Hartford

De Wikipedia
Saltar a: navegación, buscar
Llocalización de Hartford dientro del área noreste de los Estaos Xuníos.

Hartford ye la capital del estáu estaunidense de Connecticut. Yera, tamién, la sé alministrativa del conceyu de Hartford hasta qu'el estáu abolió la división del territoriu, no que cinca a la xestión de los servicios públicos, en condaos en 1960. En 2010 tenía una población de 124.775 habitantes[1], que facíen d'ella la cuarta ciudá mayor del estáu tres de les de Bridgeport, New Haven y Stamford.

Main Street, la cai principal de Hartford.

La ciudá tien el alcuñu de "Capital mundial del seguru", una y bones nella tienen la so sé munches compañíes aseguradores, que convierten a esti sector na principal industria de la rexón[2]. Fundada en 1637, Hartford ye una de les ciudaes más vieyes del país. Nelli s'alcuentren: el muséu d'arte más antiguu del país, el Wadsworth Ateneum; el parque más antiguu del país fechu con dineru públicu, el parque Bushnell; el periódicu diariu que más tiempu lleva editándose ensin interrupción, The Hartford Courant; la segunda escuela secundaria más antigua del país, la Hartford Public; una escuela d'humanidaes privada y elitista, el Trinity College; y la Mark Twain House, la casa na qu'esti autor escribió les sos obres más famoses y na que sacó alantre a la so familia. Elli dixo de la ciudá, en 1868, que yera la más principal d'ente toes les ciudaes fermoses del mundu.

Tres de la Guerra Civil estaunidense la ciudá foi la más rica del país demientres varies décades[3]. Anguaño, por embargu, ye una de les más probes, con casi trés de cada diez families viviendo perbaxu de la llínia la probeza. Esto contrasta col fechu de que la so área metropolitana ocupa'l puestu 32 ente les 318 del país no que cinca a la so producción económica, y ye la séptima de les 280 árees estadístiques metropolitanes n'ingresos per capita. Añedimos namái otru dato qu'amuesa les diferencies ente la ciudá y los sos suburbios: el 83% de los que trabayen na ciudá y ganen más de 80.000 dólares al añu aporten a ella dende otros núcleos de población, mentanto qu'el 75% de los habitantes de la ciudá que se desplacen a otres a trabayar ganen menos de 40.000 dólares añales[4]. [[Imaxe:|right

Referencies[editar | editar la fonte]

  1. Estadística de población de Connecticut (2010), espublizada pol U.S. Census Bureau en xunu de 2012.
  2. Historia de Hartford, na web oficial de la ciudá.
  3. Probeza nuna tierra de prosperidá: ¿Podrá Hartford recuperase dacuándo?, artículu de Paul Zielbaur nel The New York Times del 26 d'agostu de 2002 (n'inglés).
  4. Metro Hartford Progress Points 2014.

Enllaces esternos[editar | editar la fonte]

N'inglés Páxina oficial


Icono de esbozo
Esti artículu ye un entamu. Puedes ayudar a la Wikipedia n'asturianu ampliándolu.