Salvador Allende

De Uiquipedia
Saltar a: navegación, buscar
Sellu cola imaxe del presidente

Salvador Allende Gossens (Valparaíso, 26 de xunu de 1908 - Santiago de Chile, 11 de setiembre de 1973), médicu y políticu socialista chilenu.

Foi Presidente de Chile ente 1970 y 1973. Nun algamó a completar el so mandatu, que llegaba hasta 1976, por mor del Golpe d'Estáu del 11 de setiembre de 1973, que lu derrocó y implantó'l Réxime Militar nel país. La so muerte ocurrió demientres l'asaltu al Palaciu de la Moneda.

Familia[editar | editar la fonte]

L'aniciu de los Allende ye vascu. Los sos antepasaos llegaron a Chile demientres el sieglu XVII. El más destacáu de la familia foi'l güelu Ramón Allende Padín, «El Rojo», radical y gran maestru de la masonería.

El so fíu, Salvador Allende Castro, foi tamién radical y masón. Trabayó como funcionariu públicu y como notariu del puertu de Valparaíso. Casó con Laura Gossens, muyer de muncha relixosidá, fía d'un inmigrante belxicanu y una dama de la ciudá de Concepción.

La familia de Allende yera burguesa, so padre viaxó y treslladó a la so familia a lo llargo del país, por mor de los estremaos cargos que tenía qu'asumir na administración pública. Por esti motivu los primeros 8 años de vida d'Allende tuvieron llugar en Tacna.

Allende entamó los sos estudios na Estaya Preparatoria del Licáu de Tacna. Depués de 8 años en Tacna, la familia treslladóse por un tiempu a Iquique, en 1918. Valdivia sería'l siguiente destín, en 1919. Siguió los sos estudios nel Licéu de Valdivia.

El regresu a Valparaíso tuvo llugar en 1921, al ser el padre abogáu de la Corte d'Apelaciones de dicha ciudá. Allí Allende, mientres continuaba los sos estudios, conoció a Juan Demarchi, vieyu zapateru anarquista, y según les confesiones del mesmu Allende, tendríen una influencia fundamental. Dellos autores creen, qu'esta rellación ta enforma mitificada y que la influencia del zapateru sería menor.

Finalizó los sos estudios secundarios en 1924, y decidió facer el serviciu militar, que realizó por un añu nel Reximientu de Llanceros de Tacna.

Ingresó a la Universidá de Chile a estudiar medicina, a pesar de que tenía dudes ente seguir esta carrera o Derechu. Vivió cola tía paterna, Anita, pa depués llevar una vida y inestabilidá residencial, de pensión en pensión pa poder sobrevivir. Obtuvo de promediu xeneral en acabando los sos estudios una nota cinco. La so tesis doctoral de 1933, "Hixene mental y delincuencia", foi asoleyada en 2005.

Vida política[editar | editar la fonte]

En 1929 yá entamar la so actividá política, entrando nel grupu Avance, llegó a ser vicepresidente de la FECh en 1930, pero la so oposición a delles posiciones del grupu, durante los meses previos a la caída de la dictadura de Carlos Ibáñez del Campo, foi espulsáu del grupu. A pesar d'eso siguió actuando como líder estudiantil, lo que-y valió la so detención. Mientres s'atopaba encerráu enteróse que so padre agonizaba debido a un casu avanzáu de diabetes. Permitieron-y salir, y llegó a velu con vida.

Depués d'estos dramáticos fechos, Allende decidió terminar la so memoria Hixene mental y delincuencia y a conseguir trabayu estable, pero tuvo que pasar llargu tiempu d'hospital n'hospital, hasta convertise n'ayudante d'anatomía patolóxica del Hospital Van Buren.

En 1933, participó na fundación del Partido Socialista de Chile, organizando la sé de la so ciudá natal, manteniéndose nesti partíu tola vida. Dos años después xuniríase a la masonería. La etapa política d'Allende entamaba, y nun pararía hasta'l 11 de setiembre de 1973.

Paralelamente a la so actividá militante yera director de l'Asociación Médica de Chile en Valparaíso y miembru del Directoriu Nacional d'esa organización, convirtióse en 1935 n'editor del Boletín Médico de Chile y organizador de la Revista de Medicina Social de Valparaíso.

Comprometióse fuertemente col proyeutu del Frente Popular, integrándose los socialistes al pactu depués d'un Congresu realizáu en 1936. Allende ceo se convirtió en presidente del Frente Popular en Valparaíso. Dentro del Partíu foi xefe de Nucleu (1933), secretariu seccional (1934) y secretariu del comité rexonal de Valparaíso (1937-39).

