Ríu Pendia

De Wikipedia
Saltar a navegación Saltar a la gueta
Pendia
Alministración
Xeografía
Fonte Pena Queimada Traducir
Boca Ríu Navia
Hidroloxía
Cambiar los datos en Wikidata

El ríu Pendia ye un ríu del conceyu de Bual, afluente del Navia pela manzorga, qu'atraviesa nel so cursu les parroquies de Bual y Serandías, recoyendo, pela mandrecha, les agües de la fastera septentrional del monte de Penácaros, y pela esquierda les de les esviaciones nororientales de la sierra de Penouta.

Naz de la xuntura del arroyu del Vao y del ríu d'Armal. El primer d'ellos naz na lladera norte del monte de Penácaros, nun llugar nomáu A Fongallega, y baxa, pasando cerca'l pueblu d'As Cabanas, hasta xuntase col ríu d'Armal. Esti, pela so banda, fórmase pola xuntura los regatos d'A Pilella y d'As Veigas a l'altura de Ferradal. Ellí hai un molín, nomáu el Molín de Baxo; y más p'abaxo, onde recibe les agües del arroyu del Vao, a l'altura de A Cruz y El Mazo, otru, el Molín de Casanova.

Dende equí, según dalgunes fontes, el ríu pasa a nomase yá ríu Pendia, mentanto que, si facemos casu d'otres, va llamase ríu del Mazo hasta que, dempués d'axuntase col regatu d'As Teixeiras nel llugar d'El Pontigón, nómase a la fin ríu Pendia. De cualesquier manera, ríu del Mazo o ríu de Pendia, el cursu d'agua sigue camín pelos praos d'Armal p'embaxo, dándo-y agua pa los molinos de Casacova y El Valle y arrodiando'l castru d'El Mazo.

En praos yá del pueblu d'As Viñas recibe, pela mandrecha, les agües del regatu Reiguirón, que baxa del monte de Penácaros. Más p'abaxo, pasáu Riumayor, engranda'l so caudal coles agües d'otros dos regatos: el de Santa Olaya y el de Villanova. El primer d'ellos, que naz cerca la ermita San Isidro, na lladera la sierra de Penouta, pasa averáu al pueblu de Santa Olaya y aborda'l ríu de Pendia pela manzorga. El segundu, que baxa de la sierra de Penácaros, desagua nel Pendia pela mandrecha un poco más p´abaxo que l'anterior. Dempués de recibir estos afluentes el ríu fai dellos meandros, nún de los cuales arrodia'l castru de Pendia, asitiáu nel pueblu del mesmu nome. Pequí, aonde ye conocíu tamién como ríu d´A Serra, recibe pela manzorga les agües del ríu Pontes, que baxa dende cerca la Llomba da Ronda y da-y, dempués de pasar baxo la carretera AS-12 bien cerca de Miñagón, les agües al Pendia pocos metros enantes de la so boca nel Navia.

Bibliografía[editar | editar la fonte]

  • VV.AA., Enciclopedia del paisaje de Asturias, p. 769. Uviéu, Editorial Prensa Asturiana, 2003.