Muséu internacional de la gaita

De Wikipedia
Saltar a navegación Saltar a la gueta
Muséu internacional de la gaita
Muséu Internacional de la Gaita.JPG
Llocalización
Historia y usu
Apertura1965
Web oficial
Cambiar los datos en Wikidata
Casa de los González de la Vega, actual Muséu internacional de la gaita

El muséu internacional de la gaita allúgase dientro'l pueblu d'Asturies en Xixón, Asturies. Esti espaciu, dependiente del conceyu de Xixón, cuenta con una interesante coleición de cornamuses procedentes de munchos países d'Europa y Asia.

Historia[editar | editar la fonte]

El Muséu de la Gaita fundólu l'Ayuntamientu xixonés en 1966, partiendo d'una propuesta del entóncenes conceyal Daniel Palacio. Nún primer momentu instalóse nuna sala del antiguu Institutu Xovellanos cola función d'enseñar les diferentes families d'esti instrumentu y la so espansión nel tiempu y nel espaciu. Los sos fondos yeren mínimos: cerca d'una docena d'instrumentos y una coleición de fotografíes. En 1973 ye nomáu conservador del muséu Rafael Meré, quien entama a ampliar la coleición. En 1975, la coleición treslládase al Pabellón Municipal de la Feria Muestres, y llueu, a la casa de los Valdés nel Pueblu d'Asturies En 1979, Luis Argüelles, entóncenes direutor del Pueblu d'Asturies, decide treslladar los instrumentos y el restu de los fondos a la casa de los González de la Vega, onde s'asitió definitivamente. Esti edificiu, treslladáu en 1970 al muséu, "mandólu facer el señor don Antonio González de la Bega" en 1757, pa solar de la so familia, al llau de la ilesia parroquial de Serín (Xixón); presenta elementos carauterísticos de l'arquiteutura civil asturiana del sieglu XVIII, como'l gran corredor ente los dos cuerpos de la fachada principal. La casa tenía una capiella que daba al portal d'entrada.

Esposición[editar | editar la fonte]

Nos caberos años, esti espaciu musegráficu vio aumentar bonablemente los sos fondos. Presenta una esposición permanente de gaites procedentes de toles aries xeográfiques qu'utilicen o utilizaron esti instrumentu: norte d'Africa, Europa oriental y central y, especialmente, Francia, Reinu Xuníu y Península Ibérica (Asturies, Galicia, Aragón, Mallorca, Tras-os-Montes). La visita al muséu cuenta col apoyu d'un programa informáticu que controla la lluz y el soníu, guiando al visitante al traviés la pallabra y la música. La gaita asturiana ye oxetu d'una sala na que se desplica la so historia y el papel que desempeñó na sociedá tradicional. Puen almirarse gaites construyíes dende finales del sieglu XIX por artesanos como Manuel Alvarez, Cogollu, Antonio Solares, Sebroyu, Marcelo del Fresno, etc. La esposición permanente conclúi con una sala dedicada a los restantes instrumentos de la tradición musical asturiana, dende los más cenciellos, fechos polos propios músicos, hasta los sonadores y reproductores mecánicos popularizaos a finales del sieglu XIX (pianola, gramófonu, etc.). La sala polivalente, asitiada na planta baxa del muséu, acueye esposiciones temporales y otros actos rellacionaos col mundu de la música tradicional, como conciertos, simposios y conferencies. El direutor actual del muséu ye Juan Alfonso Fernández García, especialista universitariu n'Educación d'Adultos, llicenciáu en Filoloxía Hispánica pola Universidá d'Uviéu, gaiteru y zanfoñeru y collaborador en distintos grupos de música tradicional y coleutivos d'investigación etnográfica.

Ver tamién[editar | editar la fonte]