Wikipedia:Lo que Wikipedia nun ye

De Wikipedia
Saltar a: navegación, buscar
Polítiques de Wikipedia
Los cinco pegoyos
Lo que Wikipedia nun ye
Estándares d'artículos
Puntu de vista neutral
Verificabilidá
Fontes de confianza
Derechos d'autor
Principios globales
Inora les normes
Usa'l bon xaciu
Conflictu d'interés
Trabayar con otros
Etiqueta
Albidra bon xeitu
Nun morder a los novatos
Regla de les tres reversiones
Nun faigas ataques personales
Nun saboties Wikipedia pa encontar los tos argumentos

Wikipedia ye una enciclopedia, esto ye, ye un testu que busca compendiar la conocencia. Pero cunta con munches traces que nun tán presentes nes enciclopedies corrientes. Ente elles, los artículos edítense en comunidá, el material evoluciona constantemente, la diversidá de temes ye inmensa, y nun tien un plan de trabayu predetermináu.

Ello, xunto cola variedá histórica de conteníu que tiense asoleyao baxo'l nome d'«enciclopedia», fai dacuando difícil determinar exautamente qué material ye afechiscu pa ella. Esta política esplica ciertes regles clares sobro  qué material nun ye afechiscu en Wikipedia.

Lo que Wikipedia nun ye[editar la fonte]

Wikipedia nun ye una enciclopedia en papel[editar la fonte]

Wikipedia nun ta fecha sobro papel. Esto significa que nun hai una llende práctica del númberu de temes que podemos tratar, con esceición d'aquellos que nun sían verificables o fallen en cualesquiera de los aspeutos señalaos nesta páxina.

Hai una clase de llende de facto pal tamañu individual del artículu, que depende del tamañu de descarga de la páxina pa los llectores y considerancies de lleibilidá (ver Wikipedia:Tamañu de los artículos). A partir de ciertu puntu, la partición d'un artículu en dellos separaos, dexando resumes afayadizos, ye una forma natural de crecedera pa un tema específicu. Dellos temes trátense nes enciclopedies impreses de manera amenorgada y estática. Sicasí, Wikipedia nun precisa papel y puede tratar dichos temes con mayor fondura y estensión. De xacíu, tolo qu'amiestes tien de ser relevante pal artículu.

Esto tamién significa que nun hai que redirixir una tema a otru parcialmente equivalente que tenga mayor usu común. Puede establecese una sección del tipu «Ver tamién», onde pueda disponese otra información más que tea rellacionada col tema del artículu.

Wikipedia nun ye un diccionariu[editar la fonte]

Wikipedia nun ye un diccionariu, o una guía d'usos o xírigues. Los artículos de Wikipedia nun son:

  1. Definiciones de diccionariu. Una y bones Wikipedia nun ye un diccionariu, nun tienes de crear un artículu pa definir un términu. Un artículu tien d'empezar xeneralmente con una bona definición; si te atopes con un artículu que consiste solamente nuna definición, comprueba si hai información que pudieres añader y que sería afayadiza pa una enciclopedia. Una esceición a esti puntu son los artículos sobre los significaos culturales de los númberos.
  2. Llistes de definiciones. Sicasí, hai páxines de dixebra que consten d'indicadores a otres páxines y que s'utilicen pa esclariar distintos significaos d'un mesmu términu. Wikipedia tamién incluye páxines d'anexos de dellos campos especializaos.
  3. Guíes d'usu, de xírigues o espresiones idiomátiques peculiares. Wikipedia nun trata sobre cómo dicir palabres, llinguaxes, xírigues o argots d'un determináu grupu de persones. Wikipedia nun ta destinada a enseñar a les persones a falar como un hacker nin tampoco ta obligada a recoyer les espresiones coloquiales d'un llugar. Sicasí, dependiendo del contestu del artículu enciclopédicu, pue ser importante que se describa cómo s'usa una palabra pa estremar ente idees asemeyaes y que podríen confundise fácilmente. En dellos casos especiales, un artículu sobre un términu d'una xíriga o argot podría ser afayadizu na Wikipedia.

Esiste un proyeutu paralelu, el Wikcionariu, dedicáu integralmente a definiciones d'esti tipu.

Wikipedia nun ye un editor de pensamientos orixinales[editar la fonte]

Wikipedia nun ye un llugar pa publicar los tos propios pensamientos o analises. Cada información presente nos artículos tien de venir de fontes de bona reputación, independientes del tema del que trata la información.

