José Antonio Fernández Vega

José Antonio Fernández Vega
gobernador civil gobernador civil de Málaga gobernador civil de Lugo
Vida
Nacimientu	Llanes, 1891
Nacionalidá	España
Muerte	Málaga, 18 de mayu de 1942 (50/51 años)
Estudios
Llingües falaes	castellanu
Oficiu	políticu
Creencies
Partíu políticu	Partíu Republicanu Radical Socialista

José Antonio Fernández-Vega (1891, Llanes – 18 de mayu de 1942, Málaga) foi un médicu y políticu asturianu, Gobernador Civil de la provincia de Málaga mientres el llevantamientu del 18 de xunetu que dio llugar al empiezu de la Guerra Civil Española.

Casáu y con seis fíos, José Antonio Fernández-Vega yera militante d'Izquierda Republicana y Gobernador Civil de Lugo dende les eleiciones de febreru de 1936. Permaneció nesti puestu hasta xunu del mesmu añu, cuando foi nomáu Gobernador Civil de Málaga. Nesta ciudá tuvo que faer frente al llevantamientu militar y a les milicies que tomaron el poder tres el fracasu del llevantamientu. Tamién foi un médicu bien respetáu en Ponteareas, (llugar onde una cai tien el so nome n'homenaxe a él) llegando a atender de baldre a xente qu'escarecía de dineru pa paga-y.

A mediaos de setiembre de 1936 foi cesáu del so cargu pol Ministru de la Gobernación, Valentín Galarza Morante, por cuenta de unos rumores que lu acusaben d'habese apropiáu de fondos públicos. Torna entós a Asturies cola so familia, onde s'ocupa'l cargu de direutor del hospital de Llanes mientres un mes hasta que ye destituyíu por xenerar rocea ente los dirixentes del Frente Popular, según un informe de la Guardia Civil de 1941. Sale entós para Francia, pero al escarecer de recursos, torna a España, siendo nomáu Médicu de la Subsecretaría d'Armamentu en Barcelona hasta la cayida de Cataluña, cuando se ve obligáu a exiliase de nuevu en Francia.

Acoyíu nun campu de concentración francés, foi deteníu pola Gestapo el 10 de xunu de 1940 xunto a otres personalidaes como Lluis Companys o José Villalba. Ye entós treslladáu a la Prisión Provincial de Málaga pa ser xulgáu sobre la base de les llistes qu'apurre la mesma prisión provicial según les cualos fueron deteníes nel so nome 371 persones de les que 275 fueron executaes por aciu "saques".

Nel so defensa, Fernández-Vega alegó que nunco supo nada de les saques hasta una vegada llevaes a cabu y que, na midida de les sos posibilidaes, rescató a un gran númberu de deteníos, incluyíos militares y sacerdotes, a los qu'apurrió pasaportes y ayudó a escapar de la ciudá. Foi condergáu a muerte y fusiláu nel campusantu de San Rafael, onde permanez el so cuerpu nuna fuesa común.

Trayeutoria

Predecesor: ?

Gobernador Civil de Málaga 02-06-1936-10-12-1936

Socesor: Francisco Rodríguez Rodríguez

Bibliografía

• Juan Antonio Ramos Afitaos: José Antonio Fernández Vega, gobernador civil de Málaga (xunu a setiembre de 1936). Jábega, ISSN 0210-8496, Nº. 90, 2002 (Exemplar dedicáu a: Sostenibilidá y mediu ambiente na Provincia de Málaga) , páxs. 108-121.

Enllaces esternos

• Datos: Q9013575