Paco Ibáñez

De Uiquipedia
Saltar a: navegación, buscar

Paco Ibáñez (Valencia, 20 de payares de 1934) ye un cantante español, con una traxectoria artística que dedicó cuasi íntegramente a facer versiones musicaes de poemes d'autores españoles y iberoamericanos, tanto clásicos como contemporáneos.

Paco Ibáñez

Biografía[editar | editar la fonte]

Los sos anicios[editar | editar la fonte]

De padre valencianu y madre vasca, ye'l menor de cuatro hermanos. Pasa la so primera infancia en Barcelona, llugar nel que vive anguaño. Depués de la guerra civil, la so familia setien qu'exiliase a Francia puesto que so padre yera un militante anarcosindicalista de la CNT. Ente l'inviernu de 1939 y l'entamu de la ocupación alemana, residirán en París. So padre, militante anarquista, ye arrestáu y internáu nun campu de trabayu pa republicanos españoles. So madre regresa entós colos cuatro fíos a San Sebastián pa trabayar, viviendo nel caseriu familiar d'Aduna en Guipúzcoa hasta los 14 años.[1] Más sero, estes acordance de la neñez nel caseríu familiar recuéyelos nel so discu Oroitzen —Recordando—, cantáu n'euskera. En 1948, la familia atraviesa clandestinamente la frontera y vuelve a xuntase col padre en Perpiñán. Paco aprende de so padre l'oficiu d'ebanista, al tiempu qu'entama a estudiar vigulín. Pronto sustituye'l vigulín pola guitarra. Viviendo definitivamente en París, nos entamos de los años cincuenta, descubre primero la música de Georges Brassens y d'Atahualpa Yupanqui, referencies fundamentales pa la so formación artística y ideolóxica, y inmediatamente depués a Léo Ferré y al movimientu existencialista francés, que s'atopaba con plenu puxu.

En 1956 la foto d'una muyer andaluza vestida de negro inspira-y la so primera canción sobre'l poema "La más bella niña", de Luis de Góngora. Colos poemes de Góngora a los qu'amesta otros de García Lorca fai la so primera grabación en 1964. Un discu que, dende'l mesmu momentu de la so aparición, conviértese nun clásicu utilizáu polos profesores de lliteratura española como material pedagóxicu, y polos defensores de les llibertaes como un símbolu de resistencia cultural.

En 1958, una amiga de Paco y de Pierre Pascal, lleva-y a Salvador Dalí, a Cadaqués, un discu de prueba con delles canciones de Lorca y Góngora. Cuando Salvador Dalí lu escucha quier conocer "al rapaz" que fizo'l discu. Cuando se conocen, naz la idea de que'l pintor faiga'l dibuxu pa la portada del discu y entama asina una estrencha rellación de Paco, non sólo col mundu de la poesía y de la lliteratura en xeneral, sinon tamién col de les artes plástiques.

Paco Ibáñez y l'activismu[editar | editar la fonte]

En 1966, xunto a diversos activistes culturales asentaos na capital francesa funda "La Carraca" onde se presenten espectáculos en llingua castellana (representaciones teatrales, esposiciones de pintura, coloquios lliterarios, manifestaciones musicales y proyeiciones cinematográfiques). Nesa dómina, la casa de los Ibáñez en París ye un centru de pasu y acoyida de los munchos artistes, políticos y intelectuales españoles que pasen pela capital francesa.

El segundu discu de la colección "España de hoy y de siempre" apaez en 1967 incluye poesíes de Rafael Alberti, Luis de Góngora, Blas de Otero, Gabriel Celaya, Miguel Hernández y Francisco de Quevedo. Otru clásicu. Esta vez el discu tará ilustráu por José Ortega.

En febreru de 1968 ofrez el so primer conciertu n'España, en Manresa, na "Primera Trobada de Canço de Testimoni". A partir d'ahí la so actividá espárdese por delles Universidaes llegando a cantar en TVE el tema "Andaluces de Jaén", de Miguel Hernández. Inmediatamente depués instálase en Barcelona onde contacta con José Agustín Goytisolo, amistá convertida en collaboración íntima.

En mayu de 1968, nuna emisión de la TV francesa realizada en directo por Raoul Sangla, presenta'l discu y Ortega les pintures que lu ilustren. Nesta emisión canta "La poesía es un arma cargada de futuro", de Gabriel Celaya y "Balada del que nunca fue a Granada", de Rafael Alberti.

Problemes col franquismu[editar | editar la fonte]

Con motivo del primer aniversariu de la toma estudiantil, el 12 de mayu de 1969, entama un conciertu en La Sorbona. Un pequeñu cartel mariellu fechu polos estudiantes y pegáu nos árboles, nos cristales de los cafés, nos pasillos de les aules, anuncia un conciertu de “Paco Ibáñez, la voz llibre d'España”, na sala Richelieu. Los universitarios franceses identifíquense con él y tómenlu como unu de los sos símbolos. Nesti mismu añu edita'l so tercer discu con poesíes s de Rafael Alberti, Luis Cernuda, León Felipe, Gloria Fuertes, Antonio Machado, José Agustín Goytisolo. L'autor de la pintura que ilustrará'l discu yeAntonio Saura. N'avientu, realiza la so recordada actuación nel Olympia de París. Un doble álbum recueye esta velada. Nel Olympia canta por primera vez una canción de Georges Brassens traducida al castellanu.

En 1970, conoz a Pablo Neruda en París, qu'oye por primera vez los sos poemes cantaos. "Tú tienes que cantar mis poemas, tu voz está hecha para cantar mi poesía..." diz-y el poeta.

Un añu depués, el gobiernu español incluye a Paco Ibáñez na so llarga lista de censuraos, prohíben-y cualquier actuación nel territoriu español. Les dificultaes pa seguir viviendo en Barcelona aconseyen-y Tornar a París, dende onde viaca per tol mundu, especialmente pelos países d'América Llatina. En toos estos años entra en contactu con numberosos personaxes del mundu de la cultura, como l'escritor vallisoletanu Blas Pajarero.

Notes[editar | editar la fonte]