Benavides

De Wikipedia
Saltar a navegación Saltar a la gueta
Benavides
Quintanilla del Valle (León).jpg
Escudo de Benavides.svg
Alministración
PaísBandera d'España España
AutonomíaFlag of Castile and León.svg Castiella y Llión
ProvinciaBandera de León.svg Provincia de Llión
Tipu entidá conceyu d'España
alcalde de Benavides Ana Rosa Sopeña Ballina
Códigu postal 24280
Xeografía
Coordenaes 43°N 6°W / 43°N 6°W / 43; -6Coordenaes: 43°N 6°W / 43°N 6°W / 43; -6
Benavides is located in España
Benavides
Benavides
Benavides (España)
Superficie 74.02 km²
Altitú 840 m
Llenda con Villares d'Órbigu, San Justo de la Vega, Villaobispo de Otero, Villamejil, Quintana'l Castiellu, Turcia y Santa Marina del Rey
Demografía
Población 2522 hab. (2017)
Porcentaxe 0.54% de Provincia de Llión
Densidá 34,07 hab/km²
Más información
Estaya horaria UTC+01:00
www.aytobenavides.com
Cambiar los datos en Wikidata

Benavides, tamién denomináu Benavides d'Órbigu, ye un conceyu y llocalidá d'España, na provincia de Llión, comunidá autónoma de Castiella y Llión. Tien una área de 74,07 km² con una población de 2587 habitantes, según los datos del INE de 2017.

Benavides d'Órbigu[editar | editar la fonte]

Benavides d'Órbigu ye una villa de la provincia de Llión asitiáu xuntu al ríu Órbigu. Ye cabeza de conceyu, compuestu por dellos pueblos como son: Antoñán del Valle, Vega d'Antoñán, Gualtares d'Órbigu, Quintanilla del Monte y Quintanilla del Valle. Celebra les sos fiestes del 13 al 16 de setiembre n'honor al Benditu Cristu y el día de San Xuan celebren fiestes n'honor al "Barriu de San Xuan" en dicha llocalidá, amás de la fiesta del braniante n'honor a la gran cantidá de braniantes, campistes y turistes que recibe'l pueblu demientres el branu. En principiu basábase nel mercáu de ganáu y foi ganando importancia convirtiéndose en feria de diversos productos típicos y básicos de la fastera. La so economía básase principalmente na agricultura y pequeñes empreses familiares. Ye bien popular la so Fonte de los Ocho Caños, asitiada frente al Conceyu de la población. Dispon d'ambulatoriu médicu, biblioteca y piscina municipal.

Historia[editar | editar la fonte]

L'orixe de Benavides ye bastante inciertu. Hai quien afirma qu'el so orixe remóntase a más de dos mil doscientos años antes de Cristu. Argumentase cola esistencia d'unos poblaos prehistóricos nun cuetu esistente anguaño, llamáu La Chana de la Madalena. Otru argumentu ye la esistencia d'unos reis, los primeros d'Iberia dempués del diluviu universal. Unu d'esos reis llamábase Avides, voz d'orixe hebréu. Considérase qu'anteponiendo Ben, que significa fíu, tenemos el nome de Benavides, fíu de Avides. Yá tenemos población y nome. Ye posible y hasta probable que nel llugar que güei ocupa Benavides hubiera dalgún pobláu prehistóricu, dada la situación estratéxica y la bayura de recursos básicos pa la subsistencia.

Pero lo que güei conocemos y nomamos Benavides tien un orixe antiguu, pero non tantu, según les siguientes pruebes. Cola invasión árabe, la mayoría de los habitantes de l'actual provincia lleonesa emigraron al norte. El Rei Alfonso I (739-757) reconquistó la Ciudá de Llión. Sicasí, esti Rei destruyó casi toles poblaciones qu'había na provincia por non poder defendeles. Namás caltuvo Llión y Estorga y dellos monasterios. El Rei Ordoño I (850-866) foi'l primer rei qu'entamó la repoblación de la Ciudá de Llión y gran parte de les poblaciones de la provincia. La repoblación foi fecha con gallegos, ástures y mozárabes veníos del sur. Estos postreros, los mozárabes, teníen una doble cultura, la cristiana y la musulmana. Yeren billingües, falaben romance y árabe.

Na dómina d'Alfonso III (866-910) los moros tentaron de reconquistar Llión en dos ocasiones, nos años 882 y 883, pero nun lu algamaron y arrenunciaron de reconquistar el terrén perdíu. Ye a partir d'estos años cuando entama la repoblación o fundación de munches de les poblaciones lleoneses actuales, ente les que s'atopa Benavides.


El nome Benavides vien de la palabra árabe Bana-Vidas y Bane-Vidas, derivaos de Bani-Vidas, que significa fíos de Vidas. Estos nomes yá apaecen inclusive antes del añu 900 y el definitivu Benavides apaez per primer vegada nel añu 1194, según afirma don Ramón Menéndez Pidal. Arriendes d'ello, cabe suponer que la población de Benavides tien de tener el so orixe ente los años 850 y 900 y más concretamente ente los años 883 y 900.


Benavides yá yera a los cien años de la so fundación la población más importante de la Ribera del Órbigu, formando un territoriu de soberanía real, lo que llámase realengo. Foi bien posiblemente en tiempos del Rei Alfonso IX (1188-1230) cuando foi creáu'l Señoríu de Benavides. Dalgún hestoriador afirma que l'apellíu Benavides tien sangre real, d'unu de los fíos d'Alfonso IX y que esti fíu foi'l primer Señor de Benavides, Dalgunu hasta-y pon nome a esti primer Señor, Pedro Fernández de Llión. La lleenda, sicasí, axudica esti primer títulu a don Mendo de Benavides. Esti asegura que l'escudu d'armes del Señoríu de Benavides tien el so orixe nun privilexu d'Alfonso IX (un lleón con gules) escontra'l so propiu fíu al igual qu'el so güelu Alfonso VII dio un lleón como escudu al Rei de Zaragoza pola so reconocencia como vasallu al ser coronáu Emperador d'España.

