Saltar al conteníu

.com

De Wikipedia
Artículu revisáu
Dominiu de primer nivel.com
Tipu dominiu de nivel superior xeográficu y dominiu de nivel cimeru xenéricu
Creáu 1985
Pertenez a la xurisdicción Estaos Xuníos
Cambiar los datos en Wikidata

El nome de dominiu .com ye un dominiu de nivel cimeru (TLD poles sos sigles n'inglés) que forma parte del Sistema de Nomes de Dominiu (DNS) d'Internet. El so nome remanez de la pallabra comercial», lo qu'indica qu'orixinalmente taba pensáu pa dominios rexistraos por organizaciones comerciales.[1] Sicasí, esta distinción finalmente perdióse cuando los rexistros pa los dominios .com, .org y .net abriéronse en forma illimitada.

Nun empiezu, el dominiu yera alministráu pol Departamentu de Defensa de los Estaos Xuníos, pero anguaño ye operáu por Verisign, y caltiénse so la xurisdicción postrera de la llei de los Estaos Xuníos.[2][3][4] Los rexistros de Verisign en .com son procesaos por rexistradores acreditaos pola Corporación d'Internet pa l'Asignación de Nomes y Númberos (ICANN poles sos sigles n'inglés) y aceuten los nomes de dominiu internacionalizaos.

El dominiu .com foi unu de los primeros dominios de nivel cimeru n'Internet cuando s'implementó'l Sistema de Nomes de Dominiu en xineru de 1985; los otros nomes de dominiu yeren .edu, .gov, .mil, .net, .org y .arpa. De magar, esti nome creció hasta convertise nel mayor dominiu de nivel cimeru.[5]

Magar cualquier compañía nel mundu puede rexistrar un dominiu .com, munchos países ufierten dominios de segundu nivel con un propósitu asemeyáu. Estos nomes de dominios lleven nomes de la forma .com.xx o .co.xx onde xx ye'l dominiu de nivel cimeru correspondiente al país. Dellos exemplos son Australia (.co.au), Reinu Xuníu (.co.uk), Arxentina (.com.ar) o Brasil (.com.br).

Historia[editar | editar la fonte]

El dominiu .com foi unu de los primeros dominios de nivel cimeru afitaos cuando se punxo per primer vegada en práctica'l Sistema de Nomes de Dominiu en xineru de 1985. Nesa dómina, el dominiu yera alministráu pol Departamentu de Defensa de los Estaos Xuníos; sicasí, el so caltenimientu taba fechu por SRI International como parte d'un contratu con esi departamentu. SRI International creó DDN-NIC, tamién conocida como SRI-NIC o a cencielles como NIC (Network Information Center), a la qu'entós s'aportaba al traviés del nome de dominiu nic.ddn.mil. A cuntar del 1 d'ochobre de 1991, diose un contratu d'operaciones a Government Systems Inc. (GSI), entidá que la subcontrató a Network Solutions Inc. (NSI).

El 1 de xineru de 1993, la National Science Foundation (NSF poles sos sigles n'inglés) asumió la responsabilidá pol caltenimientu del dominiu, por cuenta de que .com utilizábase mayoritariamente con fines ayenos a la defensa. D'esta manera, la NSF concedió un contratu d'operación a Network Solutions (NSI). En 1995, la NSF autorizó a NSI por qu'empezara a aplicar una tarifa añal a los rexistrantes per primer vegada dende l'entamu del dominiu. Nun empiezu, esta tarifa llegaba a los US$50 añales, de los cualos US$35 yeren pa NSI y US$15 pa un fondu del gobiernu. Los nuevos rexistros teníen de pagase polos dos primeros años, polo que la tarifa de rexistru d'un dominiu nuevu xubía a US$100. En 1997, el Departamentu de Comerciu de los Estaos Xuníos asumió l'autoridá de tolos dominios de nivel cimeru xenéricos. Anguaño, el dominiu ye operáu por Verisign tres la so compra a Network Solutions. Verisign dixebróse darréu de les funciones de Network Solutions que nun se rellacionaben col rexistru y creó una compañía estremada que sigue como rexistrador. N'inglés el nome del dominiu escríbise con frecuencia con un puntu antepuestu y pronúnciase xeneralmente como «dot com», que ye'l nome col qu'ingresó a la fala corriente.

Magar qu'orixinalmente los dominios.com buscaben designar a entidaes comerciales (otres entidaes como los organismos de gobiernu o les instituciones d'educación teníen asignaos otros dominios de nivel cimeru), dende mediaos de los años 90 nun hebo restricciones al respective de quien pue rexistrar esti tipu de dominios. Cola comercialización y la popularización d'Internet, el dominiu.com abrióse al públicu y convirtióse aína nel dominiu de nivel cimeru más común pa sitios web, correos electrónicos y redes. Munches empreses qu'espolletaron nel periodu entendíu ente 1997 y 2001 (dómina conocida como la Burbuya puntu com») incorporaron el sufixu .com nos nomes de les compañíes, les que se fixeron conocíes como los puntu-com o como empreses puntu com. La introducción del nome de dominiu .biz en 2001, que ta acutáu a los negocios, nun tuvo nengún impautu na popularidá de.com.

N'avientu de 2011, Verisign informó qu'había aproximao 100 millones de dominios .com rexistraos. Según cifres de Verisign a marzu de 2009, el dominiu yera atendíu por 926 rexistradores acreditaos.

Referencies[editar | editar la fonte]

  1. [rfc:920 Documentu que define'l dominiu .com y otros de los dominios xenéricos]
  2. «US shuts down Canadian gambling site». The Register.
  3. «Les ".com" peuvent être saisis par les autorités américaines». PC World magazine. Archiváu dende l'orixinal, el 16 de payares de 2015.
  4. «No need for SOPA, VeriSign seizes bodog.com for US authorities». TECHSPOT.
  5. «Informe sobre la industria de nombres de dominio».

Enllaces esternos[editar | editar la fonte]

  • RFC 920 Documentu que define'l dominiu.com y otros de los dominios xenéricos.