El Pieloro

De Wikipedia
Saltar a navegación Saltar a la gueta
El Pieloro
Llocalización
Parroquia d'EL PIELORO (Situación).png
Xeografía
Tipu d'entidáParroquia
Comunidá: Flag of Asturias.svg Asturies
Conceyu: Flag of None.svg  Carreño
Partíu xudicialXixón
Población
 • Habitantes
 • Densidá
(2011)
213 hab[1]
36,53 hab/km²
Área total5 83 km²[2]
Distanciesa Candás, 4 km
Entidaes de población11
Códigu postal33439

El Pieloro[3] ye una parroquia de les doce del conceyu asturianu de Carreño.

Situación y comunicaciones[editar | editar la fonte]

La parroquia d'El Pieloro alcuéntrase na fastera occidental del conceyu de Carreño, na so zona central. Llenda col conceyu Gozón al norte y al oeste, cola parroquia de Llorgozana al sur, cola de Perlora al este y cola de Candás al noreste.

La distancia media con Candás, capital del conceyu, ye d'unos 4 km (quedando a 3 km la casería d'El Raitán, como entidá más averada; y a 5 km la casería d'El Cellero, el nucleu más alloñáu).

El Pieloro ta atravesada pela carretera AS-110, que va de Candás a Tabaza.

La llinia F4 "Xixón-Cuideiru" de FEVE tien apeaderu en San Zabornín.

Territoriu y población[editar | editar la fonte]

Tien un estensión de 5,83 km².

En 2011 tenía una población de 213 persones, 108 homes y 105 muyeres. [1]

Les entidaes de población de la parroquia son les siguientes:

ENTIDÁ CATEGORÍA POBLACIÓN (2011)
L'Alto la Ilesia Aldega 34
Los Caleros Casería 9
El Cellero Casería 3
La Espeñada Casería 4
La Estación Llugar 10
Llaneces Casería 14
El Llano Casería 22
El Raitán Casería 42
El Rendaliego Llugar 41
San Zabornín Llugar 20
La Xunca Casería 14

Topónimu[editar | editar la fonte]

Diz Xosé Lluis García Arias [4], na estaya "La peregrinación":

""Al pie", "al piei" o "al pía" (del llatín AD PEDEM) son espresiones coles que se quier dar idea de prosimidá o cercanía; son equivalentes, polo tanto, a otres del tipu "xunto a", "a la vera de" y hasta "debaxo de". En tal sentíu apaecen en:
El Pieloro (Cñ) ‘(al) pie de L’Oro’."

Sitios d'interés[editar | editar la fonte]

Ilesia de Santa María d'El Pieloro[5][editar | editar la fonte]

Santa María d'El Pieloro ye'l templu románicu más importante del conceyu, declaráu Bien d'Interés Cultural.

La nave del cuerpu principal ta fechada nel sieglu XIII y, ente los sieglos XIII y XIV, construyóse la Capiella Mayor protogótica, que sustituyera l'ábside románicu. Nel sieglu XVI, llevantóse la capiella la Nuestra Señora de les Nieves, adosada al llau Sur de la Capiella Mayor. De dómina barroca son la construcción del campanariu y el pórticu, amás de la sacristía, onde taba la capilla de la Nuestra Señora de les Nieves.

La ilesia amburó cuando la Guerra Civil Española, perdiéndose la coleición de retablos barrocos qu'abellugaba: El Retablu de la Capiella Mayor (1716), el Retablu del Santísimu Cristu (1709), el Retablu de San Blas (1726) y el Retablu de la Nuestra Señora de les Nieves. En 1939, Luis Menéndez Pidal redautó el proyeutu de reconstrucción de la ilesia, que se fizo durante la década de 1940. Nueves restauraciones, mientres los años 80 y 90, dexaron la ilesia col aspeutu actual.

Asítiase nel barriu L'Alto la Ilesia.

Casa Lluisa[6][editar | editar la fonte]

Tamién nomada "Casa de los González Pola", ye una casa mariñana de piedra con portalón central, cola cocina y la habitación caúna a un llau la entrada y la corte, cola teneda enriba, al fondu. Na fachada, l'escudu de los González Pola.

Asitiada nel barriu de San Zabornín, data del sieglu XVI. Dende l'añu 40, fuera chigre-tienda, hasta que morrió nos 80 l'últimu habitante, José Ramón Suárez, pa de l'actual propietaria de la casa Mª Luisa Suárez Suárez.

L'estáu de conservación ye permalu.

Fonte la Pipera[7][editar | editar la fonte]

Esta fonte y llavaderu alcuéntrase nel barriu de San Zabornín. Tien una estructura en forma de "L" y el cañu nel vértiz, tando rematada por un frontón. Tien cuatro llavaderes y un pilón que, tal vez, usárase como bebederu.

Bolera de batiente de San Zabornín[8][editar | editar la fonte]

Remocicada nel añu 2002, esta bolera tien instalaciones qu'inclúin una pista tillada con madera. Cuenta con illuminación propia pa facilitar el so uso nocherniegu.

Ye la sede de la Peña Bolística de San Zabornín y alcuéntrase nesti barriu.

Fiestes[editar | editar la fonte]

  • 3 de febreru: San Blas.
  • Tercer domingu d'agostu: Fiestes Sacramentales.

Entidaes de la parroquia[editar | editar la fonte]

  • Asociación de Ganaderos de "Santa María de Piedeloro", Escueles d'El Pieloro
  • Delegación de la Asociación Rexonal "Mujeres con Tiempo Propio", Barriu Llaneces, 2
  • Peña Bolística Zanzabornín, San Zabornín, 4

Referencies[editar | editar la fonte]

  1. 1,0 1,1 Institutu Nacional d'Estadística
  2. Diccionario Geográfico de Asturias; Editorial Prensa Asturiana, S.A; Uviéu; 2000.
  3. «Espediente colos topónimos oficiales de Carreño».
  4. Xose Lluis García Arias, "Toponimia Asturiana"
  5. Páxina del ayuntamientu de Carreño
  6. Páxina del ayuntamientu de Carreño
  7. Páxina del ayuntamientu de Carreño [1]
  8. Páxina del ayuntamientu de Carreño [2]
Flag of Asturias (indoor).svg Parroquies de Carreño Flag of carreno.png
Albandi | Ambás | Candás | Carrió | Quimarán | Llorgozana | Perlora | Prevera | El Pieloro | Priendes | Tamón | El Valle