El so partíu proclamólu candidatu a la 6ª agrupación departamental de Quillota y Valparaíso, resultando eleutu xunto a otros dos socialistes. Entamó la so vida parlamentaria col pidimientu al presidente de la Cámara que los 17 diputados socialistes prometieran y non xuraran, pidimientu que foi aceptáu. Como diputáu participó principalmente na realización d'estemayos proyectos de lleis relatives a problemas sociales.

Demientres la campaña presidencial de Pedro Aguirre Cerda, Allende foi elixíu pa dirixir la campaña en Valparaíso. Dexó l'escañu parlamentariu pa xunise al nuevu gobiernu como ministru de Salubridá, dende ochobre de 1939, con 31 años. Esi mismu añu asoleyóse'l so trabayu "la realidad médico social", obra importante de la salú pública con énfasis na medicina social, na que se señalaba que'l principal condicionante del nivel de salú d'una población ye'l so nivel socioeconómicu. Al entamar la so vida ministerial, en 1940 casóse con Hortensia Bussi Soto.

Unos meses depués de que'l Partíu Socialista dexara'l Frente Popular, Allende retiróse del Ministeriu, asumiendo como vicepresidente de la Caxa de Seguru Obreru Obligatoriu. En 1943 convirtióse en secretariu xeneral del Partíu Socialista, ocupando'l cargu hasta xunu de 1944.

L'añu 1945 foi senador por Valdivia, Llanquihue, Chiloé, Aisén y Magallanes. L'añu 1953, por Tarapacá y Antofagasta. En 1961, por Aconcagua y Valparaíso. L'añu 1969, nuevamente por Chiloé, Aisén y Magallanes.

Los sos enemigos dientro del Partíu intentaron sacalu de la vida política enviándolu a les circunscripciones de Valparaíso y Aconcagua, onde yera imposible que ganara, porque los votos de la izquierda controlábalos Jaime Barros, comunista y médicu de los probes. Allende trunfó sobrepasando al so compañeru y dio-y abondos votos pa que salieren los dos eleutos. Enviáronlu entós nuevamente a un «mataderu eleutoral»: Chiloé, Aisén y Magallanes, onde naide-y daba ninguna oportunidad. Pero resultó fácilmente elixíu.

Yera'l símbolu nacional del socialismu moderadu, llegando a exercer dende 1966 la Presidencia del Senáu, d'una forma tan ecuánime que cuando l'abandonó rindió-y un homenaxe'l diariu derechista El Mercurio.

Presentóse por primera vez a la Presidencia de Chile en 1952, consiguiendo un ruin 5,45%, lo que se debió en parte a la escisión d'un sector del socialismu que sofitó a Carlos Ibáñez y a la proscripción del comunismu.

En 1958 presentóse nuevamente como candidatu de l'alianza socialista-comunista FRAP (Frente de Acción Popular), consiguiendo'l 28,5% de los votos. Esta vez atribuyóse la derrota d'Allende a la participación d'un candidatupopulista, Antonio Zamorano, que-y quitaría votos de sectores populares.

Foi candidatu a la Presidencia por tercera vez nel añu 1964, nuevamente representando al FRAP. La eleición convirtióse nuna competencia ente Allende y Eduardo Frei Montalva. Por temor a que trunfara Allende, l'eleutoráu de derecha volcóse hacia Frei, en llugar de al radical Julio Durán, que yera'l so candidatu inicial.

Enfrentáu a dos de los tres tercios de la política chilena, Allende foi derrotáu por tercera vez con un 38,6% de los votos contra el 55,6% de Frei.

Les presidenciales de 1970[editar | editar la fonte]

Nun foi fácil pa Allende conseguir la nominación como candidatu de la Unidad Popular (nueva alianza socialista-comunista, más otros partíos menores). Pesaben sobre él les sos tres derrotes y munchos dientro del Partíu non creíen na so «vía chilena al socialismu». Pero consiguió imponese sobre los demás precandidatos, principalmente pol so importante arrastre de votos y pol decisivu sofitu del Partíu Comunista (qu'apoyaba a Allende más que'l so propiu partíu).

Pero viose obligáu a firmar un pactu de gobiernu, pol que si trunfaba, l'administración de Chile sería compartida ente Allende y los partíos de la Unidad Popular, representada por un comité, que tendría un representante de cada colectividá. Esto implicaba una renuncia a les sos facultaes como presidente de la República, puesto que nun podría actuar ensin el sofitu del comité, y ésti funcionaba por unanimidá.

La campaña presidencial del añu 1970 foi dura pero ensin violencia. Les primeres encuestes daben por ganador, con mayoría absoluta, a Jorge Alessandri Rodríguez, candidatu de derecha. Pero la so campaña foi deteriorándose, principalmente pola so avanzada edá.

