Pablo Hernández de Cos (11 xunu 2018)
Sector
Industria servicios financieros, excepto seguros y fondos de pensiones (es) Traducir
Participación empresarial
Propietariu de
Forma parte de
Bolsa de valores Sistema Européu de Bancos Centrales
Web oficial
Cambiar los datos en Wikidata

El Bancu d'España (castellanu: Banco de España) ye'l bancu central d'España, y realiza como talu les funciones de tesorería del Estáu, institutu emisor, bancu de bancos, inspección del sistema bancariu y asesoramientu sobro la política monetaria y crediticia[1]. Actúa con autonomía, y ensin regulación llexislativa ni institucional, con respectu al sistema democráticu y xudicial, p'algamar el so oxetivu de regular la inflación[2]. El bancu ye parte integrante del Sistema Européu de Bancos Centrales (SEBC), y como talu ta protexíu poles disposiciones del Tratáu de la Comunidá Europea y los estatutos del SEBC. Ye una entidá de derechu públicu con personalidá xuridica privada y capacidá plena pa encargase de la economía pública de manera privada. El bancu puede dictar les normes necesaries pal exerciciu de les sos funciones rellacionaes cola política monetaria, y ye competente tamién pa dictar les disposiciones que permitan desarrollar eses normes, nomaes Circulares Monetaries. Les normes y disposiciones de so asoléyense nel Boletín Oficial del Estáu.

El bancu foi l'autoridá monetaria española de 1874 a 1998, l'únicu bancu autorizáu pa emitir la moneda oficial del país, la peseta. De magar 2014 ye tamién l'autoridá nacional competente n'España dientru del Mecanísmu Únicu de Supervisión européu[3]. Establecíu orixinalmente por Carlos III en Madrid en 1782, col nome de Banco Nacional de San Carlos, tomó'l so nome actual en 1856. La so actividá ta regulada pola Llei d'Autonomía del Bancu d'España (llei 13/1994, de 1 de xunu).

Historia[editar | editar la fonte]

Acción del Banco Nacional de San Carlos, emitida'l 2 de xunu de 1782.

Fundación y crecimientu[editar | editar la fonte]

El bancu, nomáu orixinalmente Banco Nacional de San Carlos, foi fundáu en 1782 por Carlos III en Madrid, col envís d'estabilizar les finances del Estáu al traviés de la emisión de bonos estatales (vales reales) tres de la Guerra d'Independencia de los Estaos Xuníos, na qu'España diéra-y sofitu militar ya financieru a les Trece Colonies. Magar que creáu p'axudar al estáu, el bancu yera nún principiu priváu, propiedá d'accionistes: capitalistes españoles, rentistes franceses y les tesoreríes de delles comunidaes indíxenes de Nueva España[4][5]. El so primer director foi'l banqueru d'orixe francés Francisco Cabarrús[6].

Tres de la invasión napoleónica y posterior Guerra de la Independencia (1808-13) l'Estáu debía-y más de 300 millones de reales, lo que punxo al bancu en dificultaes financieres. El ministru del Tesoru Luis López Ballesteros creó en 1829 un fondu de 40 millones de reales contra los que'l bancu podía emitir los sos propios billetes en Madrid. Fízolo tres de camudar el so nome pol de Banco Español de San Fernando (el rei del momentu yera Fernando VII). En 1844 creáronse dos bancos que rivalizaron con elli, el Banco de Isabel II y el Banco de Barcelona, y en 1846 el Banco de Cádiz. En 1847, como resultáu d'una sobreexposición nel mercáu inmobiliariu madrilanu, el Banco de Isabel II viose forciáu a fusionase col de San Fernando, y el resultante caltuvo'l nome d'esti segundu.

Na década de 1850, embaxu la direición de Ramón Santillán, el bancu estendió les sos operaciones a les ciudaes de València y Alacant (1858) y tomó'l so nome actual, Banco de España. El bancu yera ún de los que, en 20 ciudaes que yeren los principales centros industriales y mercantiles del país (Barcelona, Bilbao, Málaga, Sevilla, Zaragoza, Valladolid o Santander), teníen bancos qu'emitíen moneda y descuentos nel periodu 1856-74.

