Carmen Ruiz-Tilve
Carmen Ruiz-Tilve | |
|---|---|
| Vida | |
| Nacimientu | Uviéu, 19 d'abril de 1941 (83 años) |
| Nacionalidá |
 España |
| Estudios | |
| Estudios | Universidá d'Uviéu |
| Llingües falaes | castellanu |
| Oficiu | escritora, profesora, bibliotecaria |
 | |
Carmen Ruiz-Tilve Arias (19 d'abril de 1941, Uviéu) ye escritora, Doctora en Filoloxía (la so tesis enceta la obra narrativa de Dolores Medio) y Catedrática de Didáctica de la Llingua y la Lliteratura de la Universidá d'Uviéu, güei xubilada. Escribe llibros dende 1985 y ye collaboradora habitual en prensa. El 4 de setiembre de 2002 foi nomada Cronista Oficial d'Uviéu (Asturies).
Biografía[editar | editar la fonte]
Nació'l 19 d'abril de 1941 n'Uviéu, fía de María Arias García y Francisco Ruiz Tilve. Casada y anguaño viuda del tamién profesor Luis Carlón, ye madre de 4 fíos (Julián, Francisco, Matilde y Luis). Estudió Filoloxía Románica na Universidá d'Uviéu (1960-1965), llugar nel que se doctoró en 1990. La so tesis de llicenciatura trató sobre “El premiu de novela Ciudá d'Uviéu” y la so tesis de doctoráu sobre “La obra narrativa de Dolores Medio”, en dambos casos cola direición del profesor Martínez Cachero.
Empezó la so vida profesional trabayando como profesora nel colexu Nazaret d'Uviéu y vivió dos años en Valencia, onde nun pudo trabayar. Profesora de la Universidá d'Uviéu dende 1978, va aportar# a caderalga de Didáctica de la Llingua y la Lliteratura. Ente 1980 y 1982 foi bibliotecaria na Facultá de Filoloxía de la mesma universidá.
Dende 1985 publica llibros sobre didáctica y ensayos sobre Asturies y Uviéu. En 1994 escribe la so primer novela “Crisantemos pa toos”. Y dende 1995 firma "Pliegos de Cordel", testos curtios onde repasa la vida cotidiana de la ciudá, publicaos como columna nel periódicu La Nueva España d'Uviéu. Tamién dende l'añu 2002, publica "El tiempu vuela", un artículu mensual nel mesmu periódicu.
Amás de publicar llibros y escribir en prensa, participa davezu en congresos, conferencies, publicaciones, proyeutos d'investigación y otres actividaes, fundamentalmente rellacionaes cola cultura asturiana. Ye miembru del Real Institutu d'Estudios Asturianos y del xuráu del Premiu al Pueblu Exemplar (Premiu Princesa d'Asturies). Cronista Oficial d'Uviéu, sopelexa nel so trabayu la vida social y cultural de la so Asturies natal.
Obra lliteraria[editar | editar la fonte]
Les sos principales obres pueden clasificase en cuatro ámbito:[1]
Publicaciones didáctiques[editar | editar la fonte]
- El llinguaxe oral na escuela: Condiciones pa la so adquisición en Preescolar (1985)
- Los modelos educativos a partir del material bibliográfico escolar 1850-1950,(1996
- Llibros pa neños. Los modelos educativos a partir del material bibliográfico escolar (1996) (coordinadora)
- 365 entrugues (2000)
- 365 cuentos (2000)
- Lleer cola Naturaleza (2004)
Asturies y Uviéu[editar | editar la fonte]
- La vida comercial d'Uviéu al traviés de Nós, los Rivero. 1924-1935 (1989)
- Dolores Medio (1989)
- La obra narrativa de Dolores medio (publicación de la so tesis) (1991)
- La muyer asturiana nel trabayu tradicional (1993)
- El Fontán, Guía pa señardosos (1994)
- Alredor d'El Carbayón. El Campu fai ciudá (1995)
- De places y plazuelas. Historia menor de siete espacio del Uviéu intramuros (1996)
- Fuentes y caños d'Uviéu y el so conceyu (1997)
- Uviéu nel Camín de Santiago (1999)
- L'Uviéu de Dolores Medio (2004)
- Uviéu de cerca (2006)
Noveles[editar | editar la fonte]
- Crisantemos pa toos (1994)
- La edá d'oru (1995)
- Galería d'espeyos (1998)
- Una selmana fora del calendariu (1998)
- Una selmana fora del calendariu (2000)
- Cuentos encadenaos (2001)
- Les dos cares de Jano (2005)
Collaboraciones en prensa[editar | editar la fonte]
Pliegos de Cordel, artículos publicaos en La Nueva España y recoyíos como llibru nos volumes: Pliegos de Cordel (1997), Nuevos Pliegos de Cordel (2000), Terceros Pliegos de Cordel (2002), Cuartos Pliegos de Cordel (2005), Quintos Pliegos de Cordel (2006) y Sestos Pliegos de Cordel (2013). En 2008, arrexuntó los sos artículos rellacionaos cola gastronomía en Pliegos de cordel de comer y beber.
Reconocencies y premios[editar | editar la fonte]
En 2011 creóse, nel barriu de La Corredoria d'Uviéu, el Colexu Públicu "Corredoria III" que darréu camudó'l so nome pol de "Carmen Ruiz-Tilve".
Dende 2014, nel barriu de La Florida d'Uviéu hai una cai col so nome.[2]
L'asociación cultural "L'Arribada" galardonó-y nel añu 2014 col premiu "Timón" pa escritores asturianos en castellán.[3]
Nel añu 2016 la Sociedá Proteutora de La Balesquida concedió a Carmen Ruiz-Tilve el títulu de "socia d'honor".[4]
Enllaces esternos[editar | editar la fonte]
Biografía en "Biografía de muyeres asturianes"
Entrevista en La Nueva España, abril de 2011
Entrevista en La Nueva España, avientu de 2013
Referencies[editar | editar la fonte]
- ↑ «Ámbito descritos na biografía de Carmen Ruiz-Tilve en KRK Ediciones». Consultáu'l 17 d'ochobre de 2016.
- ↑ «Noticia sobre la inauguración de la cai Carmen Ruiz-Tilve». Consultáu'l 15 d'ochobre de 2016.
- ↑ «L'Arribada galardona a Carmen Ruiz-Tilve». Consultáu'l 15 d'ochobre de 2016.
- ↑ «La Balesquida ovaciona a Carmen Ruiz-Tilve». Consultáu'l 15 d'ochobre de 2016.
Datos: Q27306159