  1. Fonte primaria o orixinal. Inclúyense equí propuestes de teoríes y soluciones, idees orixinales, definiciones de términos, acuñáu de nueves palabres, etc. Ver Wikipedia:Wikipedia nun ye una fonte primaria. Si realizasti investigaciones primaries, publica les sos resultancies n'otros llugares, tales como revistes y otros medios impresos con revisión por pares o sitios en llinia respetaos. Wikipedia va sopelexar esi trabayu una vegada que forme parte de la conocencia humana aceptada. Non tola información añadida a Wikipedia tien que pasar por revistes con revisión por pares, pero asegúrate de que la información ye fiable y verificable. Por casu, citar un llibru, un mediu impresu o otru recursu en llinia fiable demuestra que'l material ye verificable y nun ye a cencielles la opinión del editor.
  2. Invenciones orixinales. Si inventes la palabra xzoxFof o un nuevu tipu de baille, eso nun ye material pa un artículu hasta qu'una fonte secundaria informe d'ello.
  3. Reseñes crítiques. Les biografíes y los artículos sobre trabayos artísticos tienen de ser enciclopédicos. De xacíu, l'analís críticu sobre arte ye bienveníu, si ta encontáu nes observaciones direutes de partes esternes. Llei tamién el puntu 5.
  4. Ensayos personales o blogues qu'esponen les tos opiniones particulares sobre una tema. Wikipedia tien de compilar la conocencia humana, nun ser un vehículu pa convertir les opiniones personales en parte de la conocencia humana. Na rara situación onde les opiniones d'un únicu individuu son lo suficientemente importantes p'aldericar, ye preferible dexar qu'otres persones escriban sobre elles. Los ensayos personales sobro temes rellacionaos con Wikipedia son bienveníos en Meta.
  5. Opiniones sobre acontecimientos actuales; son un casu particular del puntu anterior. Anque les temes d'actualidá pueden revolver pasiones y tentar a la xente al proselitismu, por exemplu, defenses apasionaes de los tos puntos de vista favoritos, Wikipedia nun ye un mediu pa esto. Los artículos tienen de caltener un equilibriu, y les entraes de los acontecimientos actuales riquen una perspectiva razonable. Amás, los wikipedistes tienen d'esforciase por escribir artículos que nun se queden rápidamente anticuaos.

Wikipedia nun ye una tribuna d'opinión[editar la fonte]


Wikipedia nun ye un llugar pa defenses d'idees, proselitismos, propaganda o publicidá. Poro, los artículos de Wikipedia nun son:

  1. Propaganda o defenses d'idees de nengún tipu. Un artículu puede informar oxetivamente sobre lo que les distintes partes implicaes nun asuntu dicen, siempres y cuando se faiga dende un puntu de vista neutral. Si quies convencer a daquién de los tos puntos de vista preferíos, utiliza Usenet o empieza un blogue.
  2. Autopromoción y autobiografíes. Los wikipedistes tienen d'evitar contribuyir n'artículos sobre sí mesmos, les sos families o asuntos que tean personalmente implicaos, pos se fai difícil caltener el puntu de vista neutral mientres se crean. Son igualmente inaceptables los artículos autobiográficos o aquellos onde tengas un interés personal, como proyectos personales (ver Wikipedia:Autobiografía y Wikipedia:Autopromoción).
  3. Publicidá. Los artículos sobre compañíes y productos son aceptables si tan escrites con un estilu oxetivo y neutral. Amás, tolos artículos tienen de ser verificables per terceres partes, polo qu'artículos sobre empreses pequeñes probablemente nun sían aceptables. Los enllaces esternos a organizaciones comerciales son aceptables si pueden sirvir pa identificar les empreses importantes venceyaes a ciertu tema. Amás, Wikipedia nun promociona nengún negociu y nun tien programes d'afiliación (ver Wikipedia:Spam).
  4. Foros de discutiniu. La idea principal de Wikipedia ye crear una enciclopedia. Puedes falar colos demás wikipedistes nes sos páxines d'alderique y resolver los problemes rellacionaos colos artículos nes páxines d'alderique respeutives, pero'l discutiniu nun tien de pasase a los propios artículos y tien de llindase a cómo ameyorar l'artículu, non al tema del mesmu.