Seguros de la victoria d'Alessandri, los sos partidarios enraxonáronse cuando nuna entrevista d'El Mercurio se-y entrugó al xeneral en xefe del exércitu, René Schneider pola actitú del Exércitu si ningunu de los dos candidatos obtenía mayoría absoluta. Schneider señaló que debía responder el Congresu plenu, según lo establecío na Constitución y que l'Exércitu averaríase dafechu a los postulaos de la carta fundamental.

Los alessandristes enraxonáronse porque la tradición yera elixir presidente al que sacase mayoría relativa.

El candidatu del Partido Demócrata Cristiano, Radomiro Tomic, tenía un pensamientu orientáu hacia la izquierda, lo que fizo que los votantes de centro derecha-y dieran la victoria a Frei.

Estaos Xuníos nun-y dio sofitu decidíu a ningún candidatu anti Allende, principalmente porque les sos propies encuestes amosaben a Alessandri como trunfador. Aunque derivaron dellos fondos a Alessandri, por medio de la compañía ITT (International Telephone & Telegraph) (alrededor de 350.000 dólares), tal financiamientu nun se compara col que se-y dio durante la campaña de Frei, cuando además existió asistencia eleutoral.

El 4 de setiembre celebróse la eleición presidencial, nun clima d'orden y tranquilidá, y pasada la medianueche súpose'l resultáu de los comicios: Allende: 36,6% Alessandri: 34,9% Tomic: 27,8%. La confianza de los alessandristes tornóse en miéu a un gobiernu socialista, mientres los allendistas y incluso dellos demócratacristianos salíen a la cai a espresar la so gayola.

En Washington, Richard Nixon ordenó evitar qu'Allende asumiera la presidencia. La CIA entamó dos planes pa detener la eleición d'Allende nel Congresu (el Congresu debía dirimir ente les dos más altes mayoríes el día 24 d'ochobre), los que seríen conocíos como el Track One y el Track Two:

  • El Track One consistía en que'l Congresu elixese a Alessandri; ésti renunciaría y llamaríase a nueves eleiciones en que la derecha sofitaría a Eduardo Frei. El plan ye conocíu tamién como «gambito Frei». El plan nun funcionó. La DC y la UP llegaron a un entendimientu depués del trunfu d'Allende, y revelóse la existencia d'un pactu secretu ente los dos candidatos d'izquierda (Tomic y Allende) nel que cada unu reconocía la victoria del otru si la diferencia yera mayor a los 5.000 votos, y la d'Alessandri sólo si ésti los superaba a los dos por más de 100.000 votos. Finalmente, la Democracia Cristiana exixó pal so sofitu nel Congresu un estatutu de garantíes constitucionales, qu'aseguraríen qu'Allende nun se saldría de la constitución. El Track One fracasó, quedando entonces el Track Two
  • El Track Two consistía en crear un clima d'inestabilidá política, pa que les Fuerces Armaes intervinieren y anularen la eleición. Encargóse la execución al xeneral Roberto Viaux. El plan yera secuestrar al comandante en xefe del Exércitu, xeneral René Schneider, ocultalu y provocar la situación d'inestabilidá. El 22 d'ochobre executóse'l plan, pero, al intentar defendere, el xeneral foi baleáu polos sos asaltantes, que fuxeron darréu. El so xofer llevólu al Hospital Militar onde morrió'l día 25 d'ochobre.

El día anterior, el 24 d'ochobre, entamó la votación del Congresu. Votaron 195 parlamentarios. En acabando el recuentu el secretariu de la Cámara anunció: Salvador Allende Gossens, 153 votos; Jorge Alessandri Rodríguez, 35 votos; en blanco, 7 votos.

Presidencia[editar | editar la fonte]

El primer añu[editar | editar la fonte]

El 3 de payares Allende asumió la presidencia nel Congresu Nacional. Depués dirixóse a la catedral al Te Deum ecuménicu celebráu por toles ilesies de Chile. Xunto al presidente xuraron esi mesmu día los sos ministros.

El plan gubernamental[editar | editar la fonte]

De tolos ministros la pieza maestra yera Pedro Vuskovic, que llevaría a cabu'l plan de transición del capitalismu al socialismu. El plan de la Unidad Popular pa llegar al «socialismu a la chilena» consistía nos siguientes puntos:

  • Estatización de les árees «claves» de la economía.
  • Nacionalización de la Gran Minería del Cobre.
  • Aceleración de la reforma agraria.
  • Conxelar los precios de les mercancíes.
  • Aumentar los salarios de los trabajadores, pagándolos con emisión de billetes.
  • Con un clima de euforia económica, modificar la constitución y crear una cámara única.

