Lletres Asturianes

De Wikipedia
Saltar a navegación Saltar a la gueta

Lletres Asturianes ye'l boletín oficial de l'Academia de la Llingua Asturiana.

El so primer númberu asoleyóse nel añu 1982 y, dende d'esi primer entamu, veníen publicándose 3 ó 4 númberos al añu, de los que dedicaba un monográficu lliterariu coincidiendo col Día de les Lletres Asturianes (el númberu correspondiente al mes de mayu). Dende l'añu 2009, esi númberu lliterariu especial independízase y créase la nueva publicación de Lletres Lliterariu.[1]; amás, col númberu 104 (marzu de 2011), cámbiase'l formatu p'adaptalu a los estándares de publicación científica internacional y establezse una periodicidá semestral, esto ye, dos númberos per añu;[2] faise xusto depués de la publicación del so primer númberu especial: un doble volume dedicáu al profesor, y expresidente de la institución, Xosé Lluis García Arias.

El conteníu de los boletinos, abiertu siempre por un Entamu, vien compuestu por estudios y trabayos d'investigación llingüística, lliteraria, histórica, etnográfica o antropolóxica. Igualmente, hasta esi númberu de cambiu 104, dedicaba estayes al recobramientu de testos lliterarios vieyos o a la promoción de nuevos autores. Arriendes d'ello vien pesllando cada exemplar un espaciu dedicáu a les anuncies relatives a estremaes actividaes de la sociedá asturiana alredor de la llingua, asina como un llistáu de les novedaes editoriales y discográfiques col asturianu como protagonista.

Dende'l númberu 105 espublízase tamién en formatu dixital, consultable de baldre dende la páxina de la institución.

Enllaces[editar | editar la fonte]

Referencies[editar | editar la fonte]

  1. Lletres Lliterariu, mayu 2009; Entamu (páx.5-6); ISSN 1889-5182
  2. "Entamu" del númberu 104.