Unu de los señores más conocíos y famosos foi Juan Alfonso de Benavides, que recibió del Rei Fernandu IV el privilexu del mercáu de los xueves el 28 d'agostu de 1306. Un mercáu llenu de franquicies y privilexos pa tolos xueves del añu. A partir d'esta fecha, Benavides algama la so mayor rellumanza, llegando a repoblar tierres na provincia de Zamora hasta Sanabria.

En tiempos del Rei Pedro I (1350-1369) Juan Alfonso de Benavides aportó a Mayor del Rei en Xusticia y Notariu Mayor d'Andalucía. El 7 d'agostu de 1358, por acciones de combate na Batalla del Salado concédese-y al Señoríu de Benavides el títulu de Mayoralgu caballerescu. El 14 de setiembre de 1408 el Señor Sánchez de Benavides presenta en Valladolid ante'l Rei Xuan II la carta fundacional del Mayoralgu de Benavides. Esi día 14 yera'l día de la Esaltación de la Santa Cruz, fiesta patronal de Benavides.

La influencia de los Benavides decai ante la preponderancia de los Condes de Lluna. El primeru d'ellos, Diego Fernández Quiñones y la so esposa Xuana Enríquez fundaron en 1460 el Conventu Franciscanu que perduró hasta la desamortización de Mendizábal, 18 de febreru de 1836. De la fortaleza y del palaciu de los Condes namá queda'l nome Prao Palaciu y del conventu de los Franciscanos caltiénense entá unes ruines.

Infraestructures[editar | editar la fonte]

En creciente desendolcu, cuenta con una escelente flota d'autobuses que comuniquen al pueblu coles grandes capitales españoles como Barcelona, Madrid, Sevilla... Benavides cunta amás con un ambulatoriu municipal que abarca tola ribera (aprox. 12.000 persones), tamién cunta con un polideportivu municipal, un auditoriu y escuela de música y una piscina municipal que según fontes oficiales ye visitada por hasta más de 800 persones diaries nos meses branizos.

Mercáu de los xueves[editar | editar la fonte]

En dicha llocalidá celébrase un mercáu tolos xueves dende fai 800 años, desque nel añu 1306 el rei Fernandu IV concediera dichu privilexu a la villa de Benavides d'Órbigu dándo-y una gran importancia económica a la llocalidá poniéndose al nivel de ciudaes como Llión, Estorga y Sahagún. Nel añu 2006 celebróse'l 7º centenariu del mercáu y pa conmemoralo hubo numberosos acontecimientos como la retresmisión del sortéu de la llotería de Navidá dende'l pueblu.

Demografía[editar | editar la fonte]

Gráfica d'evolución de Benavides ente 1857 y 2016
     Población de drechu según los censos de población del INE.[1]

     Población según la rellación d'unidaes poblacionales del INE.

Núcleos de población[editar | editar la fonte]

El conceyu de Benavides ta formáu por 6 núcleos de población, siendo Benavides el principal. Teníen la siguiente población en 2016 según el INE.[2]

Núcleu de Población Población
Benavides 1825
Quintanilla del Monte 439
Antoñán del Valle 165
Quintanilla del Valle 110
Vega d'Antoñán 41
Gualtares d'Órbigu 7

Comunicaciones[editar | editar la fonte]

Carreteres[editar | editar la fonte]

Benavides comunícase con delles carreteres llocales, la LE-420 y la LE-443. A escasos kilómetros atópase un accesu a la rede d'alta capacidá na AP-71.

Tresporte aéreu[editar | editar la fonte]

L'aeropuertu de Llión, qu'entró en serviciu nel añu 1999, ye l'aeropuertu más cercanu, atopándose a 31 kilómetros de Benavides. Según les estadístiques de Aena, en 2008 l'aeropuertu movió 122.809 pasaxeros, 5.700 operaciones y 15,9 tonelaes de carga.[3] Caltien vuelos con Madrid , Barcelona , Valencia, Tenerife y París tol añu, que se refuercen en temporada braniza con enllaces a Palma de Mallorca, Málaga, Eivissa, Gran Canaria y Menorca. Atópase somorguiáu amás nunes obres d'ampliación que se centren na construcción d'una nueva área terminal y na duplicación de la superficie actual de la plataforma.

Economía[editar | editar la fonte]

La economía de la villa de Benavides de Órbigo básase nel sector servicios, nel que cabe destacar el pesu que tien la restauración con más de 40 llocales d'esti tipu. Tamién son importantes l'agricultura (col cultivu del lúpulu y el maíz, sobremanera) y l'industria (fábriques cerámiques y del dulce, ente otres).

Ciudadanos pernomaos[editar | editar la fonte]

Referencies[editar | editar la fonte]

  1. INE. «Alteraciones de los municipios en los Censos de Población desde 1842». Consultáu'l 4 de mayo de 2016.
  2. Instituto Nacional de Estadística. «Nomenclátor: Población del Padrón Continuo por Unidad Poblacional». Consultáu'l 4 de marzo de 2016.
  3. Aena (ed.): «Estadística de aeropuertos españoles 2008». Archiváu dende l'orixinal, el 6 de marzo de 2009. Consultáu'l 21 de marzo de 2009.

Enllaces esternos[editar | editar la fonte]