Cosso

De Wikipedia
Saltar a navegación Saltar a la gueta

Cosso: (Cossue o Cosei en dativu) según les llábanes votives afayaes, yera un dios del noroeste de la Península Ibérica que los romanos asemeyaben a Marte.

El so cultu espardíese pela fastera de costa atlántica que percuerre’l centru de Portugal hasta la Mar Cantábrica, (árees de los Bracaros, Cilenos, Célticos y Artabros toos ellos Galaicos) entrando nos montes astures de Gigurros, Lougeos y Susarros.

Trátase d'un dios asemeyáu a Marte, que encualla col calter d'estes tribus, que como cuenta Estrabón (4-4.5) taben en continuu pie de guerra enantes del arribu los romanos. Cuando se refier a los habitantes montañeses del norte (Xeografía. llibru III) afita que "sacrifiquen a Ares castrones, bues y caballos". El xeógrafu camienta qu'un dios asemeyáu al Ares griegu, dios de la guerra, yera’l cimeru de los pueblos del norte.

Les escritures con radical COS- fueren estudiaes por Ferreira da Silva, ensiendo evidente’l so venceyamientu con Marte na llábana de Brandomil "COSO M(ARTI)".[1]

No que se refier a la etimoloxía de Cossu o Cosu fuere estudiada selemente por Prosper,[2] quien lu entama nuna raíz *Kom-dH-to, col significáu de " axuntu de ríos" ónde prodúzse un desendolcu mdt > ns > ss / s. Con ello, Cosso concuaya dafechu col britónicu Condatis, conocíu por delles escritures afayaes nel Reinu Xuníu y una en Sarthe (Francia).

Condate aseméyense tamién col Marte romanu (cif: CONDATI MARTI. Barnard Castle-Yorkshire) y mesmo que Cosso, el nome quier dicir "Dios del axuntu" entamáu n’una raíz *Kom-deH₁-ti. Esta asociación secundaria ente’l axuntu de les agües y ritu guerreru venceyen a Galaicos y Astures col mundu de galos y britones.

Referencies[editar | editar la fonte]

  1. "Los cultos sincréticos y su propagación por las ciudades hispanorromanas" José M. Blázquez. Actas Congreso Internacional Llugo. Vol. 1, 1999. páxs. 249-274
  2. "Lenguas y religiones prerromanas del occidente de la Península Ibérica". Blanca Mª. Prósper. Ed. Universidad de Salamanca, 2002. Pgs: 250-252