Sanshou

De Uiquipedia
Saltar a: navegación, buscar
Sanshou
Sanshou.jpg
Tamién Sanda
Enfoque Híbridu
País d’orixe Flag of the People's Republic of China.svg China
Prauticantes famosos Liu Hailong, Bao Li Gao, Zhang Tie Quan, KJ Noons, Patrick Barry, Cung Le
Paternidá Dellos estilos de wushu, Shuai Jiao, Chin Na
Deporte olímpicu Non
Sitiu oficial http://www.iwuf.org

Sanshou (散手, sǎnshǒu: “manes llibres”) o Sanda (散打, sǎndǎ: “combate llibre” o “combate ensin torgues”) ye un sistema chinu de defensa personal a mano vacía y un deporte de combate. Nun se considera como un estilu independiente, sinón como una de les dos costeres del entrenamientu de les artes marciales chines, davezu enseñada xuntamente col entrenamientu de los taolu (formes). Sicasí, como parte del desarrollu del wushu deportivu, el gobiernu de la República Popular China vieno desendolcando un programa estándar pal sanshou. Ye precisamente a esti programa estándar al que s’aplica davezu’l términu "Sanshou".

Esti programa desendolcóse dende les esperiencies de los militares chinos na distancia cuerpu a cuerpu y nel combate a mano vacía cola basa de les artes marciales chines tradicionales. Ye un programa xenéricu que s’estrema en distintes formes, al desendolcar el gobiernu chinu una versión civil pa la defensa personal y como deporte.

Carauterístiques[editar | editar la fonte]

El programa xenéricu prauticáu nes escueles modernes de wushu compónse de dellos estilos de combate de les artes marciales tradicionales chines, pero que sobre too se basen na eficacia científica. El Sanshou compónse d’aplicaciones de les artes marciales chines incluyendo la mayoría de los aspeutos del combate, como golpes o agarres, anque cuando’l Sanshou se desarrolló como deporte punxéronse torgues por razones de seguridá asina como pa promovelu como deporte non violentu. Por casu nun se permite golpiar detrás de la cabeza, na columna o nos xenitales, y suspéndese’l combate cuando ún de los lluchadores cai al suelu. Ensin embargu munches escueles, lo mesmo tradicionales que modernes, prautíquenlu como un sistema al contautu ensin torgues, y solamente adauten l’entrenamientu a les regles de la competición enantes del tornéu. Los torneos de Sanshou son una de les disciplines reconocíes pola Federación Internacional de Wushu.[1]

Pa la hestoria de les competiciones de Sanshou quedaron los combates llibres o lei tai onde nun había regles. Ensin embargu’l sanshou desendolcóse como alcuentru competitivu tamién nel exércitu, onde estos combates teníen llugar davezu ente los soldaos pa probar y prauticar los conocimientos, téuniques y habilidá nel combate llibre. Foron desendolcándose regles, y adoptándose l’usu de proteiciones, guantes, etc. Orixinalmente usábalu’l Kuomintang na primer academia militar moderna en Whampoa nos años 1920. Más tarde tamién lu adoptó como métodu l’Exércitu Popular de Lliberación de China.

Pue considerase’l Sanshou como una síntesis de téuniques de llucha tradicionales chines dientro d’un sistema más amorfu, y davezu enséñense al empar los estilos chinos tradicionales con téuniques, teoría y métodos d’entrenamientu del Sanshou que deriven d’ellos. El Sanshou pon l’énfasis n’habilidá pal combate real.

Como sistema de defensa personal ensin armes y de combate cuerpu a cuerpu, el Sanshou inclúi ti (pataes), da (puñetazos), shuai (Shuai Jiao), y na (Chin Na). Como deporte’l Sanshou da mui bien d’importancia a les proyeiciones.[2] Una de les sos téuniques más conocíes ye la "kick catch", que ye cuando unu patia y l’otru gárra-y la pierna y de secute failu cayer mientres ta sofitáu nuna pierna.