La estatización de les empreses llevóse a cabu col usu de delles resquiebres llegales, que databen de la República Socialista, que cayeron nel escaecimientu pero que non por eso dexaben de tener valor llegal. El resquiciu consistía en que cuando dalguna empresa considerada clave de la economía detenía la producción, l'Estáu podía intervenila pa que vuelva a producir. El sistema utilizáu yera paralizar les empreses con trabayadores pro Unidad Popular, que pedíen la intervención del gobiernu, que requisaba la industria. El sistema foi xuzgáu illegal pola derecha, pero foi sancionáu como llegal pola Contraloría de la República.

Tamién s'usaba'l sistema más clásicu de compres d'acciones, a través de la CORFO (Corporación de Fomentu de la Producción), cuando la empresa yera una sociedá anónima.

La nacionalización de la minería llevóse a cabu col sofitu unánime de toles etayes de la sociedá, siendo aprobada la so Ley el 15 de xunetu) por unanimidá nel Congresu. A les empreses mineres se pagaríase-yos una indemnización, pero restándo-yos les «utilidaes excesives» que tuvieran nos últimos años, productu de los baxos impuestos que pagaben (a veces nulos). Por esti sistema les empreses Anaconda y Kennecott nun recibieron un solu centavu.

Estes acciones del gobiernu motivaríen a Richard Nixon y al so secretariu d'Estáu Henry Kissinger pa promover un boicot contra'l gobiernu d'Allende, per aciu del negazu de créditos esternos y el pidimentu d'un embargu al cobre chilenu.

P'afondar la reforma agraria siguió utilizándose la llei de reforma agraria d'Eduardo Frei, que tenía dellos vacíos llegales que la Unidad Popular aprovechó al máximo, propiciando la «toma de tierres» polos campesinos, faciendo que la CORA (Corporación de la Reforma Agraria) espropiara los fondos. A finales del añu 1971 llevóse a cabu la espropiación de más de dos millones d'hectárees. Estes tomes entamaron a adquirir tintes más y más violentos, polos enfrentamientos ente terratenientes y campesinos. El primer muertu foi Rolando Matus, pequeño agricultor muerto a tiros cuando defendía una propiedá mínima nel sur de Chile contra los que intentaben ocupala pola fuerza. La derecha convirtiólu nun mártir, bautizando col so nome a una de les sos brigaes.

El conxelamientu de precios y l'aumentu de sueldos debieron provocar inflación, pero en Chile un 20% de la capacidá productiva taba ociosa, y antes de subir los precios, los comerciantes aprovecharon esa capacidá, xenerando crecimientu económicu. Arriendes d'ello, nel pensamientu de los economistas de la Unidad Popular, les emisiones de dinero teníen un lapsu de tiempu durante'l que nun producíen inflación, al menos momentáneamente. Y funcionó, al menos el primer añu, nel que se dobló el dineru, la inflación foi baxa y el Productu Interior Brutu medró un 8%.

Tamién ayudó a la promoción de la UP que'l poeta nacional Pablo Neruda, militante comunista, obtuviera el Premiu Nobel de Lliteratura esi mesmu añu.

Con esti clima, la Unidad Popular algamó un 49,731% de los votos nes eleiciones municipales. Pero esi resultáu non se reflexó nes eleiciones parlamentaries de 1973, cuando solo obtuvo un terciu de los parlamentarios. La única solución pa ganase'l poder llexislativu foi la propuesta de cambiar a un sistema de Cámara única.

Pero esa propuesta nun prosperó y la bonanza económica entamó a fallar. Acabando 1971 apareceríen los primeros síntomas de desabastecimientu. Cuando Allende volvió a plantear al Congresu la idea d'una Cámara única, ya pocos taban interesados na idea. Les nociones de Revolución violenta y llucha de clases, en cambio, ganaben fuerza.

A finales d'esi añu Fidel Castro visitó Chile. Recorrió tol país, lo que molestó a los opositores a la Unidad Popular y n'especial a Kissinger. Ye también nesa fecha cuando entamen a ves los primeros síntomas del desabastecimientu.

El 2 d'avientu de 1971, un informe secretu de la CIA despacháu a Washington reveló les recomendaciones privadas de Castro a los líderes de la UP. Según el documentu Fidel dixo: "Existen muy poques posibilidaes de construir un Estáu Marxista en Chile si nun s'usa la violencia".

Mientres, miles de muyeres opositoras salieron a les cais a protestar, faciendo sonar potes vacíes por mor de la falta d'alimentos, nesi momentu Fidel Castro recorrió en coche la zona oriente de Santiago, pues quería ver a les muyeres que protestaben colos sos propios güeyos. Según un ex funcionariu de la Cancillería Chilena , Fidel Castro quedó impresionáu y na recepción posterior instó a Allende a reprimir con mano dura la manifestación, a lo qu'esti-y contestó "Aquí yo soy el Presidente". Pese a ello Fidel Castro encamentó que les muyeres de la UP salieren a les cais a contrarrestar les manifestaciones y dictaminó que "la UP nun debía preocupase pola posibilidá de muertos y heridos, yá que la confrontación ye'l verdaderu camín hacia la revolución".