Wikipedia nun ye un almacén d'enllaces, imaxes o archivos[editar la fonte]


Wikipedia nun ye un espeyu nin un almacén d'enllaces, imaxes o ficheros informáticos. Tol conteníu añadíu a Wikipedia puede editase pa incluyise na enciclopedia. P'añadir cualquier material, tienes de tar acordies con lliberalu pal so usu llibre por aciu l'[[WP:DA|esquema de llicenciamientu de Wikipedia.[1] Los artículos de Wikipedia nun son:

  1. Colecciones d'enllaces esternos o direutorios d'Internet. Nun hai nada d'incorreutu n'añadir enllaces útiles con conteníu relevante a un artículu; sicasí, les llistes escesives pueden empequeñecer l'artículu y amenorguen el propósitu de Wikipedia. Nos artículos sobre temes con munches páxines web d'almiradores, ye apropiáu incluyir un enllaz a un sitiu importante, marcando esti como tal (ver Wikipedia:Enllaces esternos).
  2. Colecciones d'enllaces internos, sacante les páxines de dixebra cuando'l títulu del artículu ye ambiguu, y p'anexos qu'ayuden cola organización de los artículos. Les llistes alfabétiques que nun añadan otra información más tienen de convertise en categoríes (ver Categoría:Wikipedia:Tresformar en categoría).
  3. Colecciones de material en dominiu públicu o d'otres fontes, como llibros enteros o códigu fonte de programes, documentos históricos, cartes, lleis, proclamaciones y otros materiales que namái son útiles si nun se cambien nin editen. Les copies completes de fontes primaries, como tables matemátiques, tables astronómiques o códigu fonte, tienen de dir a Wikiesbilla. Nun ye incorreuto utilizar material en dominiu públicu p'añadir conteníu a los artículos.
  4. Colecciones de fotografíes, imaxes o otros materiales multimedia. Si tas interesáu en presentar una imaxe, considera amestala a Wikimedia Commons.

Wikipedia nun ye un agospiamientu de páxines web, blogues o una rede social[editar la fonte]


Wikipedia nun intenta ser un sitiu p'agospiar páxines web personales, blogues o otres wikis. Les páxines de Wikipedia nun son:

  1. Páxines d'usuariu. Los wikipedistes tienen les sos propies páxines d'usuariu, pero utilícense pa dar información relevante pa trabayar na enciclopedia. Si desees faer una páxina web personal o un blogue, utiliza dalgunu de los munchos provisores gratuitos qu'esisten n'Internet. Les páxines d'usuariu nun tendríen de ser una rede social, sinón apurrir una capacidá de collaboración efeutiva.
  2. Almacén d'archivos. Xube namái los archivos qu'uses o tengas planiáu usar nos artículos de la enciclopedia; d'otra manera pueden desaniciase. Si quieres xubir material multimedia, tienes de faelo en Wikimedia Commons.

Wikipedia nun ye una colección d'información ensin criteriu[editar la fonte]

Wikipedia nun ye una colección ensin criteriu de datos informativos. Los artículos de Wikipedia nun son:

  1. Llistes d'entrugues frecuentes. Los artículos de Wikipedia nun tienen de ser llistes d'entrugues frecuentes coles sos respuestes (E+F, o FAQ poles sos sigles n'inglés). Nel so llugar, hai que da-yos el formatu afayadizu a la información qu'apurren, con una prosa neutral dientro del artículu apropiáu. Wikillibros pue ser útil pa los que tean interesaos en crear EMF.
  2. Llistes de temes asociaos llibremente como cites, aforismos o persones. Pa crear una llista de cites utiliza'l proyectu Wikicites. Sicasí, puede ser útil añadir dalguna cita o aforismu pa ilustrar el conteníu d'un artículu.
  3. Guíes de viaxe. Un artículu sobre París tendría de mentar puntos importantes como la Torre Eiffel o'l Louvre, pero non les direcciones y teléfonos d'hoteles o'l preciu d'un café nos Campos Elíseos. Esos conteníos seríen afayadizos pal proyectu Wikiviaxes.
  4. Conmemoraciones. Pue ser murniu cuando les persones muerren, pero Wikipedia nun ye un llugar pa honrales. Los personaxes de los artículos de Wikipedia tienen de tener una relevancia más allá de l'alcordanza cariñosa de les sos amistaes o familiares.
  5. Noticies. Wikipedia nun tien d'ufiertar noticies de primera mano (pa tal cosa esiste'l proyectu Wikinoticies). Wikipedia tien artículos enciclopédicos sobre asuntos de significancia histórica que son noticies na actualidá y pueden tar más actualizaos que la mayoría de les fontes referenciales, por cuenta de que pueden realizase ediciones pa incorporar nueva información. Ver Actualidá.
  6. Entraes xenealóxiques o entraes de guíes de teléfonos. Los artículos biográficos tienen de ser pa persones con dalgún tipu de relevancia, llogru o notoriedá. Un mediu pa midir esta relevancia ye l'usu de fontes esternes, tantu de dientro d'Internet como de fora. Les persones que nun algamen esta relevancia pueden mentase dientro d'otros artículos.
  7. Direutorios o entraes de direutoriu o discutinios sobro un tema. Por casu, nun artículu sobre una emisora de radio tienen d' escluyise por regla xeneral les llistes de socesos actuales, promociones, númberos de teléfonu, etc., anque pue ser aceptable mentar los socesos principales o les promociones. Amás, les páxines d'alderique asociaes con un artículu son pa falar sobre l'artículu, non sobre l'asuntu del artículu.
  8. Manuales d'instrucciones. Ente que Wikipedia contien descripciones de persones, llugares y coses, los artículos tienen d'omitir instrucciones, suxerencies o manuales. Esto inclui tutoriales, guíes de videoxuegos y recetes de cocina. El proyectu Wikillibros tien esa función. Hai que notar que nel espaciu de nomes Wikipedia sí puede haber manuales d'ayuda tocante a cómo editar en Wikipedia.
  9. Proyectos educativos. Magar contener enllaces a otros artículos y páxines de proyectos rellacionaos, los artículos de Wikipedia tienen una estructura na que l'oxetivu ye informar, non enseñar al llector una materia o tema concretu. Por ello, nun tienen d'incluyise exercicios, estructures en temarios o coses asemeyaes. El proyeutu de la Wikiversity tien esa función.

Wikipedia nun ye una bola de cristal[editar la fonte]

Wikipedia nun ye una colección d'especulaciones ensin comprobar. Tolos artículos sobro socesos futuros tienen de ser comprobables y la importancia del tema, amplio abondo pa merecer un artículu d'igual manera qu'un tema yá pasáu. En detalle:

  1. Los acontecimientos futuros previstos o programaos tienen d'incluyise si'l socesu ye relevante y tien una alta probabilidá d'asoceder. Los Xuegos Olímpicos de Rio de Janeiro 2016 o la Copa Mundial de Fútbol de 2018 sedríen temes apropiaos, pero los Xuegos Olímpicos de 2036 o la [[[Wikipedia:Artículu futuru|Copa Mundial de Fútbol de 2038]] non, porque inda nun hai fontes verificables.
  2. De la mesma, los elementos d'una llista predeterminada o un patrón sistemáticu de nomáu, que preasignen acontecimientos o descubrimientos futuros, nun son temes convenientes p'artículos, si namái se conoz información xeneral sobre ellos. Por casu, Llista de nomes de los ciclones tropicales ye enciclopédicu, pero la tormenta tropical Hazbleydy (2222) nun lo ye. Ciertes estrapolaciones, como los elementos químicos, antes del so aislamientu en llaboratoriu, suelen considerase enciclopédicos.
  3. Los artículos que presenten extrapolación, especulación, ya hestoria futura son fonte primaria y, por tanto, desavenientes. De xacíu, tien d'haber artículos sobre trabayos artísticos notables, ensayos ya investigación fiable qu'incorporen predicciones. Esto ye, un artículu de Star Trek, Gundam, Los Supersónicos o Futurama ye apropiáu; un artículu sobre les armes que vamos usar na III Guerra Mundial nun lo ye.

Ye apropiáu informar sobre'l discutiniu y los argumentos de les perspectives de futures propuestes y proyectos, o sobre si va asoceder un ciertu desenvolvimientu, incorporando referencies a esi discutiniu. Nun ye apropiáu incluyir idees propies o analises, por cuenta de la so condición de fonte primaria. Los artículos sobre productos qu'inda nun se llanzaron, como xuegos o películes, riquen un procuru especial pa nun convertilos en publicidá.

Wikipedia nun ta censurada[editar la fonte]

Wikipedia puede contener material que dellos llectores pueden considerar ofensivu y/o desaparente. Cualesquiera que llea Wikipedia puede editar un artículu y los cambeos amuésense automáticamente, ensin pasar por revisiones, polo tanto Wikipedia nun puede garantizar que los artículos o imaxes sían apropiaes pa menores d'edá o sigan ciertes normes sociales. De xacíu, el material tien de ser relevante pa la tema del que trata l'artículu.