El monopoliu de la emisión de moneda[editar | editar la fonte]

El 19 de marzu de 1874 les necesidaes financieres provocaes pola tercer guerra carlista y la guerra de los Diez Años obligaron al ministru de Facienda de la Primer República, José Echegaray, a decretar la fusión de toos los bancos emisores llocales col Bancu d'España[7]. Toos yeren llibres de siguir cola so actividá comercial y crediticia (ficiéronlo namái los bancos de Barcelona, Bilbao, Reus, Santander y Tarragona), pero la facultá d'emitir papel moneda concedióse-y en réxime de monopoliu al Bancu d'España a cambiu d'un creitu de 150 millones de pesetes.

De magar, el bancu entamó l'apertura d'una rede amplia de sucursales per tol país, escomenzando por ocupar les sedes de los antiguos bancos emisores qu'absorbiera. A finales de sieglu había más de 50 sucursales, en toes les capitales de provincia y en ciudaes d'importancia mercantil. Daquella el bancu, que siguía siendo una sociedá por acciones de propiedá privada compaxinaba la emisión de billetes y la concesión de creitos al Tesoru Públicu con préstamos y descuentos a particulares. Pesie a ser de propiedá privada, el gobernador yera nombráu pol Gobiernu, que tenía qu'aprobar tamién a los subgobernadores. En 1884 entamó la construcción de la sede central del bancu, nel cruce ente la cai d'Alcalá y el Paséu del Prado, en Madrid.

La Llei d'Ordenación Bancaria de 1921 consagró al bancu como bancu de bancos, o bancu central, y entamó a desarrollar, d'alcuerdu col Gobiernu, nuevos instrumentos de política monetaria. Yera, nesi momentu, una sociedá anónima con un capital de 177 millones de pesetes (354.000 acciones nominatives de 500 pesetes caúna), pero'l Gobiernu siguía reservándose'l nombramientu d'un gobernador y dos subgobernadores. El so Conseyu taba formáu por 21 miembros: 15 elexíos polos accionistes, ún elixíu polos otros bancos, otru elixíu pol Conseyu Superior de Cámares de Comerciu, Industria ya Navegación, otru escoyíu poles confederaciones agrícoles y trés nombraos pol Gobiernu[8].

El bancu na Guerra Civil[editar | editar la fonte]

El 15 de xunetu de 1936, tres de cellebrase'l Conseyu del bancu, el so subgobernador primeru del bancu demientres tol periodu republicano, Pedro Pan Gómez fuxó a Burgos, xunto al políticu Antonio Goicoechea, col oxetivu de fundar un nuevu bancu central de la zona sulevada. Foi cesáu del cargu el 4 d'agostu, y sustituyíu por Julio Carabias Salcedo. El 14 d'agostu foron suspendíos de toles sos funciones tolos conseyeros que sofitaran la sulevación[8].

El bancu siguió dirixíu, dende la so sede en Madrid, pol so director dende febreru de 1936, Luis Nicolau d'Olwer. A les poques hores d'españar la guerra, el 19 de xunetu de 1936, el Bancu d'España, nuna medida obligada pa evitar el caos económicu nel país, llimitó a 2.000 pesetes la cantidá máxima que los clientes de bancos y caxes d'aforros podíen retirar de les sos cuentes corrientes y depósitos bancarios durante un plazu de 48 hores[8]. Nicolau, siguiendo órdenes del Gobiernu, pagó al contáu, coles reserves del bancu (2.202 millones de pesetes-oru), 616 millones de pesetes a Francia y 1.586 a la Xunión Soviética pa consiguir armes pal bandu republicanu. El 65% de los efectivos bancarios quedaron en manes de la República, y un 35% del bandu franquista; sicasí, los presupuestos del gobiernu de la República pa los años de guerra (1937-39) nun tuvieron en consideranza esta situación[8].

