Eva Cassidy

De Wikipedia
Saltar a: navegación, buscar

Eva Marie Cassidy (Oxon Hill, Washington DC, 2 de febreru de 1963 - Bowie, Maryland, 2 de payares de 1996) foi una cantante de jazz y soul. Almiradora de Aretha Franklin, Ella Fitzgerald y Llinda Ronstadt, el so estilu melódicu comparóse col de Nancy Wilson y cuenta con almiradores declaraos como Roberta Flack, Shirley Horn, Sting, Mick Fleetwood, Chris de Burg y Paul McCartney. Ye considerada como una de los meyores cantantes del sieglu XX.

Biografía[editar | editar la fonte]

D'antepasaos alemanes ya irlandeses, dende bien pequena amosó interés y talentu pa la pintura y la música. El so padre y el so hermanu yeren músicos aficionaos y Cassidy tuvo como primeres influencies el folk de Bob Dylan, Pete Seeger y Buffy Sainte-Marie. A los nueve años aprendió a tocar la guitarra y empezó a tocar p'amigos y familiares, magar Eva nunca amosó una ambición profesional. Mientres l'institutu foi vocalista nuna banda local de Washington DC, Stonehenge, y dempués formó parte de Easy Street, con quien actuó en dellos clubes de la zona. Tamién collaboró con Wild World, The Honeybees y la banda de techno-pop Method Actor na primer metá de los años 80.

En 1986 Cassidy conoció a Chris Biondo, inxenieru de soníu, que al saber de les sos dotes musicales animó-y a grabar les sos versiones n'estudiu y convirtióse nel so principal valedor. En 1990 Biondo, tamién baxista, y Cassidy formaron una banda estable al pie de otros miembros y actuaron en clubes de Washington DC, adquiriendo cierta popularidá local. Dos años dempués, Biondo consiguió faer llegar a Chuck Brown, renombráu músicu de la escena funk y soul con base na ciudá, una grabación de la voz d'Eva. Brown quedóse impresionáu y comparola con Ella Fitzgerald. Esi mesmu añu Chuck Brown y Eva Cassidy grabaron un discu, The other side, que contenía versiones de temes clásiques como "Fever" y d'artistes como Billie Holiday, amás de la interpretación d'Eva de "Over the rainbow". El trabayu foi editáu por Liaison Récords y goció de bona acoyida local, lo que favoreció que Cassidy recibiera delles ufiertes de discográfiques pa convertise en cantante solista. Ella refugoles toes porque-y ciscaben qu'afixera'l so estilu personal a un soníu más pop, y siguió tocando cola so banda en locales de la zona mientres los años siguientes y viviendo nuna granxa pela rodiada de Washington.

En xineru de 1996 salió a la vienta Live at Blues Alley, un álbum en directu colos meyores cantares que Cassidy solía interpretar nes sos actuaciones. Al respeutu, The Washington Post publicó qu'ella "podía cantar #cualquier cantar y consiguir que fuera la única música qu'importara". Magar ello, Cassidy nun taba satisfecha cola so voz la nueche de la grabación. De siguío, Eva, Biondo y el restu de la banda grabaron nueves versiones pa editar un discu d'estudiu. En xunu del mesmu añu, mientres la promoción de Live at Blues Alley, Eva empezó a sentir dolor nel cadril. Díes dempués foi diagnosticada de cáncer de piel en fase avanzada. Pese al tratamientu de quimioterapia, finó'l 2 de payares a la edá de 33 años. La so última actuación tuvo llugar en septiembre frente a un grupu d'amigos pa quien interpretó "What a wonderful world".

A principios del añu siguiente publicóse Eva by heart y Cassidy foi reconocida pola Asociación de Música de Washington. Magar la popularidá llograda na zona de Washington DC, Eva nun yera prácticamente conocida nel restu del mundu. En 1998 Blix Street arrexuntó temes de los trés discos publicaos por Eva y llanzó l'álbum Songbird, que permaneció nun segundu planu hasta qu'en 2000, Terry Wogan, pa la radio de la BBC británica, empezó a espublizalo nel so programa por encamientu del so productor ensin conocer prácticamente la figura de Cassidy, recibiendo llueu numberosos pidimientos de los oyentes pa escuchar la voz d'Eva. L'álbum esguiló hasta'l númberu 1 nes llistes britániques vendiendo más d'un millón de copies, y algamó estatus de discu d'oru nos Estaos Xuníos, collechando gran ésitu en munchos otros países. Sting afirmó nuna entrevista que nun pudo contener les llárimes al escuchar per primer vegada la versión qu'Eva grabó de la so tema Fields of gold, incluyíu nel álbum. Cassidy nunca grabó composiciones propies, polo que tol material publicáu consiste en versiones de #otru autores.

Dende la so muerte, publicóse cuatro recopilatorios más: Time after time (2000), Imaxine (2002), American tune (2003) y Wonderful world (2004), tolos cualos llegaron al númberu 1 en Reinu Uníu y sumando vientes percima de los cuatro millones de copies.

Discografía[editar | editar la fonte]

  • 1992: The other side con Chuck Brown
  • 1996: Live at Blues Alley
  • 1997: Eva by heart
  • 1998: Songbird (UK #1)
  • 2000: Time after time (UK #1)
  • 2000: Non Boundaries
  • 2002: Method actor22
  • 2002: Imaxine (UK #1)
  • 2003: American tune (UK #1)
  • 2004: Wonderful world (UK #1)
  • 2008: Somewhere
  • 2011: Simply Eva
  • 2012: The best of Eva Cassidy

Enllaces esternos[editar | editar la fonte]