Luis Fernández de la Vega

Luis Fernández de la Vega
Vida
Nacimientu	Llantones (es) , 1601
Nacionalidá	España
Residencia	Principáu d'Asturies
Muerte	1675 (73/74 años)
Estudios
Llingües falaes	castellanu
Oficiu	escultor

Luis Fernández de la Vega (1601, Llantones ^(es)  – 1675) foi un imaxineru y escultor asturianu.

Biografía

Yera fíu d'un fidalgu, treslladándose a Valladolid por cuestiones de pleitos familiares. Allí, folgáu, establecióse en casa d'un escultor, de los tantos que tenía la ciudá gracies a los talleres que fomentara la Corona. Aunque ensin pruebes documentales, suponen Ceán y otros biógrafos que Fernández de la Vega trabayó na so mocedá nel taller d'imaxinería del conocíuGregorio Fernández de Valladolid. Esta información tien l'aval de la indudable influencia que nes obres del asturianu se ve de les del artista vallisoletano. Tamién Xovellanos ye de la opinión de que Fernández de la Vega, si non discípulu direutu, sí tuvo en rellación col obrador de Hernández y otros maestros de Valladolid, dada la comunicación frecuentísima que entós existía ente Asturies y Valladolid por depender el Principáu, no xudicial, d'aquella Real Chancillería. Según el mesmu Xovellanos, la influencia de Juan de Juni, de Cano, d'Hernández y d'otros maestros, evidencia que'l imaxineru xixonés tuvo dalguna rellación colos talleres d'aquéllos.

Después d'aprender l'oficiu regresó a Asturies, estableciéndose n'Uviéu con taller propiu y n'Asturies vivió permanentemente, ensin más desplazamientos qu'ocasionales viaxes per breves temporaes. Consta documentalmente qu'en 1636 yera xuez noble de Xixón y qu'en 1629 casara en la citada villa con María d'Argüelles. Yera persona de notoria fidalguía y buena posición nel país.

Tuvo taller en Xixón, Samartín d'Anes (Siero) y depués n'Uviéu, nel barriu de la Puerta Nueva. Con él trabayó otru notable escultor asturianu, Francisco González, que tamién tuviera taller propiu na capital d'Asturies. La obra de Fernández de la Vega foi más extensa de la que güei se conoz, pues, arriendes de les obres de so tovía non identificaes fuera d'Asturies, la guerra de la Independencia, la desamortización y l'aición iconoclasta de los años trenta del sieglu XX, destruyó una parte de los sos retablos y escultures.

La so obra pue reconocese per toa Asturies. En Xixón alcuéntrase'l retablu del santuariu de Contrueces; na catedral d'Uviéu: los retablos de les capilles de Santa Bárbola y los Vixiles, l'altar de San Martín; la estatua orante de Vixil de Quiñones y imáxenes de San Roque, la Concepción y Santa Teresa de Xesús, asina como de les ilesies de San Vicente y San Pelayo. Otres obres de so destacables atópense en Cangas del Narcea, Salas, Sotu d'Aller, Villaviciosa y, fuera d'Asturies, na provincia de Valladolid y Lleón, singularmente en Medina del Campo.