Nel actu de despedida del Estadiu Nacional, el comandante cubanu dio la última estocada. Eludiendo tou afalagu al procesu chilenu, dixo qu'él y la so comitiva "nun veníamos a aprender coses caduques na historia... yá aprendimos abondo de es llibertaes burgueses y capitalistes". Amestó: "Nun tamos seguros dafechu que nesti singular procesu el pueblu chilenu estuviera aprendiendo más rápidamente que los reaccionarios" Al despedise, nel Estadiu dixo: «Torno a Cuba más revolucionariu, radical y estremista de lo que vine».

Polarización de la sociedá chilena[editar | editar la fonte]

La Democracia Cristiana, pol programa de Radomiro Tomic, tuvo un averamientu inicial cola Unidad Popular, pero alloñóse por mor del asesinatu del ex ministru de Frei, Edmundo Pérez Zujovic, porl grupo VOP (Vanguardia Organizada del Pueblo) de tendencia ultra izquierdista, en xunu de 1971.

La Democracia Cristiana averóse al PN (Partido Nacional, de tendencia derechista). La so primera acción conxunta diose na eleición complementaria d'un diputáu en Valparaíso, na que'l candidatu demócratacristianu ganó col sofitu del PN.

Allende removió a Tohá del Ministeriu del Interior, pero lu colocó inmediatamente na cartera de Defensa, nun actu que sinterpretó como de provocación hacia'l Congresu, aunque llegalmente inobxetable. Entamó d'esta manera l'alianza DC-PN pa oponese al gobiernu de la Unidad Popular, realizando multitudinaries manifestaciones refugando la política del Gobiernu, que daríen pasu a verdaderes batalles ente los manifestantes y grupos de izquierda.

Nel aspectu llegal, la DC y la derecha aprobaron una reforma constitucional, que definió les tres árees clave de la economía y colocó torgues al plan estatizador de la Unidad Popular, dexando ensin efectu les nacionalizaciones efectuaes con anterioridá al filu de la llei. El presidente veta'l proyectu, y la insistencia de la cámara por aprobalu crea un conflictu llegal que se desarrolla durante tol gobiernu d'Allende.

La violencia política espárdese. El Movimiento de Izquierda Revolucionaria (MIR) intensificó les sos actividaes terroristes, y el PS (Partido Socialista de Chile) elixó como directiva al ala más radical del socialismu, dirixida pol senador Carlos Altamirano. Los dos grupos desconfiaben de la vía pacífica d'Allende y seguíen las enseñances del Che Guevara sobre la llucha subversiva.

Yá se viera actuar a extremistes nel asesinatu de Pérez Zujovic, y agora entamaron a armar a grupos de trabayadores y pobladores afines coles sos idees, creándose los llamaos «cordones industriales».

N'ocasiones, el Gobiernu negóse a usar la fuerza policial pa controlar estes acciones (en casos de tomes de fábriques y radios opositores), siendo, en xeneral, tibiu na so reacción. La razón d'ello ye que los que realicen estes acciones son xente de la Unidad Popular, que lluchen pol socialism.

El mesmu Gobiernu se vio envueltu nun casu d'importación illegal d'armes dende Cuba, al llegar un avión d'esa nacionalidá que nun foi rexistráu y que se treslladó darréu a la casa presidencial de Tomás Moro.

Na derecha, el grupu facista Patria y Libertad, lideráu por Pablo Rodríguez, intensificó los sos actos de terrorismu. Manifestaciones a favor o en contra del Gobiernu siguiéronse continuamente, llegando a tintes de violencia gravísimos. Los grupos Ramona Parra (comunista) y Elmo Catalán (socialista), enfrentáronse a la Rolando Matus (del Partido Nacional).

Mientres tanto, la economía dexó de crecer. La emisión inorgánica de dineru cobró les sos primeres víctimes y la inflación disparóse. El crecimientu del país llegó a ser negativu, cayeron los salarios reales, el déficit llegó al 25% del PIB y la deuda esterna algamó los 253 millones de dólares.

La política oficial de precios dio llugar el «mercáu negru», onde se vendíen los productos a precios multiplicaos, lo que llevó a la desaparición de productos básicos de consumu, provocando llargues files de xente pa obtener mercancíes. Dineru había, los sueldos yeren altos, pero nun había ónde gastalu.

