Harbin

De Uiquipedia
Saltar a: navegación, buscar
Bandera de la ciudá

Harbin (en chinu simplificáu: 哈尔滨市; en chinu tradicional: 哈爾濱市; en pinyin: [Hā'ĕrbīn]; y en rusu: Харбин) ye la capital y la ciudá mayor de la provincia de Heilongjiang, na República Popular China. Ye la décima ciudá más poblada del país, con una población, según el censu de 2010, de 5.878.939 área urbana y 10.635.971 nel territoriu de la so prefectura. La ciudá ye'l centru políticu, económicu, científicu, cultural y de comunicaciones del noreste de China.

Llocalización de Harbin (colloráu) dientro la provincia de Heilongjiang (naranxa) y del país

Harbin, que ye una pallabra manchú que significa llugar ú se sequen les redes de pesca, medró enforma dende la so condición de pequeña aldea asitiada a la vera'l ríu Songhua. El so espoxigue entamó en 1898, cuando aportó a ella el ferrocarril tresmanchurianu (nomáu Chinese Eastern Railway anguaño), que xunía la ciudá rusa de Vladivostok cola china de Dalian. La ciudá entamó a prosperar, llamando l'atención el descomanáu númberu de xudíos que vivíen nella.

La ciudá foi ocupada polos exércitos blancos que lluchaben escontra los bolcheviques en 1918, demientres la Guerra Civil Rusa. Años dempués, en febreru de 1932, volvió ser ocupada, esta vez polos xaponeses. L'exércitu rusu reconquistóla n'agostu de 1945 y, dempués de un tiempu en manes del Kuomingtan pasó a manos del Exércitu de Lliberación popular n'abril de 1946. Esti pasáu rusu ye visible na gastronomía, na cultura y nel paisaxe arquitectónicu. Llegó a haber 15 ilesies ortodoxes y dos cementerios rusos, magar que'l so númberu menguó, tres la Revolución Cultural hasta les 10 actuales (namái una tien servicios relixosos regulares). Destaca, d'ente elles, la ilesia de Santa Sofía, inaugurada en 1932 y convertida nún muséu qu'amuesa les influyencies de l'arquitectura de la ciudá.

Harbin

La ciudá ye conocida polos fríos estremos que soporta n'iviernu, que fain que se la conozca como la ciudá de xelu. Ye una ciudá singular pol so pasáu rusu, y entá xuega un papel perimportante nel comerciu ente los dos países. Na década de los 20 del sieglu XX la ciudá yera considerada la capital de la moda china, una y bones los nuevos diseños de París y Moscú aportaben a ella primero que a Shanghai. Nel 2010 foi nomada pola UNESCO Ciudá de la Música.


No que cinca a la economía, la ciudá busca'l so sitiu dentro del grupu de grandes ciudaes (qu'inclúi a Changchun, Dalian y Shenyang amás de a Harbin) del noroeste de China. Dalian ye consideráu'l centru portuariu de la rexón y Shenyang el so centru financieru, mentantu que Harbin busca ser el centru de comerciu y compres de la zona. Cuenta a favor col so gran crecimientu económicu, apoyáu na bayura de recursos naturales, un bon sistema de tresporte y trabayadores abundantes y bien formaos.

Harbin Ice Festival. Iviernu en Harbin

El sector terciariu ye'l más importante na ciudá, y aporta la metá del so PIB. Sicasí, les tierres de la so rodiada son bonos suelos (de tierra negra), perafayaízos pal cultivu de plantes testiles y d'alimentación. Asina, la producción y comercialización de cereales ye una de les actividaes presentes na ciudá, magar que hai tamién industria lixera, testil, médica, d'automoción, metalúrxica, ellectrónica, de materiales de connstrucción... Tamién tien la so sé na ciudá'l Harbin Institute of Technology, una de les meyores universidaes chines. Fundada en 1920, ye anguaño un importante centru d'investigación tecnolóxica. Ente los sos llogros tán tener llograo la creación del primer computador analóxicu chinu o el primer axedrez intelixente.

Enllaces esternos[editar | editar la fonte]

Harbin
Wikimedia Commons tien archivos rellacionaos con: