Superxigante

De Wikipedia
Saltar a navegación Saltar a la gueta
04-11-2020 16:59
Diagrama de Hertzsprung-Russell:
Ascises: Tipu espectral/ Ordenaes: Magnitú absoluta
0 Hiperxigantes. Ia, Ib Superxigantes. II Xigantes lluminoses. III Xigantes. IV Subxigantes. V Secuencia principal. VI Subnanes. VII Nanes blanques.

Les estrelles superxigantes (supergiant stars n'inglés) son estrelles con mases entendíes ente 10 y 50 mases solares y enormes dimensiones, que nel casu de les superxigantes coloraes pueden ser del orde de 1000 vegaes la del Sol. Ocupen la parte cimera del diagrama de Hertzsprung-Russell. Na clasificación espectral de Yerkes son de clase de lluminosidá Ia (les superxigantes más lluminoses), o Ib (les menos lluminoses). Los sos magnitúes absolutes bolométriques típiques van dende -5 a -12. Les superxigantes desaxeradamente lluminoses suelen clasificase como hiperxigantes (clase 0).

Carauterístiques[editar | editar la fonte]

El radio de les superxigantes puede tar ente los 30 y los 500 radios solares, anque n'ocasiones puede superar los 1000 radios solares. La Llei de Stefan-Boltzmann establez que les superficies relativamente fríes de les superxigantes coloraes irradien menos enerxía por unidá d'área que les de les superxigantes azules; con éses pa una lluminosidá dada, les superxigantes coloraes son más grandes que les sos homólogues azules.

Por cuenta de la so gran masa, peracaben enerxía a un ritmu bien eleváu, siendo bien lluminoses; por casu, Naos (ζ Puppis) tien una lluminosidá de cerca d'un millón de vegaes la del Sol. Per otra parte, tienen una vida curtia, escosando'l so combustible nuclear nunos pocos millones d'años y esplotando como supernoves a la fin de les sos vides.

Les superxigantes pueden pertenecer a diverses clases espectrales, dende les nueves superxigantes azules, pertenecientes a la clase O, hasta les evolucionaes superxigantes coloraes, de clase M. Rígel (β Orionis), la estrella más brillosa de la constelación d'Orión, ye una típica superxigante blancu-azulada, ente que Betelgeuse (α Orionis) y Antares (α Scorpii) son superxigantes coloraes.

Distribución[editar | editar la fonte]

Como son de curtia vida, les estrelles superxigantes principalmente repárense n'estructures cósmiques de poca edá, como los cúmulos abiertos mozos, los brazos de les galaxes espirales y les galaxes irregulares. Polo xeneral, son menos abondosos nos bulbos galácticos, y son raramente reparaes en galaxes elíptiques o cúmulos globulares, que tán constituyíos por estrelles vieyes.

L'estudiu de les superxigantes ye una área d'investigación intensa, que se ve enzancada por factores como la perda de masa estelar. Ye por ello que'l so estudiu nun se circunscribe a estrelles individuales, sinón que l'enclín actual ye estudiar cúmulos d'estrelles pa depués comparar la distribución de los modelos resultantes coles distribuciones de superxigantes reparaes en galaxes como les Nubes de Magallanes.

Piénsase que la mayoría d'estrellar proxenitores de les supernoves tipu II son superxigantes coloraes. Sicasí, la proxenitora de la Supernova 1987A foi una superxigante azul, anque se cree qu'antes foi una superxigante colorada qu'espulsó la so envoltura esterior per mediu d'un fuerte vientu estelar.

Principales superxigantes[editar | editar la fonte]

Na siguiente tabla figuren les superxigantes más brilloses pal observador terrestre.

Nome Denominación de Bayer Magnitú aparente Tipu espectral Radio (Rsol) Lluminosidá* (Lsol)
Rigel β Orionis 0,12 B8Iab: 70 66.000
Betelgeuse α Orionis 0,58 M2Iab: 630 63.000
Antares α Scorpii 1,09 M1.5Iab-b 700 70.000
Deneb α Cygni 1,25 A2Iae 108-114 54.400
Adhara ε Canis Majoris 1,51 B2Iab: 11,4 20.000
Alnilam ε Orionis 1,70 B0Iab: 31 375.000
Mirfak α Persei 1,79 F5Iab: 62 5.400

*bolométrica

Les estrelles más grandes conocíes, en términos de tamañu físicu (non de masa o lluminosidá), son les superxigantes VY Canis Majoris, VV Cephei, V354 Cephei, KW Sagittarii, KY Cygni y μ Cephei (la estrella granate d'Herschel).

Ver tamién[editar | editar la fonte]