División territorial d'España en 1833

De Wikipedia
(Redirixío dende División provincial de 1833)
Mapa de la división provincial y rexonal d'España.

La división territorial d'España de 1833 foi un proyeutu de reforma alministrativa entamáu, inmediatamente dempués de la muerte de Fernando VII, pol primer gobiernu de la rexente María Cristina de Borbón-Dos Sicilies, dirixíu por Francisco Cea Bermúdez. El so secretariu d'Estáu de Fomentu, Javier de Burgos, afitó, al traviés d'un decretu aprobáu'l 30 de payares de 1833, la división d'España en provincies y rexones[1][2], que pervive anguaño inalterada esceutu pola división de la que yera provincia de Canaries en dos. La circular creó un estáu centralizáu dividíu en 49 provincies y 15 rexones. Toles provincies, sacante cuatro que conservaron les sos antigües denominaciones (Navarra, Araba, Gipuzkoa y Bizkaia), recibieron el nome de les sos respeutives capitales[3].

El proyeutu de Javier de Burgos ye perasemeyáu al proyeutu de división territorial de 1822. Desapaecen, respeuto a aquelli, les provincies de Calatayud, Vierzo y Xàtiva, y camuda'l nome de delles otres provincies al proponese agora una capital nueva[4].

Con todo a Don Javier de Burgos corresponde más el mérito de haber emprendido, dirigido y elaborado una nueva división provincial de España el valor y la voluntad política de haber puesto en vigencia una división anterior como la de 1822 colos retoques y modificaciones que creyó oportunas.
Martínez Díez, Gonzalo, Génesis histórica de la provincia de Burgos y sus divisiones administrativas, Aldecoa, Burgos, 1983. ISBN 84-7009-214-6

División provincial y rexonal[editar | editar la fonte]

La división territorial de Javier de Burgos de 1833 incluía 49 provincies. El nome de 43 d'elles promulgábase faciendo referencia a la so pertenencia a 11 rexones históriques qu'apaecíen enumberaes n'orde alfabéticu; les seis restantes (Canaries, Palma de Mallorca, Navarra, Araba, Gipuzkoa y Bizkaia) apaecíen nel decretu de forma independiente, y sería nes décades posteriores nes que entamaríen a ser consideraes a nivel práuticu como rexones (uniprovinciales les de Canaries, Palma y Navarra, y pluriprovincial, col nome de Provincies Vascongaes, les otres trés), lo que llevó'l total de rexones d'España a 15. El proyeutu de Burgos, poro, facía referencia intencionada a un nivel d'organización territorial supraprovincial, magar qu'ensin facer referencia a si había qu'atribuí-y a eses rexones funciones alministratives o non. La situación xurídica d'eses rexones caltúvose na Constitución de 1931, que-yos dio l'estatus xurídicu que caltienen de magar[5].

El territorio español en la Península e Islas adyacentes queda desde ahora dividido en cuarenta y nueve provincies que tomarán el nombre de sus capitales respectivas excepto las de Navarra, Álava, Guipúzcoa y Vizcaya, que conservan sus actuales denominaciones.
Fonte: Real Decretu de 30 de payares de 1833[3]
Los cuatro reinos d'Andalucía.

Amás del modelu de 1822, Javier de Burgos tomó exemplu pa la so reforma de la división alministrativa francesa, que divide'l territoriu en departamentos[6], y magar que munches decisiones sobro les llendes provinciales pudieron parecer arbitraries acordies con criterios históricos o xeográficos la realidá ye qu'estes llendes estableciéronse sobre la base de dellos criterios racionales: la estensión (tenía de poder llegase del puntu más alloñau de la provincia a la capital nún día de viaxe), la población (les provincies habíen de tener una población d'ente 100.000 y 400.000 habitantes) y coherencia xeográfica[6]. El gobiernu de la nación nombraría un representante, col títulu de «xefe políticu», como cargu de mayor autoridá alministrativa dientro la provincia[7].

Había un grupu importante de diputaos a Cortes que yera partidariu d'acabar colo que d'aquella se nomaba provincialismu, y por ello apostaron pa que les provincies nun foran denomaes con nomes históricos, como pidíen por exemplu la Diputación de Santander, que tentaba de recuperar, dende 1821, el nome de provincia de Cantabria[8][9], o los rioxanos, partidarios de que la provincia de so fora nomada La Rioxa[10][11]. La división namás caltuvo los nomes tradicionales de les provincies vascongaes y Navarra, y respetó perpocos de los enclaves históricos del país: los más importantes d'ellos son el Rincón d'Ademuz (exclave de la provincia de Valencia) y l'enclave de Treviño (enclave de la provincia d'Araba perteneciente a la provincia de Burgos)[12]. Tamién ignoró les reivindicaciones provinciales de Calatayud y Alcañiz.

