Robert Falcon Scott

De Uiquipedia
(Redirixío dende Robert Scott)
Saltar a: navegación, buscar
Robert Falcon Scott.

El capitán Robert Falcon Scott (Devonport, cerca de Plymouth, Inglaterra, 6 de xunu de 1868; Antártida, 29 de marzu de 1912) yera un oficial de la marina británica y un esplorador antárticu. Ye famosu polos sos intentos d'algamar el Polu Sur xeográficu, y especialmente pola so última espedición, na que morrió colos sos collacios nel trayeutu de vuelta dempués de ser el segundu n'aportar al Polu Sur. El noruegu Roald Amundsen llegara díes enantes qu'él. Scott ye quiciabis el más famosu héroe de la esploración antártica.

Antecedentes[editar | editar la fonte]

Nació en Devonport, Inglaterra. A los trece años embarcóse nel HMS Britannia en Dartmouth y entamó la so preparación como marineru. Dempués de facer carrera na armada británica, dirixó la Espedición Antártica Nacional que promoviera Sir Clements Markham, que fuera tamién esploraor polar y yera entós el presidente de la Royal Geographical Society. Esta espedición fízose nel barcu Discovery y entamóse en 1900. Nella esploraron el Mar de Ross, descubrieron lo que nomaron la Tierra del Rei Eduardu VII y algamaron un nuevu "sur más llonxanu": 82º 17' S (31 d'avientu de 1902). Nesa espedición diben tamién Ernest Shackleton y Edward Wilson.

La espedición del Terra Nova[editar | editar la fonte]

Dempués d'eso, Scott volvió pa la Antártida col envís de ser el primeru n'algamar el Polu Sur. La espedición del Terra Nova salió de Londres el 1 de xunu de 1910, y tamién yera prioritaria la investigación científica.

La base de la espedición construyóse en Cabu Evans, na Isla de Ross, dando pal Estrechu de McMurdo. Dende ellí salieron dellos grupos en misiones científiques, ún de los cuales foi pal Polu Sur. Enantes de salir yá sabíen que Roald Amundsen taba fondeáu na Bahía de les Ballenes, na placa de xelu de Ross, y que tamién diba intentar aportar al Polu (cola ventaxa de casi un gráu de llatitú más al sur que Scott). La espedición de Scott emplegó trineos motorizáos (que dieron mal resultáu), caballos manchures (que tampoco yeren lo más afayaízo pa aquelles condiciones) y perros pa tirar de los trineos.

L'asaltu al Polu Sur[editar | editar la fonte]

Dempués de los trabayos de preparación de les estaciones d'abastecimientu, el grupu de Scott entamó'l camin pal sur. Atopáronse un tiempu especialmente duru, con temperatures perbaxes. Además, los críticos dicen que la espedición nun taba iguada de la meyor manera; tá dicho que ni los trineos con motor ni los caballos yeren lo meyor, y los homes nun yeren buenos esquiadores ni espertos manexando los perros (gran parte del trayeutu ficiéronlu tirando ellos mesmos polos trineos, y esta yera una práutica habitual nes espediciones britániques). La espedición de Amundsen basábase nel usu de perros y taba formada por meyores esquiadores; teníen otra ventaxa, y yera que'l so interés científicu yera muncho menor, y la so prioridá yera namás dir al polu y volver.

El grupu que intentó la cabera etapa dica'l polu foi'l formáu por Scott, Henry Bowers, Edward Wilson, Edgar Evans y Lawrence Oates. Esta ye otra decisión de Scott mui criticada, porque en principiu falárase de dir namás que cuatro homes. Llevar cinco implica alimentar una boca más; pero quiciabis Scott pensó que la so axuda pa tirar polos trineos diba compensalo.

Dempués de munches dificultáes, el grupu algamó'l Polu Sur, pero atoparon ellí les señales de la espedición de Amundsen, qu'aportara un mes enantes. Los homes, desanimaos, dieron la vuelta pa afrontar un viaxe perdifícil. Delles circunstancies aliáronse contra Scott; ente elles, que una orden dél pa cambiar un plan d'abastecimientu (otra decisión criticada) nun llegó al so destín. Cuandou aportaron al depósitu de comida, nun alcontraron los suministros.

Evans, durante'l camín, vínose abaxo pocu a pocu, y acabó morriendo. Dempués, Lawrence Oates, que perdiera ya l'usu d'un pie pol conxelamientu y padecía otres feríes (delles de cuando sirviera na guerra de Suráfrica) vio que taba parando a los sos collacios, y un día marchó de la tienda pa dexalos solos y que pudieren intentar volver. (Nunca más se alcontró'l so cuerpu, anque sí el so sacu de dormir.) Scott, Wilson y Bowers morrieron na tienda, deteníos por un temporal, cuando taben namás que a 20 quilómetros d'un depósitu de comida.

La lleenda[editar | editar la fonte]

Alcontraron los sos cuerpos seis meses dempués. L'equipu que los alcontró rescató les anotaciones científiques y meteorolóxiques (que ficieron hasta l'últimu día), y los diarios de Scott. La so publicación causó una enorme conmoción nel mundu anglosaxón, y la espedición convirtióse nuna lleenda épica de les grandes esploraciones antártiques, xunto col viaxe (con un final mui estremáu) qu'Ernest Shackleton fadría en 1914 nel Bergantín Endurance.

{{{2}}}
Wikimedia Commons tien archivos rellacionaos con: