Gaspar García Laviana

De Wikipedia
Saltar a navegación Saltar a la gueta
Gaspar García LavianaPicto infobox character.png
Gaspar Garcia Laviana by puigreixach.jpg
Vida
Nacimientu Samartín del Rei Aurelio1941
Nacionalidá Bandera d'España España
Fallecimientu

11  d'avientu de 1978

(36/37 años)
Estudios
Llingües castellanu
Oficiu
Oficiu sacerdote y escritor
Creencies
Relixón Ilesia Católica
Cambiar los datos en Wikidata

Gaspar García Laviana (Samartín del Rei Aurelio,1941 - † 11 d'avientu de 1978), conocíu como Comandante Martín, foi un sacerdote y guerrilleru asturianu que lluchó xunto a los sandinistes nicaraguanos.

Biografía[editar | editar la fonte]

Nació en 1941 nel pueblu de Les Roces, cerca de L'Agueria de Carrocera (conceyu de Samartín del Rei Aurelio), emigrando posteriormente al cercanu pueblu mineru de Tuilla (conceyu de Llangréu). Estudió bachilleratu en Valladolid y Filosofía y Teoloxía en Logroño, onde s'ordenó sacerdote na orden del Sagráu Corazón. Celebra la so primera misa nel añu 1966 na parroquia del so pueblu natal. Posteriormente, treslládase a Madrid onde terminó un cursín de socioloxía. Aquí mesmo fizo compatible'l so llabor sacerdotal, na parroquia de San Federico, col trabayu d'obreu nuna carpintería del barriu. A lo llargo de los tres años que permaneció en Madrid trabayó muncho cola mocedá y con grupos de sacerdotes obreros, nun afán d'implicase cristianamente na marcha social y política del país.

En 1969 marchó a Nicaragua pa trabayar como misioneru en Tola. Ellí trabayó colos campesinos locales tomando contautu intensamente coles dificultaes qu'afrontaben a diario. Con frecuencia visitaba a los enfermos, siendo llamáu munches veces ante la falta de medios médicos a disposición de los campesinos. Criticó duramente la práutica del secuestru de les moces que posteriormente yeren obligaes a exercer la prostitución, secuestros que yeren amparaos pol exércitu del dictador Somoza.

García Laviana expresó'l so desacuerdu na opresión de los campesinos probes y la so marxinación na sociedá en varios poemes que fueron publicaos como una colección en 1979 les Canciones de Amor y Guerra; siendo ésti'l primer llibru asoleyáu pol Ministeriu de Cultura del gobiernu sandinista.

Como resultáu de toles sos crítiques y les sos denuncies ante la corrupción y la inxusticia del réxime somocista, foi acusáu de ser simpatizante comunista. En 1977 García Laviana recibía amenaces telefóniques y yera seguíu por axentes de Somoza pa comprobar les sos actividaes. Actividaes que consistíaen n'ayudar a los sandinistes actuando como corréu, transportando xente y, principalmente, educando a los campesinos pa que fueren capaces de comprender la situación na que s'atopaben por sí mesmos.

Esti cura asturianu taba influenciáu pol espíritu de la Teoloxía de la Lliberación que ponía en llugar preferencial l'acción pastoral a los probes. Finalmente acabó tomando les armes al entender qu'un cambiu políticu pacíficu nun ayudaría a esaniciar les terribles necesidaes que veía tolos días en Nicaragua. Taba decepcionáu cola xerarquía nicaragüense, que falló nel so discursu a favor de los probes y oprimíos. Aunque nunca perdonó la violencia, vio nella l'únicu mediu pa que los probes de Nicaragua fueren lliberaos de la so opresión.

Gaspar García Laviana morrió'l 11 d'avientu de 1978 en combate dirixiendo la columna “Benjamín Zeledón”. D'él dicíase que yera “el primeru n'entrar en combate y l'últimu en retirase”.

Honores[editar | editar la fonte]

  • En Nicaragua hai hospitales, escueles y biblioteques que recuerden el so nome.
  • Una importante avenida de la ciudá de Xixón tamién lleva´l so nome.
  • En Tuilla (Llangréu) descubrióse en 2008 un monumentu a Gaspar García Laviana.
  • Na so llocalidá natal de Les Roces (Samartín del Rei Aurelio) descubrióse en setiembre de 2009 una placa na so alcordanza.