Muséu Exipciu de Berlín

De Wikipedia
Saltar a navegación Saltar a la gueta
Artículu revisáu

El Muséu Exipciu de Berlín (n'alemán: Ägyptisches Museum und Papyrussammlung) custodia una de les coleiciones más importantes del mundu d'antigüedaes exipcies. La colección ye parte del Neues Museum.

Muséu Exipciu de Berlín.

Historia[editar | editar la fonte]

El muséu anicióse nel sieglu XVII de la coleición d'arte real de los monarques de Prusia.[1] Alexander von Humboldt encamentara que se creara una seición exipcia, y los primeros oxetos lleváronse a Berlín en 1828 con Federicu Guillermu III de Prusia. Dempués de la Segunda Guerra Mundial, mientres la cual sufrió graves daños, el muséu quedó estremáu ente'l Berlín Oriental y el Berlín Occidental, axuntáu de nuevu dempués de la Rexunificación d'Alemaña.[1]

La coleición[editar | editar la fonte]

La coleición ufierta una visión completa de la cultura y l'arte del Antiguu Exiptu mientres un periodu de cuatros milenios. El muséu ta entamáu en tres zones temátiques: la vida cotidiana nel valle del Nilo, la veneración de faraones y dioses, y les creencies nel más allá. Tamién tien parte de los más significativos escritos exipcios antiguos en papiru, como'l Papiru Westcar.

La coleición compónse d'oxetos que daten dende'l periodu predinásticu d'Exiptu (ca. 4000 e.C.) hasta'l periodu de dominación romana, anque la mayoría daten del reináu d'Akenatón (ca. 1340 e.C.)[2]

La obra más famosa esibida ye'l Bustu de Nefertiti, esceicionalmente bien calteníu y de vivos colores. La coleición foi treslladada de Charlottenburg al Altes Museum en 2005 y foi reasitiáu nel Neues Museum, reconstruyíu na Islla de los Museos de Berlín n'ochobre de 2009.

Ver tamién[editar | editar la fonte]

Referencies[editar | editar la fonte]

  1. 1,0 1,1 «Egyptian Museum and Papyrus Collection». Encyclopaedia Britannica. Consultáu'l 24 d'abril de 2010.
  2. «Egyptian Museum and Papyrus Collection». Staatliche Museen zu Berlin. Consultáu'l 11 de xunetu de 2014.

Enllaces esternos[editar | editar la fonte]