Z Andromedae

De Wikipedia
Saltar a navegación Saltar a la gueta
Z Andromedae
Z Andromedae
Constelación Andrómeda
Ascensión reuta α 23h 33min 39,95s
Declinación δ +48º 49’ 05,9’’
Distancia 1420 años lluz
Magnitú visual +10,59
Magnitú absoluta +2,40
Lluminosidá 18 soles
Tipu espectral M6.5
Velocidá radial +3 km/s

Z Andromedae (HD 221650 / HIP 116287 / SAO 53146) ye una estrella variable na constelación d'Andrómeda, prototipu de les estrelles simbiótiques. De magnitú aparente media +10,59, alcuéntrase a 1420 años lluz de distancia de la Tierra. Les especiales carauterístiques del espectru de Z Andromedae, similar al de GK Persei y RS Ophiuchi, según la so variabilidá, fueron afayaes por Williamina Fleming en 1901.

Z Andromedae ye una estrella simbiótica, tipu de variables cataclísmicas que consisten nuna estrella binaria, onde una estrella caliente ioniza una cubierta de gas que vien de la estrella acompañante, una xigante colorada fría. Dientro d'esti tipu d'estrelles, esiste un subtipo llamáu estrelles Z Andromedae, del cual Z Andromedae ye l'arquetipu, amás de selo del conxuntu d'estrelles simbiótiques.

Mientres la mayor parte del tiempu, Z Andromedae ta inactiva y les úniques fluctuaciones nel so rellumu, de pequeña amplitú, correspuenden a la d'una variable semirregular de tipu espectral M6.5 con un periodu d'unos 700 díes. Sicasí, cada 10 o 20 años, Z Andromedae vuélvese bien activa, aumentando'l so rellumu unes 3 magnitúes. A los españíos de mayor amplitú, sígen-yos menores estallíos d'amplitú decreciente hasta que la estrella recupera l'aselu. Mientres los españíos la estrella faise más azul y l'espectru ta apoderáu pola componente caliente, de tipu espectral B.

El máximu rellumu rexistráu tuvo llugar nel españíu de 1939, cuando la estrella algamó magnitú +7,9. Parámetros básicos del sistema, como la masa de les componentes y l'enclín de la órbita son desconocíos, lo que torga'l desenvolvimientu de modelos teóricos sobre'l sistema.

Referencies[editar | editar la fonte]