Premiu Nacional de Lliteratura Asturiana
El Premiu Nacional de Lliteratura Asturiana ye un gallardón lliterariu que concede l'Academia de la Llingua Asturiana, cada trés años, a los escritores que más destacaren pola so trayeutoria na lliteratura en llingua asturiana. El premiu nun pue repartise ente más d'un autor nin concedese a títulu póstumu. La primer edición foi en 2017.
El xuráu qu'otorga los premios ta formáu pol Presidente o Presidenta de l'Academia de la Llingua Asturiana, trés miembros de númberu de la institución, un representante de la Conseyería d'Educación y Cultura del Gobiernu d'Asturies y dos personalidaes de reconocíu prestixu del mundu universitariu especialistes en lliteratura asturiana.
El premiu ta dotáu con 3.000 euros, un medayón distintivu del escultor Adolfo Manzano y la publicación d'una pequeña antoloxía representativa de la producción lliteraria del autor.
Ediciones celebraes
Tres la publicación de les bases del premiu'l 15 de setiembre de 2016[1] y l'apertura del plazu pa la presentación de candidatures los finalistes resultaron ser los vinientes: Xuan Bello, Antón García, Roberto González-Quevedo, Berta Piñán y Xuan Xosé Sánchez Vicente.[2]
El veredictu fízose públicu'l 13 de xineru de 2017 y dio como ganador al tinetense Xuan Bello.
El xuráu destacó que'l mesmu «asitió l'asturianu nel mapa de la lliteratura estatal ya internacional» refiriéndose concretamente a la so obra Hestoria Universal de Paniceiros. Nesta edición el xuráu tuvo compuestu por: Ana María Cano (Presidenta de l'Academia), Xosé Antón González Riaño, Xosé Ramón Iglesias y Carmen Muñiz Chacón (académicos de númberu); Fernando Padilla Palicio (representante de la Conseyería) y los profesores de la Universidá d'Uviéu José Luis García Martín y Leopoldo Sánchez Torre (personalidaes de reconocíu prestixu).[3]