En setiembre de 1936 los sulevaos creen el so propiu Banco de España, con sede en Burgos. Esti bancu financiaba los gastos n'armamentu y personal militar, y tamién de los funcionarios de los territorios que controlaba, principalmente al traviés de créditos internacionales. El xefe del so Serviciu d'Estudios, José Larraz López, avisó de la importancia de rebaxar el preciu del dineru republicanu, al tiempu que Pedro Pan alvertía de forma secreta el posible usu militar de la masa de moneda oru republicana col envís de provocar el fundimientu de la cotización de la peseta republicana y facer imposibles les rellaciones comerciales del gobiernu republicanu. Franco ordenó la creación d'un fondu de papel moneda republicanu capturáu al enemigu, que había ser xestionáu por un comité secretu integráu ente más otros pol coronel José Ungría, xefe del serviciu d'Información y Policía Militar, el conseyeru del Bancu d'España Ángel Gutiérrez Martínez y el diplomáticu Ramón Martínez Artero. El dineru del fondu usose pa financiar les redes d'intelixencia en suelu francés y la quinta columna na retaguardia republicana, amás de pa mercar aparatos modernos de comunicación, pagando un 30% del valor real de la moneda usada. Con estes y otres midíes consiguiose que, al final de la guerra, mientres que la peseta republicana depreciárase nún 99,3%, la nacional depreciárase namái un 27,7%[9]. El 15 de marzu de 1938 el ministru de Facienda de la zona franquista dictó un decretu pol que se creaba el Comisariáu de la Banca, que según desplicó a la prensa sustituyía a los anteriores cargos de gobernadores del Banco de España, Banco Exterior de España, Banco Hipotecario de España y Banco de Crédito Local. La nomada sucursal de Burgos del Bancu d'España nun tuvo un gobernador, Antonio Goicoechea, hasta abril de 1938.

Sede del Bancu d'España n'Uviéu.

El bancu na dictadura franquista[editar | editar la fonte]

Tres de la Guerra Civil el bancu perdió competencies y autonomía en favor del Ministeriu de Facienda. Una institución de nueva creación dependiente d'elli, el Institutu Español de Moneda Foriata, creose en 1939 pa facese cargu, n'esclusiva, de la definición del tipu de cambéu oficial de la peseta y del cambéu de moneda foriata por española, y viceversa, nel territoriu español. En 1946 aprobose una nueva Llei d'Ordenación Bancaria; por ella la política monetaria pasó a ser la competencia del Gobiernu, que encargaríase, ente más coses, d'afitar los tipos d'interés y descuentu, neto n'operaciones d'activu como de pasivu, pa toa la banca española. Amás, aumentó'l númberu de conseyeros del Bancu d'España nombraos pol Estáu, de trés a cinco, y dispúsose, en favor del Estáu, el recorte de dividendos. Esi mesmu añu el bancu perdió la facultá de poder escoyer a los fabricantes de billetes; de magar, fadríase cargo de la so fabricación la Fábrica Nacional de Moneda y Timbre.

En 1954 el bancu, que siguía funcionando entá como una entidá privada, xugó un papel destacáu nes negociaciones que llevaron a la compra de les mines de Ríotinto a la empresa británica Rio Tinto Company Limited, y dempués pasó a formar parte del consorciu que acabaría constituyendo, pa esplotar los yacimientos, la Compañía Española de Minas de Río Tinto[10].

