La nueche de los muertos vivientes

De Wikipedia
Saltar a navegación Saltar a la gueta
La nueche de los muertos vivientes
Datos
Títulu orixinal Night of the Living Dead
Xéneru Cine de terror, cine de ciencia ficción Traducir y cine de zombis Traducir
País d'orixe Estaos Xuníos
Añu 1968
Idioma orixinal inglés
Duración 96 min.
Ficha téunica
Direición George A. Romero
Producción Karl Hardman y Russell Streiner
Guión John A. Russo y George A. Romero
Música William Loose
Fotografía George A. Romero
Edición John A. Russo
Repartu Duane Jones, Judith O'Dea, Karl Hardman, Marilyn Eastman, Keith Wayne, Judith Ridley, Kyra Schon, Charles Craig, Bill Hinzman Traducir, Russell Streiner, Bill Cardille, George A. Romero, Debbie Rochon y John A. Russo
Ver llista completa
Compañíes
Distribuidora Walter Reade
Costu 114 000 dólares de los Estaos Xuníos
Recaldación 30 000 000 Q4917
La nueche de los muertos vivientes Dawn of the Dead
Enllaces esternos
Ficha n'IMDb
Ficha en FilmAffinity
Cambiar los datos en Wikidata
La nueche de los muertos vivientes

La nueche de los muertos vivientes (Night of the Living Dead n'inglés) ye un llargumetraxe independiente de Terror de 1968, fechu n'Estaos Xuníos d'América y dirixíu por George A. Romero, con Duane Jones, Judith O'Dea y Karl Hardman como actores principales.

La trama entama con dos hermanos que deciden dir a visitar la tumba del so padre nun alloñáu cementeriu allugáu metanes una biesca, pero dambos son atacaos por un estrañu. Ella sobrevive y llogra fuxir hasta una casa cercana, pero namás afaya un cuerpu parcialmente mutiláu. Al salir asustada atopa un home que-y cunta que los muertos llevantárense p'acabar colos vivos. Dempués del estrenu, la cinta recibió crítiques pola so violencia gráfico, pero en pasando los años convirtióse en referencia del cine de zombies.

Doblaxe n'asturianu[editar | editar la fonte]

Gonzali Producciones dobló al asturianu esti filme y en 2012 asoleyólu nun DVD onde la productora tamién incluyó “La lexón de los homes ensin alma”, versión subtitulada de “White Zombie”, el clásicu que dirixó Victor Helperin en 1932 y cunta con una de les grandes interpretaciones de Bela Lugosi. La nueche de los muertos vivientes foi'l primer llargumetraxe dobláu n'asturianu.

Producción[editar | editar la fonte]

Financiación[editar | editar la fonte]

George A. Romero entamó la so carrera cinematográfica tres de graduase na Universidá Carnegie Mellon de Pittsburgh. Xunto con John Russo y Russell Streiner fundó la compañía The Latent Image, cola que ficieron comerciales de televisión. Mientres esti periodu decidieron filmar una película de terror. El tríu contautó a Karl Hardman y Marilyn Eastman, presidente y vicepresidente, respeutivamente, d'una compañía nomada Hardman Associates, Inc., a los que-yos cuntaron el so proyeutu. Col envís de financiar el filme, Romero, Russo, Streiner, Eastman y Hardman fundaron la compañía Image Ten a la fin de buscar inversionistes. La película tuvo un presupuestu aprosimáu de 114.000 dólares.

Guión[editar | editar la fonte]

El guión escribiéronlu Romero y Russo. Basáronse na idea central de la novela Soi lleenda, de Richard Matheson, un llibru que describe un mundu estrozáu tres d'una guerra bactereolóxica, que provocó la mutación de los seres humanos en criatures asemeyaes a los vampiros. Romero prefirió nun emplegar vampiros, yá que Matheson ficiéralo nel so textu. Según el direutor, nunca nun pensó nellos como zombis, pues naquella tovía yeren identificaos como un mitu de les rexones caribeñes. Escoyó amosar el colapsu de la sociedá, en vez d'entamar la trama cuando esti fechu yá se consumara.

