Favila

De Wikipedia
Saltar a: navegación, buscar
Llibru dixitalizáu por Google[1].

Favila (o Fáfila) d'Asturies ( - 739) foi'l segundu monarca del Reinu d'Asturies, y asocedió al so padre Pelayu al mandu del reinu d'Asturies.[2] Tomó'l nome del so güelu paternu, el duque Favila.

Biografía[editar | editar la fonte]

Fíu de Don Pelayu, tamién conocíu pol nome de Fáfila, gobernó «dos años, siete meses y diez díes» dende l'añu 737 hasta'l 739.[2] Según la Crónica rotense, Favila morrió mozu con un osu cuando taba de cacería,[2][lower-alpha 1] anque tamién pudo ser un asesinatu políticu, cosa que yera frecuente naquella época. Tamién s'albidra que la llucha col osu fuera una especie de ritu de virilidá, una de les pruebes de valor de normal esixíes a la nobleza de la dómina. Foi un gran amante de les caceríes, lo que fai más creible la hestoria que diz que lu espedazó un osu al qu'agafó imprudentemente. Desdexó los asuntos d'estáu al nun tener alderiques colos árabes qu'engardíen daquella en Francia y asina lo reflexa la Crónica sebastianense que diz que Favila «nun fixo nada digno de la hestoria».[2]

La elección de socesor recayó nel que reinaría como Alfonsu I d'Asturies, casáu con Ermesinda o Hermenesinda, hermana de Favila, fía de Don Pelayu y de la reina Gaudiosa. Una situación asemeyada diba producise cola cayida de la dinastía Astur-Llionesa, cola desapaición del so últimu rei Bermudu III de Llión, sustituyida pola dinastía Ximena de Pamplona, por derechu filial hereditariu al traviés del matrimoniu cola hermana del monarca fináu.

Sepultura[editar | editar la fonte]

Dempués de la so muerte, el cadabre del rei Favila, según refier el cronista Ambrosio de Morales, recibió sepultura na ilesia de la Santa Cruz de Cangues d'Onís, que'l monarca ordenara alzar xunto cola so esposa, la reina Froiluba.[3]Según les Cróniques Asturianes, hubo una llábana, d'época posterior, cola siguiente inscripción:[2]

Cquote1.svg Seya agradable a Cristu esta ilesia pol troféu de la cruz, que'l so siervu Favila edificó con probada fe, con Froileva la so muyer y los sos fíos, los que, pol to merecimientu, oh Cristu, tengan cumplida gracia y después d'esta vida misericordia eterna. Cquote2.svg

Na mesma ilesia, según refier Morales, recibió sepultura la so esposa la reina Froiluba, anque los restos mortales de dambos esposos nun se caltienen actualmente.[lower-alpha 2]

Ver tamién[editar | editar la fonte]

Notes[editar | editar la fonte]

  1. Esto asocedió según la tradición nel llugar onde anguaño ta allugada l'aldea de Llueves, nun monte averáu a Cangues d'Onís. D'esta lleenda vien el dichu, «espabila, Favila, que vien l'osu», col que s'afala al oyente a entainar una aición.
  2. El padre Flórez, nes sos Memorias de las Reynas Catholicas (1790), atribuye a Favila una fía llamada Favinia que casaría col duque Luitfred III de Suevena. Esa fía nun existió nin ta documentada. El padre Flórez basóse nun manuscritu de San Otón, llamáu Genealogía, que contien xenealoxíes falses y que foi citáu polos eruditos de los sieglos xvii y xviii.[4]

Referencies[editar | editar la fonte]

  1. "Retratos de los Reyes de España desde Atanarico hasta nuestro católico monarca don cárlos III" En castellanu
  2. 2,0 2,1 2,2 2,3 2,4 Martínez Díez, 2005, p. 71.
  3. Arco y Garay, 1954, pp. 130-131.
  4. Salazar y Acha, 2013, p. 276.

Bibliografía[editar | editar la fonte]

  • Arco y Garay, Ricardo del (1954). Sepulcros de la Casa Real de Castilla. Instituto Jerónimo Zurita. Consejo Superior de Investigaciones Científicas.
  • Barrau-Dihigo, L. (1989). Historia política del reino Asturiano (718-910). Silverio Cañada. ISBN 84-7286-273-9.
  • Martínez Díez, Gonzalo (2005). El Condado de Castilla (711-1038): la historia frente a la leyenda, 2 tomos. ISBN 84-9718-275-8.
  • Salazar y Acha, Jaime de (2013). «Reflexiones e hipótesis sobre algunas incógnitas genealógicas de la antigua dinastía asturleonesa», Boletín de la Real Academia de la Historia. Real Academia de la Historia, 275-296. ISBN 978-84-8951241-2.
  • Valle Poo, Francisco (2000). El solar de un Viejo Reino (Cangas de Onís-Covadonga-Picos de Europa), 1ª, Ediciones Nobel S.A.. ISBN 84-8459-004-6.

Enllaces esternos[editar | editar la fonte]


Emblema del Reino de Asturias.svg Reinu d'Asturies (718-925)
Predecesor:
Pelayu
Rei d'Asturies
737 - 739
Socesor:
Alfonsu I