L'aire de les castañes

De Wikipedia
Saltar a navegación Saltar a la gueta
L'aire de les castañes
Datos
Cambiar los datos en Wikidata

L'aire de les castañes ye la primer novela p'adultos de Vicente García Oliva. Ye una de les primeres noveles negres de la lliteratura asturiana, amás de ser una de les primeres noveles n'asturianu que trató'l tema de la homofobia y la existencia de persones con una sexualidá diferente a la mayoría -la primera foi Añada pa un güeyu muertu, d'Adolfo Camilo Díaz-. Publicóse en 1989 de la mano de la editorial avilesina Azucel.

Argumentu[editar | editar la fonte]

L'aire de les castañes cuenta la historia de la investigación del asesinatu del homosexual Piñerina realizada pol periodista Mario y el so collaciu fotógrafu Nanu, que trabayen nel selmanariu de sucesos 'La verdá'. Al empar, el protagonista, Mario, llucha por recuperar la so rellación con Nora. Basada nun fechu real, l'asesinatu d'un conocíu homosexual xixonés, la novela respuende a les esixencies formales y estilístiques del xéneru negru, entemeciendo marxinalidá, dureza espresiva y realismu con ternura, amás de tener critica social y política, puesta en boca de dellos personaxes y la recreación d'hipotétiques situaciones polítiques nuna Asturies deseosa de reconocimientu.


La obra, anque ensin nomar la ciudá, trescurre íntegra en llugares de Xixón, especialmente nel barriu de Cimavilla. Clasificada por dalgunos como "novela negra", narra la hestoria de la investigación del asesinatu de Piñerina, personaxe y circunstancia que tienen el so paralelu real n'Alberto Alonso Blanco, Rambal, homosexual asesináu nel barriu marineru en 1976. La llocalización ye claramente xixonesa, non tanto por referencies concretes a llugares sinón pol ambiente que queda reflexáu nes páxines de la obra: el vientu del nordeste, la borrina, el mugor, la descripción del barriu, de los cafés, y, como non, l'aire de les castañes, vientu del sur que tien fama de volver lloca a la xente.

Obra pionera[editar | editar la fonte]

Depués de La muerte amiya de nueche, de Xuan Xosé Sánchez Vicente, publicada en 1984, esta obra forma parte del pequeñu boom que vivió la novela negra n'asturianu a finales de los 80, cola publicación d'El cai nunca duerme, de Xosé Nel Riesgo -Premiu Llorienzu Novo Mier y una de les primeres obres qu'averó'l llinguaxe marxinal urbanu al asturianu-, Mienteme: dime la verdá, d'Adolfo Camilo Díaz, y Tráficu de Cuerpos, de Xandru Fernández. Les dos últimes y la novela d Vicente García Oliva foron publicaes pola editorial Azucel, qu'apostó por un xéneru con bien d'éxitu nos años 80 n'España, gracies a autores como Manuel Vázquez Montalbán.

Versión cinematográfica[editar | editar la fonte]

Una adautación del llibru fecha por Eva Lesmes y Victor García de la Concha ganó'l Premiu Pilar Miró de guiones para telefilmes[1], un concursu a nivel estatal de guiones de películes pa televisión, amás colos diálogos n'asturianu. La intención yera rodar la película n'Asturies, pero'l desinterés del Gobiernu asturianu fixo que la cinta acabara rodándose nel País Vascu baxo'l títulu de La noche del escorpión[2]. Emitióse per delles cadenes de la FORTA y contó cola direición de l'asturiana Eva Lesmes [3]. Sicasí, el guión cambió tanto que Vicente García Oliva nun quixo aparecer como guionista y namás aparez que la película ta basada nun argumentu d'esti escritor.

Referencies[editar | editar la fonte]