Buenaventura Durruti

Buenaventura Durruti
Vida
Nacimientu	Lleón, 14 de xunetu de 1896
Nacionalidá	España
Llingua materna	castellanu
Muerte	Madrid, 20 de payares de 1936 (40 años)
Sepultura	Cementeriu de Montjuïc tumba de Buenaventura Durruti (es)
Causa de la muerte	mancada por arma de fueu
Familia
Casáu con	Émilienne Morin
Hermanos/es	Marciano Pedro Durruti
Estudios
Llingües falaes	francés castellanu
Oficiu	anarcosindicalista, anarquista, sindicalista, políticu, mecánicu, miliciano anarquista (es)
Emplegadores	Compañía de los Caminos de Hierro del Norte de España (es)
Miembru de	Confederación Nacional del Trabayu Los Solidarios (es) Federación Anarquista Ibérica Milicias de la CNT (es)
Serviciu militar
Lluchó en	Guerra Civil Española
Creencies
Relixón	ateísmu

José Buenaventura Durruti Dumange (14 de xunetu de 1896, Lleón – 20 de payares de 1936, Madrid) foi un anarquista español.

Biografía

Primeros años

Buenaventura Durruti naz en Lleón, siendo'l segundu de los ocho fíos del matrimoniu ente Santiago Durruti, un trabayador ferroviariu, y Anastasia Dumange. Santa Ana, el barriu onde vive dende neñu, ye un llugar modestu, de cases pequeñes y vieyes habitaes polos obreros de la ciudá. Hasta los ocho años d'edá asiste a la escuela de la calle de la Misericordia.

Como consecuencia de la güelga de curtidores de Lleón en 1903, que se prollongó por nueve meses, la familia de Buenaventura Durruti vese económicamente apurada, polo que Durruti pasa a la modesta escuela de Ricardo Fanjul. A los catorce años abandona los estudios y faise mecánicu baxo la tutela de Melchor Martínez, un socialista que tenía en Lleón cierta fama de revolucionariu. A lo llargo de dos años, Melchor Martínez enseña-y tolo que sabe sobre mecánica y socialismu; cuando nun tien más qu'aprender, Durruti treslládase al taller d'Antonio Mijé y especialízase nel montaxe de llavadores mecániques pa llavar los minerales sacaos de les mines.

En 1912, siendo mecánicu, afíliase por influencia de so padre y de Melchor Martínez a la Unión de Metalúrxicos, asociación adscrita a la Unión Xeneral de Trabayadores, pero bien ceo dexa de sentise identificáu colo que considera un socialismu moderáu. Depués d'abandonar el trabayu de mecánicu, Durruti trabaya como montador de llavaderos de carbón, nel pueblu de Matallana de Torío; cuando la instalación d'unu de los llavaderos envuélvese nuna riña colos obreros, que buscaben la destitución d'unu de los inxenieros d'aquella empresa. L'inxenieru ye despedíu y Durruti, al tornar a Lleón, dase cuenta de que la Guardia Civil lu vixila.

Participó na güelga xeneral revolucionaria de 1917 como militante de la Unión Xeneral de Trabayadores, de la que sería espulsáu por defender posiciones revolucionaries. Treslladóse en 1920 a Barcelona, onde s'afilió a la CNT. En 1922 formó xunto con Joan García Oliver, Francisco Ascaso y Ricardo Sanz el grupu «Los Solidarios», col que perpetró un atracu al Banco de España de Xixón en 1923. Tamién se-y imputó l'asesinatu del cardenal Juan Soldevila y Romero, unu de los principales financiadores n'Aragón de los comandos de pistoleros blancos de la patronal, qu'asesinaben a militantes obreros destacaos. Tuvo que fuxir a Arxentina y depués a Chile, onde, xunto a compañeros anarquistes, lleva a cabu'l primer asaltu nesi país. L'atracu ye parte d'una campaña pa xuntar recursos col envís de lliberar a compañeros que s'atopaben en delles cárceles d'España. Continuó depués el so pasu per otros países llatinoamericanos y europeos. En Francia ye encarceláu xunto a Francisco Ascaso y Gregorio Jover pola so participación nes actividaes revolucionaries n'España, polo qu'entama una gran campaña internacional a favor de la so amnistía que concluye cola lliberación de los 3 presos anarquistes.

En 1931 tornó a España, y integróse nel sector faísta (próximo a la FAI) de la CNT —belixerante cola II República— y tomó parte nes insurreciones de Figols 1932 y 1933. Lo que llevó al gobiernu republicanu a deportalu, como presu preventivu xunto a otros anarcosindicalistes a Guinea Ecuatorial y Canaries, nel barcu mercante Buenos Aires.

