Xosé Antón González Riaño

De Wikipedia
Saltar a: navegación, buscar
Xosé Antón González Riaño, 2017.

Xosé Antón González Riaño (Viella, Siero 1956) ye maestru, pedagogu y Profesor Titular de la Universidá d'Uviéu, institución na que se doctoró en 1993 con una tesis sobre la interferencia llingüística escolar ente l'asturianu y el castellanu -investigación qu'algamó'l Premiu Estraordinariu de Doctoráu-, anguaño imparte docencia nel Departamentu de Ciencies de la Educación y ye Presidente de l'Academia de la Llingua Asturiana dende'l 23 de xunu de 2017.

Carrera[editar | editar la fonte]

La so especialización docente ya investigadora xira al rodiu de la metodoloxía de la enseñanza de les llingües, el billingüismu escolar, los aspeutos sociollingüísticos y socioeducativos arreyaos a la presencia escolar de les llingües, les rellaciones ente la enseñanza llingüística y la interculturalidá, les condiciones deprendizax de les llingües minoritaries (con especial procuru na situación del asturianu), ente otres. Acordies con esti enclín investigador, dirixó hasta agora seis tesis doctorales que, en tolos casos, fueron calificaes cola máxima puntuación.

Miembru de númberu de l'Academia de la Llingua Asturiana dende 1987, foi Vicepresidente de la institución y responsable del programa de formación de la mesma, dirixendo la UABRA. Al empar, foi l'entamador y direutor de la coleición académica "Estaya Pedagóxica", onde s'espublizaron 20 volúmenes rellacionaos con anovaciones didáutiques pa la enseñanza del asturianu nos centros educativos. Ye autor d'un centenar de publicaciones científiques (ente llibros, capítulos, artículos y actes de congresos). Dalgunes de les sos aportaciones espublizáronse en revistes d'impautu nel ámbitu internacional (Francia, Reinu Xuníu y Estaos Xuníos, ente otros países). En 2005 el Ministeriu d'Educación y Ciencia d'España concedió-y, xunto cola Dra. María Louzao, el Premiu Nacional d'Investigación Educativa.

Bibliografía[editar | editar la fonte]

  • Didáutica del vocabulariu de la llingua asturiana (1990)
  • Didáutica de la llingua asturiana. Espresión oral y escrita (1991)
  • Interferencia lingüística y escuela asturiana (1994)
  • Actes del IV Alcuentru (1997)
  • Educación billingüe. Actes del V y VI Alcuentru "Llingua Minoritaria y Educación" (1998)
  • El Proyeutu Llingüísticu de Centru (2000)
  • Enseñances llingüístiques y competencies educatives. Actes del VII Alcuentru "Llingua Minoritaria y Educación" (2001)
  • Manual de Sociollingüística (2002)
  • Les habilidaes llingüístiques nel aula. Actes del VIII Alcuentru "Llingua Minoritaria y Educación" (2002)
  • Nueves llendes na enseñanza d'una llingua minoritaria. Actes del IX Alcuentru "Llingua Minoritaria y Educación" (2003)
  • Les llingües n'Asturies: usu y valoración de la so importancia educativa. Estudiu empíricu fechu col alumnáu de Maxisteriu de la Universidá d'Uviéu (con Xandru Armesto Fernández, 2004)
  • Llingua y lliteratura nes aules. Actes del X Alcuentru (2005)
  • Estudiu sociollingüísticu de Lleón. Identidá, conciencia d'usu y actitúes llingüístiques nes fasteres que llenden con Asturies (con Xosé Lluis García Arias, 2006)
  • Recursos y estratexes didáutiques. Actes del XI Alcuentru Internacional (2007)
  • II Estudiu sociollingüísticu de Lleón. Identidá, conciencia d'usu y actitúes llingüístiques de la población lleonesa (con Xosé Lluis García Arias, 2008)
  • Estudiu sociollingüísticu de Zamora (Fastera occidental) (con Xosé Lluis García Arias, 2011)


Predecesor:
Ana Cano
Presidente de la
Academia de la Llingua Asturiana

23 de xunu de 2017 - Nel cargu
Socesor:
Nel cargu