Cristina Coto

Cristina Coto
conceyal del Conceyu d'Uviéu
Presidenta de Foru Asturies
Diputada na Xunta Xeneral del Principáu d'Asturies
Vida
Nacimientu	Sotrondio, 6 de marzu de 1970 (54 años)
Nacionalidá	España
Estudios
Estudios	Universidá d'Uviéu derechu
Llingües falaes	castellanu
Oficiu	política, abogada
Creencies
Partíu políticu	Vox (dende 2019); Foru Asturies (de 2011 a 2019); Partido Popular (de 1994 a 2011)

Cristina Coto de la Mata (6 de marzu de 1970, Sotrondio) ye una abogada y política asturiana. Presidió Foru Asturies y agora ye candidata de Vox a l'alcaldía d'Uviéu.

Biografía

Ñació'l día 6 de marzu de 1970, en Sotrondio, conceyu de Samartín del Rei Aurelio. Estudió Derechu na Universidá d'Uviéu.

Xunióse a les Nueves Xeneraciones del Partíu Popular d'Asturies en 1994. En 1999, tres la celebración d'un congresu rexonal, pasa a ocupar el cargu de secretaria d'organización municipal del partíu. En 2002 ye nomada coordinadora d'organización del PP d'Asturies. Ye escoyida diputada del Grupu Parllamentariu Popular na Xunta Xeneral del Principáu d'Asturies tres les eleiciones autonómiques de 2003, anovando'l so escañu en 2007.

El 3 de febreru de 2011 Coto abandona'l so escañu na Xunta Xeneral y decide dase de baxa nel PP p'afiliase a Foru Asturies, un partíu rexonal de recién creación, fundáu pol exministru del PP, Francisco Álvarez-Cascos. Esti partíu llogra facese col gobiernu del Principáu d'Asturies tres les eleiciones autonómiques de 2011, y Coto vuelve a la Xunta Xeneral, esta vegada como diputada de Foru. Coto ye designada vocera parllamentaria de Foru en payares de 2011.

Foru Asturies pierde la presidencia del Principáu tres la celebración d'unes eleiciones autonómiques antemanaes en 2012, pero Coto caltién el so escañu y el so cargu como voceru.

En febreru de 2015 Francisco Álvarez-Cascos anuncia la so decisión de nun volver a presentase como candidatu a la presidencia del Principáu d'Asturies nes eleiciones autonómiques de 2015, y dimite como presidente de Foru Asturies. Coto ye escoyida nueva presidenta del partíu nun congresu celebráu'l 14 de marzu de 2015.

En diches eleiciones, Coto preséntase como cabeza de llista de Foru, la formación llogra 3 diputaos. Exerz de voceru del partíu na Xunta Xeneral del Principáu d'Asturies.

Dimitió como presidenta de Foru'l 15 de xunu de 2018, por discrepancies cola direición, y tamién abandonó la direición del grupu parllamentariu de Foru na Xunta Xeneral del Principáu d'Asturies.

En xineru de 2019 desvelóse que va ser candidata a l'alcaldía d'Uviéu por Vox nes próximes eleiciones municipales.

El 15 de xunu de 2019 Cristina foi escoyida conceyala nel Ayuntamientu d'Uviéu, representando al grupu municipal de Vox n'Uviéu.

Vida personal

En 2007 foi protagonista d'un incidente d'acoso dientro de les files del PP. La entós diputada rexonal popular denunció a un collaciu y dirixente del PP xixonés y asturianu, Luis Madiedo, alegando sufrir vexames. Coto recibiría mientres meses mensaxes y llamaes telefóniques per parte de Madiedo de conteníu políticu y personal, poles que dicía sentise vixilada ^[1]. Madiedo foi condergáu a pagar 20 euros a Coto mientres 20 díes y a nun averase a más de 500 metros a Cristina mientres 6 meses^[2].

El 8 d'ochobre de 2016 casóse con un expilotu de rallis, José Bernardo Pino.

Referencies

↑ diariocritico (14 de marzu de 2007). «Condergáu un dirixente 'popular' por inxuries a una collacia». Consultáu'l 14 d'ochobre de 2015.
↑ El Periódico de Aragón (15 de marzu de 2007). «Condergáu un dirixente del PP por acosu». Consultáu'l 14 d'ochobre de 2015.

Enllaces esternos

Cristina Coto en Facebook
Cristina Coto en Twitter

[1] riocritico (14 de marzu de 2007). «Condergáu un dirixente 'popular' por inxuries a una collacia». Consultáu'l 14 d'ochobre de 2015.

[2] El Periódico de Aragón (15 de marzu de 2007). «Condergáu un dirixente del PP por acosu». Consultáu'l 14 d'ochobre de 2015.

[1]

[2]