Poco dempués d'espublizase'l decretu dótose a les capitales provinciales de les instituciones básiques de gobiernu[13] y créose'l cargu de xefe políticu, antecedente de lo que dempués seríen gobernadores civiles y anguaño son delegaos y sodelegaos del gobiernu[7]. Decretase tamién que tolos conceyos tienen que tener tol so territoriu dientro la mesma provincia, y poco dempués neto les llendes d'ellos que les de les provincies queden perfechamente definíes. Al añu siguiente, y tamién sobre la base de les llendes provinciales, créense los partíos xudiciales. Nes sos poblaciones principales formaríense los xulgaos de primer instancia ya instrucción, que seríen la base posteriormente de los distritos eleutorales y la contribución[7]. Pa 1868 esistíen 463 partíos xudiciales y unos 8.000 municipios, práuticamente los mesmos (8.037) qu'hebo nes eleiciones municipales de 1999[13].

Les llendes provinciales y rexonales foron asumíes tanto por la Primer República Española de 1873, como por la Segunda República Española de 1931 y pol réxime monárquicu que surdió de la Constitución de 1978.

Cambeos posteriores[editar | editar la fonte]

La división provincial d'España camudó perpoco de magar 1833. Recuéyense darréu los cambeos más importantes.

Sieglu XIX[editar | editar la fonte]

  • En 1834, por Real Orde de 16 d'abril, y tres del rechazu de los conceyos del Baxu Aragón a les llendes que'l decretu de 1833 estableciera ente les provincies de Zaragoza y Teruel, incorpórase la comarca de Caspe, que fora asignada a la provincia de Teruel, a la de Zaragoza, y trespásase la comarca de Calamocha, atribuyida a la provincia de Zaragoza na división orixinal, a la de Teruel.
  • En 1836, por Real Orde de 9 de setiembre, amplíase la provincia de València con tierres de la d'Alacant, y esta cabera incorpora conceyos de les d'Albacete (Villena) y Murcia (Sax)[14].
  • En 1842 segrégase'l conceyu d'Aranjuez de la provincia de Toledo; pasa a formar parte de la de Madrid.
  • Ente 1844 y 1854, la capital de Gipuzkoa pasó de San Sebastián a Tolosa.[15]
  • En 1845 incorpórse'l condáu d'Oñate a la provincia de Gipuzkoa.
  • En 1846, por Real Orde de 24 de marzu, segrégase'l conceyu de Villarrobledo de la provincia de Ciudad Real. Pasa a pertenecer a la d'Albacete, afitándose asina les llendes actuales ente les dos[14].
  • En 1851, por Real Orde de 25 de xunu, Requena y Utiel dexen de pertenecer a la provincia de Cuenca ya incorpórense a la de València[16][17].

Sieglu XX[editar | editar la fonte]

  • En 1927 (R.D. nº 1586 de 21 de setiembre) dixébrase la provincia de Canaries, que según el Real Decretu de 10 de payares de 1833 había llamase provincia de Santa Cruz de Tenerife[18], en dos, que reciben los sos nomes actuales. Esti foi'l cambéu más importante de magar la espublización del decretu, una y bones fizo aumentar el númberu de provincies a 50.
  • En 1973 el conceyu de San Quirce del Río Pisuerga pasa de la provincia de Burgos a la de Palencia. Amás, desaparez como conceyu, incorporándose como una división alministrativa del conceyu palentín d'Alar del Rey.
  • En 1979, por Real Decretu de 27 d'abril, incorpórase'l conceyu de San Llorente de la Vega, palentín primeru d'esi añu, al de Melgar de Fernamental, na provincia de Burgos. Esto camudó les llendes ente les dos provincies[19].
  • En 1980 l'antigua provincia de Logroño camuda'l so nome pol de provincia de La Rioxa[20][21].
  • En 1982, dientru del procesu de conformación de la comunidá autónoma de Cantabria, camudase'l nome de l'antigua provincia de Santander pol de provincia de Cantabria[22]. D'otra banda, la Rexón de Murcia pasa a ser una rexón uniprovincial al incorporase la provincia d'Albacete a la comunidá autónoma de Castiella-La Mancha.
  • En 1983 la provincia d'Uviéu camuda'l so nome pol de provincia d'Asturies[23].
  • En 1992 les provincies de Girona y Lleida camuden el so nome oficial anterior, Girona y Lérida respeutivamente, al actual[24].
  • En 1995, n'avientu, el conceyu de Gátova segrégase de la provincia de Castelló pa incorporase a la de València[25].
  • En 1997 la provincia de les Islles Baleares camuda'l so nome pol de provincia de Illes Balears[26].
  • En 1998 les provincies d'A Coruña y Ourense pasan a denomase asina oficialmente. Primero yeren les provincies de La Coruña y Ourense[27].

Sieglu XXI[editar | editar la fonte]

  • En 2011 les provincies d'Euskadi camuden los sos nomes oficiales anteriores (Álava, Guipúzcoa y Vizcaya) polos de Araba/Álava, Gipuzkoa y Bizkaia.[28].

Les provincies definíes en 1833 siguen siendo, según recueye la Constitución Española de 1978, pieces básiques de la organización territorial d'España (artículu 141), base de les circunscripciones eleutorales (artículu 68) y les unidaes de les que se componen les comunidaes autónomes (artículu 143). L'Estatutu d'autonomía de Cataluña qu'entró en vigor n'agostu de 2006 nun recueye la división provincial, y considera dividida Cataluña en siete vegueríes[29]. Sicasí, nun ta previsto qu'esa división modifique la división provincial esistente a nivel estatal pa nun alteriar, por exemplu, la representación de Cataluña nes Cortes Xenerales.

