Sierra de Penouta
| Sierra de Penouta | |
|---|---|
| monte | |
| Situación | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu | Bual |
 | |
La sierra de Penouta ye una sierra de la parroquia de Bual, nel conceyu asturianu homónimu. De direición sur y norte-este, fórmenla un garapiellu de picos d'un altor d'ente 700 y 900 m, con un cumal de 901 m (picu de Penouta). Ta cubierta de monte baxu y pinos de repoblación, con dellos cortafueos, y tien un puertu de monte na carretera AS-22, l'altu de Penouta (785 m).
Xeolóxicamente ta formada por pizarres prietes con metamorfismu de contautu, cuarcites, granitos y diques de cuarzu. Hebo tamién, nella, una esplotación minera de wolframiu a mediaos del sieglu XX. Nel so cumal hai repetidores de televisión y antenes de telefonía, amás d'un parque eólicu, de siete molinos, esplotáu pola empresa Electra Norte. Hebo tamién una estación del sistema de navegación conocíu como cadena DECCA, qu'anguaño nun funciona.
Na sierra hai dellos yacimientos prehistóricos; asina, nún d'ellos, nel altu de Penouta, atopose una inscultura sobre pizarra con una forma asemeyada a la d'un candelabru xudíu.
Na so lladera meridional asitiábase tamién, hasta que foi valtáu en 2001, seique por unos gamberros, el Penedo Aballón (peña oscilante), una gran roca granítica redondeada con un apoyu inestable que permitía, si te xubíes enriba d'ella, movela. Magar que los vecinos del conceyu tienen movilizáose pa que vuelva a ser colocada nel so llugar, la dificultá téunica de facelo fai qu'entá nun lo consiguieran. El Penedo formaba un conxuntu con otra peña redondeada y con un picu qu'asemeya un pezón, que ye conocida como Pena da Teta.
Bibliografía[editar | editar la fonte]
- Rodríguez Muñoz, Javier (dir.), Enciclopedia del paisaje de Asturias. Uviéu, Editorial Prensa Asturiana, 2003.
Referencies[editar | editar la fonte]
Enllaces esternos[editar | editar la fonte]
| Control d'autoridaes |
|
|---|
Datos: Q20620802