Sobre la naturaleza de los zombies na so película, George A. Romero faló nuna entrevista de 2007.1

Casting[editar | editar la fonte]

Los actores que participaron nel llargumetraxe nun teníen muncha esperiencia nel cine, siendo'l debú de varios nel mediu. El personaxe de Ben interpretólu Duane Jones, qu'actuara en delles obres de teatru. L'otru rol protagónicu, Barbra, foi interpretáu pola actriz Judith O'Dea. O'Dea trabayara en comerciales con Karl Hardman y Marilyn Eastman, y viaxó dende Hollywood pa participar na película. Russell Streiner actuó como Johnny, l'hermanu de Barbra. Karl Hardman y Marilyn Eastman, qu'aidaron a financiar la película, interpretaron a Harry y Hellen Cooper, el matrimoniu que s'abelluga na granxa xunto colos otros personaxes. La fía de la pareya, Karen, interpretóla Kyra Schon, fía de Karl Hardman. Keith Wayne y Judith Ridley participaron como Tom y Judy, una pareya de mozos. Ridley trabayó posteriormente na comedia romántica There's Always Vanilla (1971) de George Romero.

Los zombis de La nueche de los muertos vivientes yeren amigos del equipu de producción y habitantes d'Evans City.2 El zombi qu'ataca a Barbra y Johnny nel cementeriu foi interpretáu por Bill Hinzman. La escena onde apaez foi una de les últimes en filmase, y aceutó'l rol dempués que-ylo pidiera Romero.3

Rodaxe[editar | editar la fonte]

El rodaxe escomenzó en xunu de 1967 y duró cerca de nueve meses. Les escenes de la película filmáronse n'Evans City (Pensilvania), nuna zona rural. Los primeros minutos, qu'alluguen a Barbra y el so hermanu nel campusantu, rodáronse nel cementeriu d'Evans City, y el restu nuna granxa que diben valtar, polo que'l dueñu dio-y llibertá al equipu de producción pa facer con ella lo que necesitaren.

La nueche de los muertos vivientes rodóse en blancu y negru, con película de 35 mm. Los efeutos especiales viéronse mui condicionaos pol presupuestu. Otros de los títulos pensaos pal llargumetraxe fueron Night of Anubis y Night of the Flesh Eaters.

Receición[editar | editar la fonte]

Zombie dead live.png

La película estrenóse'l 1 d'ochobre de 1968. Pola mor de que l'Asociación Cinematográfica d'Estaos Xuníos nun se creara hasta un tiempu dempués, a la cinta nun la clasificaron por edaes, fechu que permitió'l so visionáu por cualquier persona. 

La violencia gráfico de la película criticóse en dellos medios, pero otros críticos de cine destacaron el resultáu final y diéron-y valir al so méritu.

Influencia[editar | editar la fonte]

La nueche de los muertos vivientes indentificóse como la responsable d'afitar les bases del arquetipu zombi na cultura popular. Enantes de 1968, esti tipu de criatures correspondíen a seres míticos del folclor d'Haití, que yeren representaos como muertos reanimaos per aciu del vudú. Una conceición adoptada tamién pol cine, pues les películes anteriores a la de Romero teníen llugar xeneralmente en países del Caribe y los zombis yeren les más de les veces de raza negra. Exemplu d'ello son les películes White Zombie (1932) ya I Walked with a Zombie (1943). La nueche de los muertos vivientes camudó la manera de ver a los zombis, que pasaron de seres serviles a caníbales incontrolables.

Referencies[editar | editar la fonte]

  1.  Roberts, Sheila (2007). «Interview: George Romero» (n'inglés). MoviesOnline.
  2.  «Night of the Living Dead - Zombies» (n'inglés). Homepage of the Dead.
  3.  Collis, Clark (28 d'ochobre de 2010). «'Night of the Living Dead': How a 42-year-old zombie movie refuses to die» (n'inglés). Entertainment Weekly.

Enllaces esternos[editar | editar la fonte]