Para enfrentar el desabastecimientu, el Gobiernu creó les Xuntes d'Abastecimientu y Precios, que seríen otru factor de discordia ente «los momios» (descalificativu aplicáu a los miembros de la derecha) y «los upelientos» (descalificativu aplicáu a los partidarios del Gobiernu), acusándose a les Xuntes de favorecer los negocios gubernamentales y perxudicar a los independientes o opositores.

La resistencia gremial tornóse más fuerte, col sofitu de la prensa opositora qu'atacaron al Gobiernu. Destacaron titulares como: «MIRicones atacaron a mujeres»; «¡Allendista! Asesinó a otro camionero»; «Nunca antes un presidente contó con tanto fervor popular unido en un solo grito: ¡Que se vaya!», etc.

Por su parte la prensa izquierdista tampoco se quedó atrás, aprovechando cualquier cosa pa desacreditar a los sos rivales (por exemplu, escribir Pe-Ene en llugar de PN, «Frei, espía de los EE.UU.»; «¡Chúpense esta, momios!»; «Senado ampara a ladrones de alimento», etc.

Los medios opositores y los gremios empresariales llevantaron como bandera de la so llucha a la Papelera, empresa proveedora y distribuidora de papel. Cola so nacionalización, la oposición tarrecía que'l Gobiernu pudiera controlar la prensa opositora y callar les sos demandes.

La grave situación económica y el tarrecimientu a ser nacionalizaos, llevó a l'Agrupación de Dueños de Camiones lideraos por León Vilarín, col sofitu d'otros gremios, a realizar un paru nacional n'ochobre, agravándose tovía más los problemas de distribución. Nesti paru taba detrás dineru de la CIA, que conspiraba pa facer cayer el gobiernu d'Allende, entregando tamién recursos a diarios opositores. La oposición plegóse a la movilización, quedando'l país virtualmente paralizáu.

Los camioneros enviaron les sos demandas no que se conoció como'l «pliegu de Chile», onde se demandaba'l fin de les clausures radiales, la banca única, l'afogamientu de la Papelera y otras demandas asemeyaes.

El paru sólo se detuvo col ingresu de miembros de les Fuerces Armaes a los Ministerios: el comandante en xefe del exércitu, Carlos Prats, n'Interior; el contralmirante Ismael Huerta n'Obres Públiques, y el xeneral Claudio Sepúlveda en Minería.

1973, el francimientu de la democracia[editar | editar la fonte]

Sellu URSS

En marzu de 1973 tuvieron llugar les eleiciones parlamentaries. La oposición, amestada na CODE (Confederación de la Democracia) naguaba por obtener dos tercios del Congresu. Si lo algamaba, podría emitir una acusación constitucional contra Allende y destituilu de la presidencia. Pero la UP algamó'l 43,3% de los votos y la CODE el 55%.

Allende, buscando una solución a la crisis, intentó un acercamientu cola DC. El primer intentu foi col proyectu de reforma constitucional Hamilton-Fuentealba que foi vetáu pol Executivu. Antes de que'l Parlamentu respondiese al vetu, tuvieron llugar una riestra de conversaciones ente'l Gobiernu y la DC pa facer aprobar la reforma, de tal forma que'l trespasu de les empreses al «área social» de la economía, fuera lleal y pacíficu. La piedra de tope yera qu'habría que devolver les empreses tomaes illegalmente o de forma llegalmente duldosa.

L'acuerdu nun se concretó debido a la oposición del PS, pol contrario, el Partíu Comunista, trabayó pol entendimientu.

Otru intentu d'averamientu foi propuestu pol cardenal Raúl Silva Henríquez, propiciando un diálogu ente Allende y el presidente de la DC Patricio Aylwin, pa buscar un acuerdu que permitiera superar esta situación. Pero'l diálogu nun prosperó. Según el cardenal, foi la intransixencia de la UP la que fizo fracasar la búsqueda de consensu, pero hai que considerar tamién la oposición al diálogu que manifestó Frei, y de que Aylwin pedía ministros militares con poderes amplios, que dexaríen fuera del poder a la UP.

A Allende nun-y queden munches opciones. Si el golpe d'Estado tovía nun se daba, foi porque'l recuerdu del comandante René Schneider y la so doctrina (según la cual les Fuerces Armaes deben apegase dafechu a la Constitución y les Lleis) los deteníen. Pero'l recuerdu diba esfumándose, y la realidá impulsábalos a tomar el camín del golpe d'Estáu. Sectores civiles opositores al gobiernu manifestáronse frente a los cuarteles tirando trigu y maíz. Según sostienen delles fontes, les acciones d'estos sectores yeren directamente financiaes pola CIA. Sin embargo, el comandante en xefe yera Carlos Prats, qu'enxamás se plegaría a un golpe d'Estáu, polo que si les otres rames de les fuerces armaes lo intentaben, podrían eventualmente enfrentase al Exércitou y entamase una guerra civil. El Partíu Comunista entamó entós la so campaña «No a la Guerra Civil». Pero nesos mesmos instantes críticos, Carlos Altamirano, secretariu xeneral del PS, dicía: «El golpe nun se combate con diálogos, aplástase cola fuerza del pueblu».

Esto alimentó a los golpistes. La violencia tornóse cada vez más intensa, averándose a la barrera de los 100 muertos por violencia política durante'l gobiernu d'Allende. Un nuevu focu de violencia se creó ente'l estudiantáu pol proyectu de la Escuela Nacional Unificada (ENU), que pretendía pasar d'una educación basada nos valores del capitalismu a una con valores del «home nuevu» del socialism. La FEUC (Federación de Estudiantes de la Universidad Católica) llamó a defender la llibertá educacional contra l'«instrumentu de concientización política del marxismu». La Feses (Federación de Estudiantes Secundarios) dixebróse ente los que sofitaben la ENU, y los que la refugaben. Finalmente el proyectu foi retardáu a pidimientu del cardenal.

El 11 de xunu el Congresu aprobó la reforma constitucional por 106 votos, que volvió inexpropiables los predios inferiores a 40 hectaries y dio garantíes a los comerciantes y transportistes. Allende negóse a promulgar tola reforma, y solo publicó la que nun tien grandes diferencies la DC cola UP. Basóse na facultá que tien el presidente de vetar una Llei, y ésta debe ser aprobada por 2/3 de los votos pa sobrepasar el vetu. La oposición consideró esti actu inconstitucional, y la Contraloría Xeneral de la República dio-y la razón. Agora Allende púsose nel filu de la llei, (fuera d'ella, según l'apreciación de la oposición), al ignorar les facultaes de la Contraloría y del poder Llexislativu.

El xeneral Carlos Prats, que cada día se vía con menos sofitu, sufrió un incidente el 27 de xunu. Mientres viaxaba nel so coche, averóse-y una furgoneta dende la que los pasaxeros entamaron a face-y burla. Prats, alarmáu, trató de evitales, recordando lo ocurrido col xeneral Schneider. El conductor de la furgonetale saca la llingua y el xeneral disparó-y al coche, que se detuvo nel intre. Prats baxose y recibió una gran sospresa al dase cuenta qu'«el conductor» yera en realidá una conductora, Alejandrina Cox. Ablucáu, el comandante se vio pronto arrodiáu d'una brañada de xente que lu rechazaba. Al regresar al centro de Santiago presentó la so renuncia ante'l presidente, que nun-y la aceptó. Un fecho ocurríu dos díes depués lo salvaría frente a la opinión publica, pol momentu.

El 29 de xunu, el reximientu blindáu N° 2, al mandu del coronel Roberto Souper, protagonizó un llevantamientu militar contra'l Gobiernu, usando varios tanques, un porta tanques y dos camiones con 40 homes cada unu. Los sublevaos intentaron tomar el Palaciu de la Moneda, enfrentándose a les Fuerces de la Guarnición, dirixíes pol comandante Carlos Prats en persona, que puso en riesgu la so vida pa obtener la rendición de los sublevaos. Los miembros de Patria y Libertad, qu'afalaron el golpe, asiláronse na Embaxada d'Ecuador. El resultáu final d'esti intentu fue conocíu como «tanquetazu», que dexó 20 muertos.

Alarmáu, Allende llamó nuevamente a los uniformaos a integrar el gabinete, nesta ocasión colos cuatro miembros máximos de les Fuerces Armaes, mientres planeó la so última arma pa salir de la crisis: un plebiscitu.

El fallíu plebiscitu[editar | editar la fonte]

El plebiscitu debía consultar a los chilenos sobre'l so mandatu, y renunciaría si'l resultáu yera negativu. Si s'aprobaba el plebiscitu, el golpe tornábase improbable, y si perdía (lo más probable pola composición política del país), retiraríase cola cabeza alta por dexar el mandatu, non poles presiones opositores sinon por designiu de la ciudadanía.

Pero'l so problema taba nel Comité de la Unidad Popular, que nun aceptó la idea del plebiscitu.

Intentó nuevamente la idea del plebiscitu a principios de setiembre, pero siguió la oposición del Partíu Socialista. El comunismu dio, entós, vía llibre a Allende para qu'ésti, si asna lo deseaba, proclamase'l plebiscitu a pesar del vetu socialista.

Una xestión d'Orlando Letelier, convenció al PS pa que retirase'l vetu. Allende podría finalmente convocar al plebiscitu, pero la xestión de Letelier ocurrió na nueche del 10 de setiembre, cuando'l golpe d'Estáu yá yera inevitable.

