V391 Pegasi

De Wikipedia
Saltar a navegación Saltar a la gueta
V391 Pegasi
V391 Pegasi
Constelación Pegasu
Ascensión reuta α 22h 04min 12,2s
Declinación δ +26º 25’ 08’’
Distancia 4570 ± 580 años lluz
Magnitú visual +14,57
Magnitú absoluta +3,84
Lluminosidá 35 soles
Temperatura 29.300 ± 500 K
Masa 0,50 soles
Radiu 0,23 soles
Tipu espectral sdB

V391 Pegasi (GSC 02212-01369 / HS 2201+2610)[1] ye una estrella variable na constelación de Pegasu. La so magnitú aparente ye +14,57 y alcuéntrase a unos 4570 años lluz del Sistema Solar. En 2007 anuncióse'l descubrimientu d'un planeta estrasolar alredor d'esta estrella.

V391 Pegasi ye una subenana azul caliente, una estrella estrema de la caña horizontal. Les subenanas calientes representen una etapa tardida na evolución estelar de delles estrelles, onde una xigante colorada pierde les sos capes esteriores d'hidróxenu primero que nel so nucleu empiece la fusión del heliu. Con una masa la metá de la masa solar, V391 Pegasi tien un radiu del 23% del radiu solar y una lluminosidá 35 vegaes mayor que la del Sol.[2] La so temperatura efectivo algama los 29.300 K. Ye una estrella antigua, con una edá envalorada igual o superior a 10.000 millones d'años.[3]

V391 Pegasi ye una estrella variable pulsante, con 4 o 5 distintos periodos de pulsación ente 342 y 354 segundos. Los dos mayores amplitúes son d'un 1% y de un 0,4%.[2]

Sistema planetariu[editar | editar la fonte]

En 2007 afayóse un planeta xovianu, denomináu V391 Pegasi b, que la so masa ye siquier 3,7 vegaes mayor que la de Xúpiter. A una distancia de 1,7 UA de la estrella, completa una órbita cada 3,2 años.

La mayor parte de los planetes estrasolares descubiertos orbitan alredor d'estrelles de la secuencia principal similares al Sol. Cuando estes estrelles escosen el so combustible d'hidróxenu, espándense tresformándose en xigantes coloraes, etapa que puede modificar les órbites de los planetes y somorguiar los planetes interiores dientro de la mesma estrella. Esto asocederá-yos a los planetes del sistema solar dientro d'unos 5000 millones d'años.

El radiu máximu de la xigante colorada precursora de V391 Pegasi pudo algamar les 0,7 UA, envalorándose que la distancia orbital del planeta mientres la fase de secuencia principal de la estrella yera d'aprosimao 1 UA. Esti descubrimientu demuestra que planetes con distancies orbitales inferiores a 2 UA pueden sobrevivir la fase de xigante colorada de les sos estrelles parentales.[4]

Acompañante
(N'orde dende la estrella)
Masa
(MJ)
Periodu orbital
(díes)
Semiexe mayor
(UA)
Escentricidá
V391 Pegasi b > 3,2 ± 0,7 1170 ± 44 1,7 ± 0,1 0,0

Referencies[editar | editar la fonte]

  1. V* V391 Peg -- Variable Star (SIMBAD)
  2. 2,0 2,1 A giant planet orbiting the ‘estreme horizontal branch’ star V391 Pegasi (vease presentación Powerpoint)
  3. V391 Pegasi. Jumk.de/astronomie
  4. Silvotti, R.; Schuh, S.; Janulis, R.; Solheim, J.-Y.; Bernabei, S.; Østensen, R.; Oswalt, T. D.; Bruni, I.; Gualandi, R.; Bonanno, A.; Vauclair, G.; Reed, M.; Chen, C.-W.; Leibowitz, Y.; Paparo, M.; Baran, A.; Charpinet, S.; Dolez, N.; Kawaler, S.; Kurtz, D.; Moskalik, P.; Riddle, R.; Zola, S.. «A giant planet orbiting the `estreme horizontal branch' star V391 Pegasi». Nature 449 (7159). pp. 189-191. http://adsabs.harvard.edu/abs/2007Natur.449..189S. 

Coordenaes: Sky map 22h 4m 12.104s, 26° 25 7.821