Modelu atómicu de Thomson

Representación del modelu de Thomson. Esfera completa de carga positiva con electrones enllastraos

El modelu atómicu de Thomson ye una teoría sobre la estructura atómica propuesta en 1904 por Thomson, quien afayó'l electrón en 1897, pocos años antes del descubrimientu del protón y del neutrón. Nel modelu, el átomu ta compuestu por electrones de carga negativa nun átomu positivu, encuallaos nesti al igual que les pases d'un pudin. Por esta comparanza, foi que'l supuestu denominóse Modelu del pudin de pases». Postulaba que los electrones distribuyíense uniformemente nel interior del átomu suspendíos nuna nube de carga positiva. L'átomu considerábase como una esfera con carga positiva con electrones partíos como pequeños gránulos. La ferramienta principal cola que cuntó Thomson pal so modelu atómicu foi la eletricidá.

Ésitos del modelu

El nuevu modelu atómicu usó l'amplia evidencia llograda gracies al estudiu de los rayos catódicos a lo llargo de la segunda metá del sieglu XIX. Magar el modelu atómicu de Dalton daba debida cuenta de la formación de los procesos químicos, postulando átomos indivisibles, la evidencia adicional suministrada polos rayos catódicos suxería qu'esos átomos conteníen partícules llétriques de carga negativa. El modelu de Dalton inoraba la estructura interna, pero'l modelu de Thomson amestaba les virtúes del modelu de Dalton y simultáneamente podía esplicar los fechos de los rayos catódicos.

Insuficiencias del modelu

Magar el modelu de Thomson esplicaba afechiscamente munchos de los fechos reparaos de la química y los rayos catódicos, faía predicciones incorreutes sobre la distribución de la carga positiva dientro de los átomos. Les predicciones del modelu de Thomson resultaben incompatibles coles resultancies del esperimentu de Rutherford, que suxería que la carga positiva taba concentrada nuna pequeña rexón nel centru del átomu, que ye lo que más tarde se conoció como nucleu atómicu. El modelu atómicu de Rutherford, dexó esplicar esto últimu, revelando la esistencia d'un nucleu atómicu cargáu positivamente y d'elevada densidá.

Otru fechu que'l modelu de Thomson dexara por esplicar yera la regularidá de la tabla periódica de Mendeleiev. Los modelos de Bohr, Sommerfeld y Schrödinger finalmente esplicaríen les regularidaes periódiques nes propiedaes de los elementos químicos de la tabla, como resultáu d'una disposición más estructurada de los electrones nel átomu, que nin el modelu de Thomson nin el modelu de Rutherford habíen consideráu.

Ver tamién

• Teoría atómica
• Modelu atómicu de Rutherford
• Modelu atómicu de Bohr

• Modelu atómicu de Sommerfeld
• Modelu atómicu de Schrödinger
• Modelu atómicu de Dalton

Predecesor: Modelu atómicu de Dalton

'Modelu atómicu de Thomson'

Socesor: Modelu atómicu de Rutherford

Referencies

• Datos: Q274116