Papa Lluteriu

San Eleuteriu
Nome	Eleuterus, Eleutherius
Data de nacencia	nun se conoz
Llugar de nacencia	Nicópolis (Grecia)
Aniciu del papáu	175
Fin del papáu	189
Predecesor	Soteriu
Socesor	Víctor I

San Eleuteriu, que'l so nome significa en griegu 'home llibre' y paez indicar que foi un esclavu lliberáu, aportó en Roma acompañando al papa Anicetu y nel pontificáu d'esti foi diáconu de la Ilesia de Roma y actuó como secretariu papal nel alcuentru qu'Anicetu tevo con San Policarpu.

Foi elixíu papa nel añu 175, polo que ye'l caber papa qu'apaez na llista espublizada por Irenéu de Lyon del añu 180. Los sos primeros cinco años de pontificáu trescurrienon nel mandáu del emperador Marcu Aureliu que yá relaxare l'envión persiguidor contra los cristianos, pero sedrá cuando algame'l tronu'l so fíu Cómodu que cesen les persecuciones y la Ilesia pueda dedicase a solucionar les divisiones que les doctrines gnóstiques, montanista y marcionita provocaren nel so interior.

Al rodiu del 177, Irenéu, orixinariu d'Esmirna, acompaña a dellos confesores de Lyon a ver al papa Eleuteriu pa discutir con elli la cuestión de los efeutos de la herexía montanista. Irenéu ye llevador d'una carta na que la ilesia de Lyon ruega al papa que sofite la xunidá de la comunidá.

Más tarde, tamién por motivos de la controversia montanista, vieno en Roma pa alcontrase con Eleuteriu l'obispu Abercius de Hierápolis en Frixa. Tamién en tiempos d'Eleuteriu tien llugar en Roma la cisma de Blastu por mor de la cuestión pascual.

Nel pontificáu d'Eleuteriu, Irenéu escribe una gran obra contra los gnósticos, l'Adversus haereses, onde estudia toles escueles heterodoxes.

Eleuteriu mandó a Fugaciu y Damián a convertir a los bretones. Suprimió dalgunos vezos hebraicos sobre la pureza y impureza de les comíes que los cristianos-yos daben gran importancia.

Enllaces esternos

• Obres del Papa Eleuteriu (en llatín)

Predecesor: Soteriu

175-189

Socesor: Víctor I