Deporte[editar | editar la fonte]

Como deporte’l Sanshou prautícase en torneos, davezu xunto a pruebes de taolu nes competiciones de wushu. Por razones de seguridá, delles téuniques de la versión de defensa personal, como coldazos, estrangulamientos y llaves a les articulaciones tan torgaes nos torneos. Los competidores pueden ganar por KO (fuera de combate) o por puntos, que se ganen por golpes que cuten nel cuerpu o la cabeza, por proyeutar al contrariu o, cuando la competición se fai nuna plataforma “lei tai” elevada, por sacalu de la plataforma. A los lluchadores namái los dexen tar garraos unos pocos segundos. Si nun suelten l’agarre, y nengún llogra proyectar al oponente nel tiempu acutáu, l’árbitru dixébralos.

Nos Estaos Xuníos, les competiciones tienen llugar en “rings” de boxéu o na plataforma elevada lei tai. Los lluchadores "amateur" lleven equipamientu proteutor. Nesti "Sanshou amateur" valen les pataes, puñetazos y proyeiciones. Les regles del llamáu "San Da" tamién permiten rodiyazos al cuerpu. Una competición que tien llugar en China, llamada "Rei del Sanda", faise nun ring asemeyáu al de boxéu en diseñu, pero más grande. Como profesionales, nun lleven equipamientu proteutor sacante los guantes, proteutor xenital y protector bucal, y permítense los rodiyazos (inclusive a la cabeza) arriendes de les pataes, puñetazos y proyeiciones.

Dalgunos lluchadores de Sanshou tienen participao en torneos de llucha del tipu del K-1 y Shoot Boxing. Suelen tener ésitu, especialmente en competiciones de Shoot Boxing, que ye más paecíu al Sanshou. Por aciu de les regles de la competición de kickboxing, los lluchadores de Sanshou tan arreyaos por más torgues de lo avezao. Los competidores más famosos de la principal organización de competiciones de MMA, l’Art of War Fighting Championship, cuasi siempre suelen venir del wushu.

El Sanshou tiense visto en munches competiciones d’estilu contra estilu. Davezu’l Muay Thai opónse al Sanshou, neto que’l Kárate, el Kickboxing y el Taekwondo.

Magar que nun ye tan frecuente, dellos prauticantes de Sanshou tienen participao tamién nes competiciones de MMA retresmitíes nos Estaos Xuníos.

Competidores de nomadía[editar | editar la fonte]

Ente los lluchadores chinos de Sanshou de nomadía tán Yuan Yubao, Bao Li Gao y Liu Hailong, tamién conocíu como "El Conquistador del Muay Thai" desque venciera a munchos de los meyores lluchadores de Muay Thai.

Ente los lluchadores de Sanshou más conocíos nos Estaos Xuníos tán el campeón de la IKF (Federación Internacional de Kickboxing y antiguu campeón de los pesos medios de Strikeforce, Cung Le; Jason Yee,[3], Rudi Ott,[4], Marvin Perry,[5] y Max Chen.[6] Otros lluchadores con base de Sanshou que participaron en MMA son por exemplu KJ Noons, James Fanshier,[7] Patrick Barry, y el lluchador d’UFC Zhang Tie Quan.

Muslim Salihov, el campeón rusu del mundu y d’Europa, venció a cuatro de los meyores lluchadores chinos de distintes categoríes de pesu, incluyendo al campeón chinu de la categoría de más de 90 kg, y convertióse nel primer non chinu en reclamar el títulu de "Rei del Sanda ".

Referencies[editar | editar la fonte]

  1. Páxina oficial de la Federación Internacional de Wushu
  2. Liang, Shou Yu and Tai D. Ngo. Chinese Fast Wrestling for Fighting: The Art of San Shou Kuai Jiao Throws, Takedowns, & Ground-Fighting. YMAA Publication Center, 1997 (ISBN 1-886969-49-3)
  3. [1]
  4. Rudi Ott's Bio
  5. Marvin Perry's web site
  6. http://www.williamccchen.com/maxcchen.htm
  7. James Fanshier BIO

Enllaces esternos[editar | editar la fonte]