Lady Gaga

De Uiquipedia
Saltar a: navegación, buscar
Lady Gaga en Roma

Stefani Joanne Angelina Germanotta (Nueva York, Estaos Xuníos, 28 de marzu de 1986), más conocida pol so nome artísticu, Lady Gaga, ye una cantante, compositora, productora, baillarina, activista y diseñadora de moda estadounidense. Tamién dedicó parte de la so vida a l'actuación y la filantropía. Nacida y criada na ciudá de Nueva York, estudió na escuela Convent of the Sacred Heart y asistió per un tiempu curtiu a la Tisch School of the Arts, perteneciente a la Universidá de Nueva York, hasta qu'abandonó los sos estudios pa enfocase na so carrera musical. Foi según aprució na escena del rock nel Lower East Side de Manhattan y robló un contratu con Streamline Records escontra fines de 2007. Na dómina en que trabayaba como compositora pa esa discográfica, la so voz llamó l'atención del artista Akon, quien la fixo roblar un contratu con Kon Live Distribution.

Lady Gaga adquirió fama como artista tres el llanzamientu del so álbum debú, The Fame (2008), qu'inclúi los senciellos «Just Dance» y «Poker Face». El discu tuvo ésitu comercial —llegó al primer llugar en numberoses llistes d'ésitos— y bones crítiques. N'empezando la so xira The Fame Ball Tour, llanzó'l EP The Fame Monster (2009), que contién los cantares «Bad Romance», «Telephone» y «Alejandro». El so ésitu dexó a la cantante realizar la so xira d'ocho meses de duración Monster Ball Tour, que se considera como una de les series de conciertos con mayores ingresos económicos xeneraos na hestoria de la industria musical. El so siguiente álbum, Born This Way (2011), llegó al primer llugar de delles llistes de vientes y contién senciellos como «Born This Way», «Judas», «The Edge of Glory» y «Yoü and I». El so tercer álbum d'estudiu, ARTPOP, ta previstu pa ser llanzáu en 2013.

Influyida por David Bowie, Michael Jackson y Queen, Lady Gaga ye reconocida pol so sentíu estéticu cambiante y estravagante respecto la so música, la moda, les presentaciones en directu y los videos musicales. Escontra ochobre de 2011, vendiera aprosimao veintitrés millones de copies d'álbumes y 64 de senciellos, de los cualos dalgunos fueron los más vendíos nel mundu. Les reconocencies que recibió inclúin cinco premios Grammy y trelce MTV Video Music Awards. Figuró consecutivamente como «artista del añu» na revista Billboard y nel cuartu puestu de la llista de VH1 de les Cien muyeres más grandes de la música», según n'otres llistes ellaboraes pola revista Forbes y Time, onde la consideren coles mesmes como una de les persones más influyentes del mundu. Llanzó'l so propiu arume comercial llamáu Fame. Más allá de la so carrera como artista, Gaga tamién se dedica a causes humanitaries y al activismu en favor de la comunidá LGBT.