El 11 de setiembre[editar | editar la fonte]

El 10 de setiembre zarpó la escuadra, tal y como etaba previsto, áa que debía participar nes maniobres navales internacionales. Mientres tanto, l'Exércitu acuartelóse. La razón dada: el probable desafueru d'Altamirano y Garretón el día 11. Esti desafueru, según explicó Pinochet al ministru de Defensa Orlando Letelier, podía causar disturbios, polo que se facía necesario l'acuartelamientu.

Na madrugada del 11 de setiembre, la escuadra reapareció en Valparaíso y les Fuerces Armaes tomaron la ciudá. El prefecto de Valparaíso fizo una llamada pol únicu teléfonu que funcionaba nel puertu, el suyu, pa avisar al subdirector de Carabineros, que la infantería de marina taba nes cais y entamara a tomar posiciones de combate. El subdirector telefoneó a Allende, que s'atopaba na so residencia de Tomás Moro. Allende, calmáu, pidió localizar a Pinochet y a Leigh, pero taben ilocalizables.

Allende y el GAP empobináronse hacia'l Palaciu de la Moneda. Cargaba con un fusil AK-47 (regalu de Fidel Castro) y el GAP ingresó al palacio de Gobiernu dos ametralladores y tres RPG-7, además de les sos armes personales.

Paralelamente, llegó a esa hora Pinochet al Comando de Comunicaciones, un poco retrasáu. Organizáronse les redes de comunicaciones coles demás rames de las Fuerces Armaes, especialmente con Leigh, que s'atopaba na Academia de Guerra Aérea, y con Patricio Carvajal, que sería el coordinador de tol golpe.

La Cadena Democrática, formada poles radios Minería y Agricultura, emitió la primera proclama militar. Allende debía facer entrega inmediata del so cargu a la Xunta de Gobiernu, integrada polos xefes supremos de les Fueres Armaes: Pinochet, Leigh, Merino y Mendoza.

Diose-y tamién al presidente un ultimátum: si La Moneda nun yera desaloxada antes de les 11:00 h, sería atacada per tierra y aire. L'ambiente na Moneda yera murniu, lo peor que podía ocurrir-yos taba pasando. Carabineros retira les tanquetes y al personal apostáu frente ella.

Los militares contactaron cola Moneda y propusieron-y sacalu del país, pero Allende rechazó la propuesta.

A las 9:55 h los tanques del xeneral Palacio ingresaron nel perímetru de la Moneda. Francotiradores apostaos nos edificios averaos trataron de repelelos. A les 10:15 h, a través de radio Magallanes —la única pro gobierno que tovía nun fuera silenciada— Allende emitió el so últimu mensaxe a la Nación.

A las 10:30 h los tanques abrieron fuéu contra la Moneda, fuéu que foi respondíu polos miembros del GAP y los francotiradores.

Carvajal contactó nuevamente con Pinochet, informándolu de la intención de parlamentar. Pinochet exixó una «rendición incondicional».

Sin embargo, ofreció a Allende salir del país, y consiguió que Leigh detuviese el bombardeo aereu unos minutos, para evacuar a le muyeres del interior de la Moneda.

Minutos más tarde los cazabombarderos entamaron el so ataque al palaciu. Otros dos aviones bombardearon la residencia presidencial de Tomás Moro.

El ataque al Palaciu de Gobierno siguió col usu de gases lacrimóxenos, pero al ver que la Moneda tovía se negaba a rendise, el xeneral Palacios decidió tomala y envió a un grupu de soldaos a valtar la puerta del Palaciu. Son las 14:30 h de la tarde.

Allende decidió rendise y deponer les armes. Carvajal nuna comunicación interna a Pinochet diz:

"Hai una comunicación, una información de personal de la Escuela de Infantería que ta yá dientro de La Moneda. Pola posibilidá d'interferencia, voi a tresmiti-yla n'inglés: They say that Allende committed suicide and is dead now (Dicen qu'Allende se suicidó y agora ta muerte)"

A les 18 hores conformóse la Xunta de Gobiernu. La Unidad Popular y el so presidente morrieren, entamando diecisiete años de dictadura.

Funerales[editar | editar la fonte]

Los restos mortales de Salvador Allende fueron enterraos nel Cementeriu Santa Inés de Viña del Mar, ensin una placa que lu identificara, nuna ceremonia a la que sólo pudieron asistir Hortensia Bussi, Laura Allende y dos sobrinos del presidente, amás del comandante de la FACH Roberto Sánchez.

Casi 18 años después, el 4 de setiembre de 1990 por órdenes del presidente Patricio Aylwin, Salvador Allende recibió un nuevu funeral, pero esta vez masivu y colos honores d'Estáu que-y correspondíen como ex mandatariu.

Enllaces esternos[editar | editar la fonte]