El nomamientu de Juan Sardá en 1957 como director del Serviciu d'Estudios del bancu foi un finxu destacáu na historia del bancu[11]. El so prestixu internacional, y l'apoyu de les grandes potencies, facilitaron l'ingresu d'España na OECE, el FMI y el Bancu Mundial en 1959. Nel ámbetu internu, Sardá collaboró na redaición del Plan d'Estabilización de 1959 y na ellaboración de la política monetaria que se habría desarrollar nel periodu de mayor crecimientu y tresformación de la economía española. En 1962 una Llei de Bases d'Ordenación del Creitu y la Banca, más axustada nel so conteníu a la lliberalización esperimentada pola economía española tres de la implantación del Plan, devolvió-y al bancu delles competencies. Dentro de los cambeos produciose la so nacionalización y el cese de la so actividá de banca privada. En 1965, Mariano Navarro Rubio ye nomáu principal responsable del bancu, y Ángel Madroñera fízose cargu del so Serviciu d'Estudios[11]. De manes de la creación del Cuerpu de Titulaos, y de la so provisión al traviés d'oposiciones, llegaron al Serviciu una nueva xeneración d'economistes, munchos d'ellos con formación nel estranxeru.

De 1971 a 1988 dirixó'l Serviciu d'Estudios del bancu Luis Ángel Rojo[11]. Esta institución, pesie al contestu políticu desfavorable (muerte de Franco y transición), a la crisis económica de 1973 y a les interferencies continues del Ministeriu de Facienda nel so llabor, consolidose como un organismu maduru y adaptáu al so tiempu. Estos años foron tamién los del final de la tresformación institucional del bancu. Pasó a ser un bancu central autónomu, primer responsable de la política monetaria, la estabilidá macroeconómica y la ortodoxa financiera del país.

La Constitución de 1978[editar | editar la fonte]

Tres de l'aprebación de la Constitución de 1978, en 1980, aprobose la Llei d'Órganos Recotres del Bancu d'España, una llei clave na historia d'esti. Luis Ángel Rojo dexó la xefatura del Serviciu d'Estudios pa ser subgobernador del bancu, y foi sustituyíu socesivamente por Constantino Lluch (de xunu de 1988 a ochobre de 1989), José Pérez Fernández (ochobre de 1989 a 1992) y José Luis Malo de Molina. Neses décades el bancu tuvo que facer frente a retos perimportantes: l'adhesión d'España a la Comunidá Económica Europea en 1985, l'ingresu de la peseta nel Sistema Monetariu Européu en 1989, la Llei d'Autonomía del Bancu d'España en 1994, fecha acordies colo establecíu nel tratáu de Maastricht, la integración del Bancu nel Sistema Européu de Bancos Centrales en 1998, y l'apueste pola Xunión Económica y Monetaria en 1999. La incorporación d'España al procesu d'integración europea obligó a la política monetaria a algamar una converxencia nominal colos países europeos con mayor estabilidá macroeconómica, pa lo que hubo que poner en práctica una política monetaria activa, continua y previsible basada principalmente nel caltenimientu de la estabilidá de los precios.

Fin de la peseta y llegada del euru[editar | editar la fonte]

La nueva moneda europea, l'euru, sustituyó a la peseta'l 1 de xineru de 2002.

En 2002 la xunión monetaria europea, dientro del marcu de la Xunión Europea, entamó a facese realidá. El 1 de xineru una nueva moneda común, l'euru, sustituyía a les vieyes monedes nacionales en once países. La peseta, nacida cola Revolución de 1868, dexaba pasu al euru, con un valor inicial de 166,386 pesetes por euru. El camín de la nueva moneda, de magar, nun tuvo llibre de problemes. La crisis internacional de 2007-08 impactó grandemente na economía española. Desapaecieron prácticamente dellos de los principales mercaos de capitales mayoristes, como l'interbancariu o'l de titulizaciones, y esto dificultó la financiación de les entidaes de creitu españoles, que precisaben nesi momentu de bien de financiación esterior[12]. El papel del bancu na detección y tratamientu de la crisis financiera, cola intervención y rescate d'entidaes bancaries con un coste pal Tesoru públicu de más de 40.000 millones d'euros, foi oxetu de discutiniu ente los principales partíos políticos, que se cruciaron acusaciones mutues, dende la formación, n'avientu de 2011, del gobiernu presidíu por Mariano Rajoy[12].

