Enrique García Rendueles

De Wikipedia
Saltar a: navegación, buscar
Enrique Garcia-Rendueles

Enrique García-Rendueles Gutiérrez (Cimavilla, Xixón, 24 d'avientu de 1880 - Xixón, 22 d'avientu de 1955) foi un poeta, sacerdote, investigador, antoloxista y escritor asturianu qu’escribió les sos obres tanto en castellán como n’asturianu. Foi militante del Partíu Carlista d'Asturies

Biografía

Ñaz en Xixón. Sos padres fueron don Ricardo García-Rendueles y Muñiz, nacíu en Xixón, procurador de los tribunales, y doña Florentina Gutiérrez Lamuño Vivansán, de Santa María de la Corte, Uviéu. Tuvo tres hermanos, Luis, José Pepín, y Ricardo. El tamién escritor Ricardo García-Rendueles y González yera primu suyu. Fizo los sos primeros estudios nel Colexu de La Inmaculada, de los padres xesuítes, finándolos nel añu 1898. Con vocación relixosa, ingresó nel Seminariu de Valdediós del que pasó, al añu siguiente al Seminariu Conciliar d’Uviéu, onde finó la so carrera eclesiástica en 1903.

En 1921 ye nomáu profesor de Relixón nel Institutu Xovellanos, y en 1952 caderalgu de l’asignatura, tres d’un llargu pleitu col obispáu. El so trabayu como investigador fue reconocíu ingresando nel Institutu d’Estudios Asturianos (IDEA) nel añu 1949 con un discursu tituláu Liturgia popular, onde se recueyen costumes y fiestes relixoses con un riquísimu aneudotariu etnolóxicu.

Morrió’l 22 de febreru de 1955 na so casa de la cai Gregorio García Jove, en Cimavilla, de resultes d’una pulmonía.

Los nuevos bablistas

Posiblemente’l trabayu más importante de Rendueles seya Los nuevos bablistas, una antoloxía d’escritores en llingua asturiana, publicada en 1925, onde se recueye la obra de treinta poetes, con un total de noventa y un poesíes, acompañaes d’una presentación bio-bibliográfica de caún. Pero, con ser esto interesante, lo que fizo del llibru obra d’estudiu obligáu ye la so “Introducción”, un verdaderu estudiu críticu sobre la situación de la llingua y de la lliteratura asturianes, con una visión moderna, na qu’afirma la validez del asturianu pa tratar cualquier tema: “…asuntos nobles y elevados, de hondos sentimientos, de verdades científicas e ideas abstractas…”[1] , criticando, al tiempu a los poetes pola so incuria o apatía, pa tratar namás asuntos triviales y ligeros. Ente les poesíes recoyíes nel llibru, inclúyense diecinueve del propiu García-Rendueles.

Otros trabayos

La primer obra, n’orde cronolóxicu, d’Enrique García-Rendueles fue un trabayu sobre’l so almiráu Gaspar Melchor de Xovellanos, publicáu en 1913, y que lleva por títulu Jovellanos y las Ciencias Morales y Políticas. Algamó un Accesit nel concursu entamáu pola Real Academia de Ciencias Morales y Políticas. Nella, Rendueles repasa’l pensamientu xovellanista nes sos distintes estayes: la del Derechu, la Economía, la Política, la Educación, les Costumes… con un capítulu especial al Xovellanos patriota.

L’Himno de Covadonga. XII Centenario de la batalla (718-1918), ye de 1918 y nun tien que ver col famosu Himno Oficial a la Virgen de Covadonga, de Restituto Valle (lletra) y Busca de Sagastizábal (música), de la mesma fecha, que comienza con: “Bendita la Reina de nuestra montaña…”

Vocabulariu de 1924. Esti vocabulariu permaneció inéditu hasta l’añu 2012 en que se publicó dientro les obres completes de García-Rendueles[2] . Nun tien que ver col Diccionariu nel que trabayó Rendueles hasta’l día de la so muerte que, xunto cola Gramática, tamién de la so autoría, esapaeció misteriosamente de la biblioteca del RIDEA[3].

Antiguos apodos de Gijón (1850-1890) anotados por don Enrique García-Rendueles, Pbro. Con la colaboración de su padre don Ricardo (1853-1928) y doña Rufina Morán La Bandera (1848-1936), recopilación de nomatos del barriu Cimavilla. Trabayu que tuvo inéditu hasta l’añu 1994 nel que se publicó na revista Lletres Asturianes.

