Fonte d'enerxía

Les fontes d'enerxía son ellaboraciones naturales más o menos complexes de les que l'home ye quien a sacar enerxía pa facer un trabayu determináu.

Dende la prehistoria, cuando la humanidá descubrió'l fueu pa se calecer y asar los alimentos, pasando pela Edá Media na que facía molinos de vientu pa moler el trigu, hasta la época moderna na que pue sacase enerxía llétrico fisionando l'átomu pa ver la televisión, l'home guetó ensin s'aparar les fontes d'enerxía de les que s'aprovechar.

Les fontes d'enerxía emplegaes pricipalmente, dende la Revolución Industrial hasta los nuesos díes, son los combustibles fósiles; per un llau'l carbón p'alimentar les máquines de vapor industriales y de tracción ferrocarril asina como los llares, y per otru, el petroleu y los sos derivaos na industria y nel tresporte (principalmente l'automóvil), sicasí éstes convivieron con otres a menor escala como la enerxía eólico, la enerxía hidráulico, la biomasa, etc.

Esti modelu de desendolcu, sicasí, tien el problema de la reposición de los recursos, procesu que toma miles d'años.

La gueta de fontes d'enerxía nun escosables y l'intentu de les grandes potencies industrializaes d'encontar les sos economíes ñacionales amenorgando la so dependencia de los combustibles fósiles, concentraos en territorios foriatos, llevólos a l'adopción de la enerxía nuclear y naquellos con abondos recursos hídricos, al aprovechamientu hidráulicu intensu de los sos cursos d'augua.

A fines del sieglu XX entamóse a cuestionar el modelu enerxéticu por dos razones:

Los problemes medioambientales derivaos del emplegu de combustibles fósiles, como'l smog de grandes ciudaes como Londres o Los Angeles, o l'escalientu global del planeta.

Los riesgos de l'emplegu de la enerxía nuclear, manifestaos n'accidentes como'l de Chernóbil.

Propónse entós l'emplegu d'enerxíes llimpies, ye dicir, aquelles qu'amenorguen los impautos ambientales producíos, ente les qu'hai que citar l'aprovechamientu de:

El sol: enerxía solar
El vientu: enerxía eólico
Los ríos y corrientes d'augua duce: enerxía hidráulico
Los mares y océanos:enerxía mareomotriz
La calor de la Tierra: enerxía xeotérmico
L'átomu: enerxía nuclear
La materia orgánico: biomasa, gas natural (éstes son enerxíes anovables, pero non llimpies; son "sucies" como tou combustible, pues emiten CO2)

Toes elles son anovables, cola esceición del gas natural.

Al respeutive de les denomaes enerxíes alternatives (vientu, augua, sol y biomasa), hai que señalar que la so esplotación a escala industrial, contéstase dende dellos grupos ecoloxistes, dao que los impautos medioambientales d'estes instalaciones y de les llinies de distribución d'enerxía llétrico que precisen puen ser importantes, perespecialmente si como pasa abondes vueltes (casu de la enerxía eólico) s'ocupen espacios naturales que permanecíen ayenos al home.

Ver tamién

Referencies

Enllaces esternos