Amás, magar les imaxes o términos ofensivos de vezu retírense al ser usaos de forma indiscriminada, nun lo son cuando s'utilicen en circunstancies enciclopédiques, tales como cites o ilustración d'artículos rellacionaos cola pornografía, los vezos sociales o l'anatomía humana. Amás, Wikipedia ríxese pola llei del estáu de Virxinia de los Estaos Xuníos, onde tán allugaos los sos sirvidores, y estes lleis podríen nun coincidir coles d'otros llugares.

Lo que la comunidá de Wikipedia nun ye[editar la fonte]

Wikipedia nun ye un campu de batalla[editar la fonte]

Espérase que cada usuariu se rellacione colos demás d'una manera civilizada, sele y con espíritu de cooperación. Nun faltes, acoses o amedranes a aquellos colos que tas en desacuerdu. Nel so llugar, avérate al asuntu prudentemente, y entabla un discutiniu educáu.

Si un usuariu actúa de manera incivil, faltando, ensin cooperar, amenazando o acosándote, ello nun ye una escusa p'actuar de la mesma forma. Respuende a los fechos ya inora les circunstancies desagradables.

Amás, nun crees o camudes artículos namái pa sofitar los tos argumentos. Nun utilices Wikipedia pa faer amenaces llegales contra'l proyectu, los wikipedistes o la Fundación Wikimedia. Esisten otros medios pa comunicar problemes llegales.[2] Les amenaces nun se toleren y pueden acabar na espulsión.

Wikipedia nun ye un esperimentu d'anarquía[editar la fonte]

Wikipedia ye llibre y abierta, pero llenda dambos términos cuando interfieren col propósitu de crear una enciclopedia. Poro, Wikipedia en principiu nun ye un foru de llibertá d'espresión. El fechu de que Wikipedia sía un proyectu abiertu y autónomu nun significa qu'el so propósitu sía esplorar la viabilidá de comunidaes anarquistes. El nuesu propósitu ye crear una enciclopedia, nun probar les llendes del anarquismu. Ver meta:Power structure (n'inglés).

Wikipedia nun ye una democracia[editar la fonte]

Wikipedia nun ye una democracia.[3] L'oxetivu principal ye construyir una enciclopedia. Anque en dellos procesos s'empleguen votaciones, polo xeneral, y especialmente na edición de conteníos, prefierse'l discutiniu pa buscar el consensu.

Wikipedia nun ye una burocracia[editar la fonte]

Wikipedia nun ye'l terrén pa esperimentar un sistema xurídicu. Tien d'evitase l'acumuladura d'instrucciones detallaes. Los desalcuerdos tienen de solucionase al traviés del diálogu o l'alderique, ya'l consensu, en llugar d'apegase puramente a regles y procedimientos. Tien de siguise l'espíritu y non la lletra de les polítiques y normes.

Wikipedia nun ye una obligación[editar la fonte]

Wikipedia ye una comunidá de voluntarios, poro, nun rique que los wikipedistes dean más tiempu y esfuerzu de lo qu'ellos pueden y deseen dar. Por favor, enfócate na meyora de la mesma enciclopedia, en llugar d'esixir más d'otros wikipedistes. Los editores son llibres de tomar un descansu o de dexar Wikipedia en cualquier momentu.

Notes[editar la fonte]

  1. Esistía, por embargu, una cierta cantidá d'imaxes que nun yeren llibres. Esto asocedía enantes de la nueva política d'aceptar sólo imaxes llibres y utilizar Wikimedia Commons.
  2. Si crees que se violaron los tos derechos llegales, puedes utilizar la llista de corréu afayadiza, comunicate cola Fundación Wikimedia o, en casos de violación de derechos d'autor, ver Wikipedia:Páxines sospechoses de violar los derechos d'autor o utilizar la llista de corréu.
  3. «Esto tendría d'imprimise y repartise a cada persona del planeta. Creo que voy entamar una nueva organización ensin porgüeyu pa facelo. Wikipedia va a dar a toos una enciclopedia. La nueva organización va dar a tol mundu un pedazu de papel esplicando: ye una enciclopedia, nun ye un esperimentu de democracia. “Somos” un gran esperimentu social, por supuesto. Pero non principalmente» Jimbo Wales

Polítiques rellacionaes[editar la fonte]

Ensayos sobro esta política o sobro temes rellacionaos[editar la fonte]

Ver tamién[editar la fonte]