Sísifu

De Uiquipedia
Saltar a: navegación, buscar
Mitoloxía Griega
Esti artículu forma parte de la serie
Mitoloxía Griega
Dioses

Divinidaes primordiales
Dioses ctónicos
Titanes
Dioses olímpicos
Divinidaes alegóriques
Ninfas, Semidioses y Criatures

Elencos

Personaxes

Tamién

Xenealoxía
Equivalencies cola Mitoloxía romana
Xeografía

Sísifu yera na Mitoloxía Griega el fundador y rei d'Éfira, asina como esposu de Merope. Fíu d'Eolu y Enarete foi'l padre d'Odiseu con Anticlea; tamién foi padre del marín Glaucu cola so muyer.

Yera consideráu'l más astutu ente los homes y tanto foi asina que cuando la Muerte (Tánatos) llegó pa buscalu, decidió apresala con grilletes; poro, naide morría nel Mundiu hasta qu'Ares la lliberó y unvió a Sísifu al Hades. Enantes de marchar dixo a la so muyer que nun fixera ofrendes a los dioses pola so muerte, asina cuando llegó, en viendo que la so muyer cumplía'l mandáu, convenció a Hades pa que lu dexara tonar al mundiu los vivos pa convencer a la so esposa. Pero namái regresar nun quixo volver al Hades hasta qu'Hermes foi buscalu y devolviólu pal inframundiu.

La so conderga, ensin dulda la más famosa de la mitoloxía, consistía n'emburriar una piedra hasta lo más cimero d'un monte y cuando llegaba, volvía a cayer, teniendo que facer esti trabayu per tola eternidá. Enxamás nun se supo bien cuálu fuera'l pecáu cometíu pa que-y aplicaren esti castigu pero paez ser que desveló a los humanos los designios de los dioses.

La conderga de Sísifu foi, y inda ye, un tema recurrente na filosofía y lliteratures occidentales, como, por exemplu, el llibru d'Albert Camus "El mitu de Sísifu", onde l'escritor francés lu punxo de símbolu pa lo que llamaba, "el sentimientu absurdu": la llucha del home escontra un mundiu que nun pescancia.

Sísifu nel Avernu, de von Stuck.