FG Sagittae

De Wikipedia
Ficha d'oxetu celesteFG Sagittae
estrella[1], near-IR source (en) Traducir[1] y Nebulosa planetaria[1]
Datos d'observación
Ascensión reuta (α) 302,98358148667 °[2]
Declinación (δ) 20,33456137337 °[2]
Distancia a la Tierra 3,548 kpc
Magnitú aparente (V) 9,45 (banda V)
Constelación Sagitta
Velocidá radial 37,5 km/s[5]
Parallax 0,6821 mas[2]
Tipu espectral G8/K0Iae[6]
Otros nomes
Cambiar los datos en Wikidata

Coordenaes: Sky map 20h 11m 56.06s, 20° 20 4.421

FG Sagittae (FG Sge)[7] ye una estrella variable de carauterístiques escepcionales asitiada na constelación de Sagita, la flecha. D'alcuerdu a la paralax llograda pol satélite Hipparcos (5,38 ± 1,77 milisegundos d'arcu),[7] alcuéntrase a 606 años lluz del Sistema Solar.

Carauterístiques[editar | editar la fonte]

FG Sagittae ye una estrella superxigante que s'atopa nel centru d'una nebulosa planetaria moza, denomada He 1-5, qu'espulsó hai unos pocos miles d'años. Evolucionó significativamente nos últimos años, camudando'l so tipu espectral de B4Ia en 1955 a A5Ia en 1967, a F6Ia en 1972 y anguaño ye una estrella naranxa de tipu espectral K2Ib.[8] Ye un casu únicu d'una estrella que nel intre d'una vida humana camudó de color azul a naranxa col subsiguiente descensu de la so temperatura.

Piénsase que, nel momentu del so descubrimientu, FG Sagittae yera una estrella post-RAG qu'empezara a espulsar les sos capes esternes pa formar una nebulosa planetaria. La estrella probablemente empezó a aumentar el so rellumu a finales del sieglu XIX de resultes de la ignición nuclear d'una fina capa d'heliu qu'arrodiaba'l nucleu inerte d'oxíxenu-carbonu. La enorme enerxía lliberada en dichu procesu favoreció la espansión de les sos capes esternes; como toles estrelles xigantes, FG Sagittae esfrecióse cuando la so lluminosidá foi distribuyida sobre una área superficial muncho más grande. Como resultancia, mientres delles décades FG Sagittae fíxose muncho más brillosu pero tamién muncho más colorada.[8]

N'última instancia, FG Sagittae ye un oxetu de flax del heliu final, similar al Oxetu de Sakurai, a puntu de faer una rápida transición escontra una nana blanca.[9]

Les estrelles que, como FG Sagittae, alcuéntrase nes últimes fases de la so vida sufren cambeos importantes na so composición química; per una parte, empiecen a perder les sos capes esternes, formaes sobremanera por hidróxenu y heliu, quedando una fracción cada vegada mayor de la masa estelar compuesta por material resultante de la fusión nuclear. Como munches estrelles AGB, l'espectru de FG Sagittae amuesa munchos elementos provenientes del procesu-s realzaos. La bayura d'hidróxenu na so superficie ta menguando, posiblemente pola perda de masa estelar al crease la nebulosa planetaria. La bayura d'heliu na superficie podría tar tamién aumentando, lo que puede ser un signu de que ta xubiendo material dende l'interior.[8]

Variabilidá[editar | editar la fonte]

La variabilidá de FG Sagittae foi detectada per vegada primera en 1944 por Cuno Hoffmeister.[8] La so magnitú aparente, que yera +13 en 1900, aumentó hasta +9 mientres los 60 años siguientes pa volver atenuase hasta magnitú +14 en 1992, con un mínimu marcáu de +16 en 1996. Dende los años 1990, pórtase como una variable R Coronae Borealis, con escurecimientos y recuperaciones parciales producíos por polvu qu'escurez la estrella. Ye una incógnita si esti comportamientu va siguir nel futuru, pero piénsase que posiblemente estos sópitos cambeos van prosiguir hasta que s'escose'l gas de la capa d'heliu, procesu que puede durar dellos sieglos.[8]

Referencies[editar | editar la fonte]

  1. 1,0 1,1 1,2 Afirmao en: SIMBAD.
  2. 2,0 2,1 2,2 Afirmao en: Gaia EDR3. Stated in source according to: SIMBAD. Llingua de la obra o nome: inglés. Data d'espublización: 3 avientu 2020.
  3. «The galactic structure and chemical evolution traced by the population of planetary nebulae» (n'inglés). The Astrophysical Journal:  páxs. 1096–1107. 2010. doi:10.1088/0004-637X/714/2/1096. 
  4. Afirmao en: Catalogue of Stellar Photometry in Johnson's 11-color system. Stated in source according to: SIMBAD. Llingua de la obra o nome: inglés. Data d'espublización: 2002.
  5. «Pulkovo Compilation of Radial Velocities for 35 495 Hipparcos stars in a common system» (n'inglés). Astronomy Letters (11):  páxs. 759–771. payares 2006. doi:10.1134/S1063773706110065. 
  6. Afirmao en: The spectrum of FG Sge in 1979-1980. I. Lambda lambda 3700-5000 A. Stated in source according to: SIMBAD. Páxina: 363–369. Data d'espublización: 1982. Autor: Agnès Acker.
  7. 7,0 7,1 FG Sagittae (SIMBAD)
  8. 8,0 8,1 8,2 8,3 8,4 FG Sagittae - Revisited (AAVSO)
  9. FG Sagittae. The internet Encyclopedia of Science (n'inglés)

Coordenaes: Sky map 20h 11m 56.06s, 20° 20 4.421