Obres

  • Jovellanos y las ciencias Morales y Políticas (1913)
  • Himno de Covadonga. XII Centenario de la batalla (718-1918) (1918)
  • Vocabulariu (1924)
  • Los nuevos bablistas (1925)
  • Antiguos apodos de Gijón (1850-1890) anotados por D. Enrique García-Rendueles, Pbro. Con la colaboración de su padre D. Ricardo (1853-1928) y Dña. Rufina Morán La Bandera (1848-1936) (1937)
  • Liturgia popular (1950)

Notes y referencies

  1. García-Rendueles, Enrique (1987). “Introducción”, Los nuevos bablistas. Uviéu: Academia de la Llingua Asturiana. p. XIV
  2. García-Rendueles, Enrique (2012). Obres (in)completes de don Enrique García-Rendueles. Edición, introducción y notes de Vicente García Oliva. Uviéu: Academia de la Llingua Asturiana,
  3. Los datos d’esta esapaición  en Obres (in)completes… op. cit. p. 34 y ss

Bibliografía

  • Alonso Bonet, Joaquín (1950), “Contestación a don Enrique García-Rendueles”, en Liturgia Popular” Uviéu, IDEA. 
  • García, Antón (1991). “Noticia del “Vocabulario de García Rendueles”. Revista Ástura, nº 8. Uviéu.
  • García Arias, Xosé Lluis (1975), Bable y Regionalismo. Uviéu. Conceyu Bable.
  • García Oliva, Vicente (1992). Aventura humana y lliteraria al rodiu de D. Enrique García-Rendueles. Conseyería Educación, Cultura y Deportes, Uviéu.
  • García Oliva, Vicente (1994). "Nomatos de Xixón recoyíos por don Enrique García-Rendueles". Lletres Asturianes 51: 47-60
  • García Oliva, Vicente (2005). “La influencia de la tradición na narrativa del Surdimientu”. Cultures. Revista Asturiana de Cultura. 14: 99-116 Uviéu, ALLA.
  • García-Rendueles, Enrique (2012) Obres (in)completes de don Enrique García-Rendueles. Edición, introducción y notes de Vicente García Oliva. Academia de la Llingua Asturiana, Uviéu.
  • García Teijeiro, Manuel (1994) “El lengüina”, en Escrituras del Aula. Real Instituto Jovellanos 1794-1994. p. 43-45 Xixón. Ed. Llibros del Pexe.
  • Grossi, Rodrigo (2005), “Enrique García Rendueles, 50 años de su muerte”, Diario La Nueva España. Cartas al Director. Oviedo, 20-12-2005 
  • Iglesias Cueva, Xosé Ramón (2006). “Orixe social y formación intelectual de los autores de la lliteratura asturiana”. Lletres Asturianes 93: 7-14. Uviéu, ALLA.
  • Iglesias Cueva, Xosé Ramón (2007). “Lliteratura asturiana y modernidá: 1903-1924”. Lletres Asturianes 94: 57-72 Uviéu, ALLA.
  • Muñiz, María Elvira (1989) Escritores de Gijón. p. 73-83 Xixón. Ed. Ateneo Obrero de Gijón.
  • Muñiz, María Elvira (1993), “Un libro sobre don Enrique García-Rendueles y el hallazgo de su “Vocabulario Bable”. Diario El Comercio de Gijón. 18-1-1993.
  • Muñiz, María Elvira (1994), “Conferencia de clausura de les IV Xornaes de Lliteratura Asturiana”. Gijón. Fundación Municipal de Cultura. Muséu Nicanor Piñole. Avientu 1994
  • Muñiz, María Elvira (1994). “El mayor legado de Enrique García-Rendueles es su interés por la cultura asturiana”. Entrevista. Diario El Comercio de Gijón. 2-12-1994.
  • Ramos Corrada, Miguel (1982), Sociedad y Literatura Bable (1839-1936), Xixón, Silverio Cañada, ed.
  • Ruiz de la Peña, Álvaro (1987), “Entamu” de la edición facsímil de Los nuevos bablistas de don Enrique García Rendueles, Uviéu, ALLA,
  • Salanova, Ernesto (1993), “Personalidades gijonesas: Enrique García-Rendueles”. Diario El Comercio de Gijón. 24-10-1993.
  • Sannchez Vicente (2008), Xuan Xosé. “Homenaxe a don Enrique García-Rendueles”. Conferencia lleída na II Selmana de la II Arribada y publicada na Revista Lliteratura 25: 36-42. Uviéu, ALLA,
  • Suárez, Constantino (1955). Escritores y artistas asturianos. IDEA. Uviéu. t. 4, p. 148-150