Anna Politkóvskaya
Anna Politkóvskaya (en rusu: Анна Степановна Политковская; Nueva York, 30 d'agostu de 1958 - Moscú, 7 d'ochobre de 2006) foi una periodista rusa y activista polos drechos humanos reconocida pola so oposición al conflictu chechenu y al presidente rusu Vladímir Putin. Ñació nos EE.XX. col nome d'Anna Mazepa, de pas d'orixe soviético-ucraín que trabayaben como diplomáticos na ONX. Medró en Moscú y estudió periodismu na Universidá Estatal de Moscú, onde se graduó en 1980. Defendió una tesis sobre la poesía de Marina Tsvetaeva. Politkovskaya yera ciudadana tanto de los EE.XX. como de Rusia.
Morrió tirotiada nel ascensor del edificiu del so apartamentu en Moscú'l 7 d'ochobre de 2006.
[editar] Obra periodística
Anna Politkóvskaya foi autora d'artículos y llibros tornaos a munchos idiomes. Entamó a trabayar como periodista nel añu 1983 na revista “Izvestia”, anque nel momentu del so asesinatu escribía pa “Novaya Gazeta”, la publicación más crítica col Kremlin. Saltó a la fama internacional al ser seleicionada como mediadora pol comandu chechenu qu'ocupó'l teatru Dubrovka de Moscú con más d'800 espectadores, anque la operación de rescate de los servicios de seguridá rusos finó con 169 muertos. Dos años dempués foi envelenada demientres diba n'avión a Beslán, posiblemente tamién pa mediar nel secuestru de la escuela que finó tamién en masacre.
Nos sos llibros la periodista criticaba la política de Vladímir Putin en Chechenia y la violación de drechos humanos por parte del exércitu rusu sobre la población, tamién acusaba al gobiernu rusu de permitir que les mafies controlaren el país. Les sos crítiques provocaron que recibiera amenaces de muerte de los servicios secretos de la prieta democracia rusa.
Politkóvskaya taba trabayando nun artículu sobre les tortures en Chechenia cuando la asesinaron.
[editar] Asesinatu
El sábadu 7 d'ochobre de 2006 la periodista foi alcontrada muerta por una vecina nel ascensor del so edificiu. Fontes policiales informaron que xunto al cuerpu alcontraron cuatro bales y una pistola. Les primeres informaciones señalaron que se trató d'un asesinatu por encargu, yá que recibió dos disparos, ún de ellos na cabeza, pero nun ta claro quién encargó l'asesinatu. El fechu de que'l crime fora'l día del cumpleaños del presidente rusu Vladímir Putin ye, n'opinión de dalgunos, significativu. El so asesinatu foi investigáu por Alexander Litvinenko, ex-espía rusu que vivía en Londres cola so familia, qu'al poco morrió por envelenamientu.
La muerte de la periodista sumóse a una llarga llista de 300 periodistes desapaecíos o asesinaos en Rusia dende 1991.