Persábese agora qu'en momentos fundamentales de la crisis, en 2008, la supervisión del Bancu d'España camudó les normes contables desixíes a les instituciones financieres. Permitió retrasar l'apunte nos balances bancarios de la medría escesiva de la morosidad causada pola crisis, especialmente no que cinca a la refinanciación de préstamos, y esto permitió disimular l'efectu destructivu de la morosidá, pero tamién permitió diferir les correcciones necesaries pa iguar esos problemes[13]. La estratexa del bancu buscaba evitar la quiebra en cadena de un bon númberu d'instituciones financieres. Usó dineru, públicu ya priváu, y cambeos llegales ya institucionales, pa evitar la contaminación de tol sector bancariu español y l'aparición de una crisis de confianza nel sector, tanto nos mercaos como ente los clientes[12]. La mayoría del dineru utilizáu foi priváu. Les entidaes bancaries sanearon el so balance contable colos sos propios recursos, al traviés d'operaciones corporatives, recurriendo al Fondu de Garantía de Depósitos y finalmente, cuando nun quedó otra, mediante la inyección de fondos públicos, incluyida l'ayuda europea asociada al programa d'asistencia financiera firmáu en 2012. En total, ente 2008 y 2013 el saneamientu de les entidaes de creitu españoles tuvo un coste cercanu a los 270.000 millones d'euros, asumíos polos accionistes y pol Tesoru públicu y que permitieron que los depósitos de los clientes caltuviéranse ensin merma[12].

Referencies[editar | editar la fonte]

  1. ↑ Calvet, Caterina. Manual bàsic de Banca. Sabadell: Edicions Comercials, 1999.
  2. ↑ Pérez de Lama, Ernesto (dir.). Manual del Estado Español 1999, p. 634. Madrid: LAMA, 1998. ISBN 84-930048-0-4.
  3. ↑ «Supervisores nacionales, na web del Bancu Central Européu.». Consultáu'l 4 de febreru de 2024.
  4. ↑ Car.los Marichal, "Banco de San Carlos (Spain)", en Barbara A. Tenenbaum (ed), Encyclopedia of Latin American History and Culture, vol.1, p. 278. New York: Charles Scribner's Sons, 1996.
  5. ↑ Earl Hamilton, "Plans for a National Bank in Spain, 1701–1783", en Journal of Political Economy, 1949:58(3);315–336.
  6. ↑ Pedro Tedde de Lorca, El Banco de San Carlos (1782–1829). Madrid, Alianza Editorial, 1988. ISBN
  7. ↑ Salvador Armendáriz, María Amparo (2000). Banca pública y mercado: implicaciones jurídico-públicas de la paridad de trato. Instituto Nacional de Administración Pública. p. 62. ISBN 978-84-7088-698-0.
  8. ↑ 8,0 8,1 8,2 8,3 Javier Egido. «El Banco de España durante la Guerra Civil. El oro de París y el oro de Moscú». Blog Florentinoareneros.blogspot.com. Consultáu'l 7 de marzu de 2024.
  9. ↑ José Luis Orella (13 de xineru de 2021). «La Guerra Civil en el campo de batalla monetario». La Razón.
  10. ↑ Arenas Posadas, Carlos. «Riotinto, el declive de un mito minero (1954-2003)», en Revista de Historia Industrial 2017;(69):109-142. Barcelona, Universitat de Barcelona, 2017. ISSN 1132-7200.
  11. ↑ 11,0 11,1 11,2 Pablo Martín-Aceña Manrique (2000). El Servicio de Estudios del Banco de España: 1930/2000. Madrid: Banco de España. ISBN 84-7793-710-9.
  12. ↑ 12,0 12,1 12,2 12,3 El banco de España en la crisis, artículu de El País (9 de febreru de 2017).
  13. ↑ Crisis bancaria: El prestigio del Banco, artículu del diario El País (3 de febreru de 2017).

Enllaces esternos[editar | editar la fonte]

Sacáu de «https://ast.wikipedia.org/w/index.php?title=Bancu_d%27España&oldid=4166729»