Referencies[editar | editar la fonte]

  1. ↑ Calle Cea Bermúdez, ABC, 6 d'ochobre de 1954, p. 17.
  2. ↑ Carlos Marichal, Spain, 1834-1844: A New Society (1970), Coleición Tamesis Serie A Monografias, Volume 72, ISBN 0729300579, p. 52 et. seq..
  3. ↑ 3,0 3,1 Real Decretu de 30 de payares de 1833 en Wikisource;
    Real Decretu de 30 de payares de 1833 na web oficial del Gobiernu de Canaries.
  4. ↑ Jesús Larios Martín. Dinastías reales de España: Geografía política y eclesiástica (1986), Ediciones Hidalguia. p. 48.
  5. ↑ Fuerzas políticas en el proceso autonómico de Castilla y León: 1975–1983, tesis doctoral de Mariano González Clavero, p. 60.
  6. ↑ 6,0 6,1 Pérez, Joseph (1999). Historia de España. Barcelona: Crítica, páx. 464. ISBN 84-8432-091-X.
  7. ↑ 7,0 7,1 7,2 Jefes Políticos y Gobernadores Civiles, Diputación d'Albacete.
  8. ↑ Diario de las Actas y Discusiones de las Cortes Estraordinarias del Año 1821
  9. ↑ Diario de las Sesiones de Cortes. Legislatura Extraordinaria 1821-1822
  10. ↑ (en castellanu) En el nombre de La Rioja. 15 de payares de 2015. https://www.larioja.com/la-rioja/201511/15/nombre-rioja-20151115011436-v.html. Consultáu'l 22 d'ochobre de 2018. 
  11. ↑ (en castellanu) ¿Por qué nuestra provincia se llamó Logroño y no La Rioja? | Rioja2.com. 31 de xunetu de 2018. https://www.rioja2.com/n-122568-2-por-que-nuestra-provincia-se-llamo-logrono-y-no-la-rioja/. Consultáu'l 22 d'ochobre de 2018. 
  12. ↑ Eduardo Barrenechea, Los 'gibraltares' de unas regiones en otras: Treviño, Llivia, Rincón de Ademuz..., El País, 8 de febreru de 1983.
  13. ↑ 13,0 13,1 Santiago Pastrana, El siglo XIX y la revolución liberal en Páginas didácticas sobre geografía.
  14. ↑ 14,0 14,1 División provincial de Javier de Burgos de 1833, Jarique.
  15. ↑ Historia, Ayuntamiento de Tolosa / Tolosako Udala web oficial.
  16. ↑ Renfe Cercanías Valencia, RENFE. Fecha de acceso 2009-12-31.
  17. ↑ Ignacio Latorre Zacarés. El Archivo Municipal de Requena Abre sus Puertas, web de la biblioteca pública de Requena.
  18. ↑ Real Decretu de 30 de payares de 1833 nel sitiu web oficial del Gobiernu de Canaries.
  19. ↑ Orden de 27 d'abril de 1979.
  20. ↑ The Autonomy Process of La Rioja, SiSpain.org.
  21. ↑ La Rioja: the Autonomous Community, TypicallySpanish.com.
  22. ↑ LEY ORGÁNICA 8/1981, de 30 d'avientu, de Estatuto de Autonomía para Cantabria, BOE número 9 de 11/1/1982. (BOE-A-1982-635). Magar que la llei aprobose n'avientu de 1981, publicose (y poro fízose efectiva) en 1982.
  23. ↑ Ley 1/1983, de 5 d'abril, sobre cambio de denominación de la actual provincia de Oviedo por la de provincia de Asturias, noticias.juridicas.com.
  24. ↑ Ley 2/1992, de 28 de febreru, por la que pasan a denominarse oficialmente Girona y Lleida las provincies de Girona y Lérida Archiváu el 10 de xunetu de 2010 na Wayback Machine., derecho.com. Fecha de acceso 2009-12-31.
  25. ↑ Ley Orgánica 15/1995, de 27 d'avientu, sobre alteración de los límites provinciales consistente en la segregación del municipio de Gátova de la provincia de Castellón y su agregación a la de Valencia, noticias.juridicas.com.
  26. ↑ Ley 13/1997, de 25 d'abril, por la que pasa a denominarse oficialmente Illes Balears la provincia de Baleares, noticias.juridicas.com. Fecha de acceso 2009-12-31.
  27. ↑ Ley 2/1998, de 3 de marzu, sobre el cambio de denominación de las provincies de La Coruña y Ourense, noticias.juridicas.com.
  28. ↑ [1]
  29. ↑ Esther Celma Reus, El Govern confirma que la ley territorial queda aparcada, El Periódico online,9 de febreru de 2007.
Sacáu de «https://ast.wikipedia.org/w/index.php?title=División_territorial_d%27España_en_1833&oldid=4172405»