Porto-Novo

De Uiquipedia
Saltar a: navegación, buscar
Llocalización de Porto-Novo dientro del país

Porto-Novo (tamién conocida como Hogbonou y Adjacé) ye una ciudá de Benín, capital del Dahomey francés demientres la época colonial y del país dende la so independencia. El so conceyu (commune) comprende una estensión de 110 km² y tenía, nel 2002, una población de 223.552 habitantes.[1]

Porto-Novo ye un puertu na bahía homónima, que ye parte del golfu de Guinea, nel estremu suroriental del país. Ye la segunda ciudá mayor del país, y, magar que ye la so capital, la ciudá de Cotonou ye mayor y más importante dende'l puntu de vista cultural y políticu, una y bones ellí ta la sé del gobiernu.

La contorna de la ciudá produz aceite de palma, algodón y kapok. Na bahía ú s'asienta la ciudá sácase, dende la década de 1990, bien de petróleu, que ye anguaño una de los principales productos d'esportación del país.

Historia[editar | editar la fonte]

El reinu de Porto-Novo yera, primero de la llegada de los portugueses, tributaria del reinu yoruba d'Oyo; entá viven bien de yorubas na ciudá anguaño. La ciudá foi fundada, seique, na segunda mitá del sieglu XVI pol lexendariu rei Te-Agdanlin de Allada. El so nome vién-y del portugués, y deriva del so calter de puertu pal comerciu d'esclavos.

En 1863 los británicos, que teníen intereses comerciales en Nixeria, bombardearon la ciudá, lo que convenció al reinu de Porto-Novo de la necesidá de pidir protección a Francia. El vecín reinu d'Abomey opúsose a la presencia francesa na rexón, y españó la guerra ente los dos reinos. En 1883 Porto-Novo foi incorporáu a la colonia francesa de Dahomey, de la que se convirtió en capital en 1900. Los reis de Porto-Novo siguieron mandando na ciudá, oficial y extraoficialmente, hasta que morrió'l rei caberu, Alohinto Gbeffa, en 1976. Dende 1908 el rei tenía'l títulu oficial de Chef supérieur.

La ciudá recibió bien d'inmigrantes afrobrasileños que, una y bones algamaron la llibertá en Brasil, volvieron pa África. A resultes d'ello hai muncha influencia de la gastronomía y la arquitectura na vida cultural de la ciudá.

Sitios d'interés[editar | editar la fonte]

Parlamentu (Palais du Gouverneur) de Benín

Ente los edificios de la ciudá rescamplen, ente más otros, los que vienen darréu:

  • El Muséu etnográficu de Porto-Novo, que tien una importante colección de máscares yoruba, y tamién oxetos rellacionaos cola historia de la ciudá y el país.
  • El Palaciu del rei Toffa, nomáu tamién Palaciu Real y Muséu Honmé (Le Musée Honmé et le Royal Palace), muséu qu'enseña como yera la vida de los reis nes monarquíes africanes.
  • La Jardin Place Jean Bayol, gran plaza na que s'afaya la estatua del primer rei de Puertu Nuevu.
  • El Muséu da Silva d'historia de Benín, con materiales rellacionaos cola vuelta de los afrobrasileños.
  • El Palaciu del gobernador (Palais du Gouverneur), sé de la cámara llexislativa del país.
  • La gran mezquita de Puertu Nuevu, asitiada nun edificiu d'estilu brasileñu que primero yera una ilesia.
  • El Institutu d'Altos Estudios de Benín.
Gran mezquita de Porto-Novo


Referencies[editar | editar la fonte]

  1. Estensión y población de los conceyos de Benín.