A lo llargo de tol periodu republicanu participa activamente en güelgues, mítines y conferencies per tol territoriu, pasando numberoses veces pela cárcel.

La so actuación na Guerra Civil Española

Al españar la Guerra Civil en 1936 foi unu de los principales protagonistes de los sucesos revolucionarios de xunetu, formando parte del grupo «Nosotros» (socesores de «Los Solidarios») y de la direición ena la defensa de la ciudá de Barcelona, onde morrió'l so compañeru de tola vida Francisco Ascaso nos enfrentamientos urbanos colos sublevados. El 20 de xunetu, yá derrotáu el llevantamientu en Barcelona y siendo la CNT la dueña de la situación, sobre manera depués d'apoderase del parque d'Artillería de San Andrés, los sos principales dirixentes tuvieron una entrevista col presidente de la Generalitat catalana, Lluís Companys. Nuna segunda entrevista al día siguiente, depués del plenu de Federaciones locales de la CNT, Durruti xunto con otros de los principales militantes de la CNT propusieron nomar un Comité Central de Milicies Antifascistes de Cataluña, siendo aceptao por les restantes organizaciones. Esti comité (formáu por llibertarios, republicanos nacionalistes y marxistes) convirtióse nel verdaderu poder en Cataluña, ratificando la Generalitat posteriormente lo que se decidía. Cansáu de les disputes internes, y el desgaste debiíu al hechu d'alcontrase nuna guerra civil, del Comité de Milicies Antifascistes (de la que yera xefe del departamentu de tresportes), decidió pasar al frente col bandu republicanu, entamando por lliberar de los sublevaos Zaragoza, otru gran nucleu urbanu anarquista depués de Barcelona. Formóse entós la famosa Columna Durruti, que tomó rumbu a Zaragoza.

A la columna paez ser que se-y negó'l suministru d'armes, artillería, etcétera, por parte de los axentes comunistes, polo que tuvo que conformase con tomar tolos pueblos per onde pasaba. Nellos los campesinos víanse llibres pa facer la revolución: los terratenientes yeren espropiaos de les sos tierres, que yeren colectivizaes, abolíase la propiedá privada y instaurábase'l comunismu llibertariu. En payares d'aquel añu marchó a Madrid cola so columna a contener la ofensiva de les tropes sublevaes.

La so muerte

Tumba de Durruti nel cementeriu de Montjuïc (Barcelona).

Hacia la una de la tarde del 19 de payares de 1936 (en plena Batalla de la Ciudá Universitaria de Madrid), menos de dos hores depués de ser entrevistáu pal noticiariu filmáu del PCUS, Durruti ye feríu nel pechu por una bala d'estraña procedencia; en grave estáu, llévenlu al Hotel Ritz, sede del hospital de sangre de les milicies catalanes, onde muerre al día siguiente a les cuatro de la mañana. L'autopsia reveló que la muerte de Durruti debiérase a los destrozos causaos por una bala calibre nueve llargo, que-y caltrió pel tórax y lesionó importantes vísceres. El so cuerpu foi entregáu a los servicios especializaos del Conceyu de Madrid pa ser sometíu a un procesu d'embalsamamientu, yá que sería treslladáu y enterráu en Barcelona.La so muerte ye ocultada a la población col fin d'evitar desánimos.

La muerte de Durruti ocurrió n'oscures circunstancies qu'afalaron l'aparición de delles hipótesis pa esplicala. Según la CNT, escuetamente foi una «bala fascista». Les emisores de radio de la zona nacional atribuyeron el fechu a los comunistes, qu'a la so vez aseguraron que l'atentáu fuera obra del trosquismu o hasta polos mesmos anarquistes debido al enfrentamientu de Durruti cola so propia direición. Díxose tamién que foi víctima d'unos lladrones qu'él mesmu intentaba detener. Tamién s'asegura que foi un disparu salido de la so propia arma: dellos afirmen que se-y cayó'l so fusil ametrallador, aunque otros aseguren que Durruti sólo portaba un Colt 45.

Enllaces esternos

• Wikimedia Commons acueye conteníu multimedia sobre Buenaventura Durruti .
• «Buenaventura Durruti». en Find a Grave. (n'inglés)

• Datos: Q208815
• Multimedia: Buenaventura Durruti
• Cites famoses: Buenaventura Durruti
• Testos: Autor:Buenaventura Durruti Dumange