Cor Caroli

De Wikipedia
Saltar a navegación Saltar a la gueta
Cor Caroli
Cor Caroli A/B
Constelación Canes Venatici
Ascensión reuta α 12h 56min 01,7s
Declinación δ +38° 19’ 06’’
Distancia 110 ± 4 años lluz
Magnitú visual +5,61 / +2,89
Magnitú absoluta +3,62 / +0,25
Lluminosidá 5 / 83 soles
Temperatura 6.500 / 10.300 K
Masa 1,6 / 2,8 soles
Tipu espectral F0V / A0pSiEuHg
Velocidá radial -3,1 / -3,3 km/s

Cor Caroli ye'l nome de la estrella Alfa Canum Venaticorum (α CVn / 12 Canum Venaticorum), la más brillosa na constelación de Canes Venatici, «los perros de caza». Alcuéntrase a 110 años lluz del Sistema Solar.

Nome[editar | editar la fonte]

El nome Cor Caroli («Corazón de Carlos») foi asignáu en 1725 pol astrónomu Edmund Halley n'honor del rei Carlos II d'Inglaterra, a suxerencia del físicu de la corte, Sir Charles Scarborough, quien afirmó que la estrella rellumara de forma especial nel víspora del regresu del monarca a Londres el 29 de mayu de 1660.[1]

Carauterístiques del sistema[editar | editar la fonte]

Cor Caroli ye una estrella binaria con una separación visual ente los sos componentes de 19 segundos d'arcu, polo que puede ser resuelta con un pequeñu telescopiu. La estrella principal del sistema, de magnitú aparente +2,89, ye la más oriental y recibe el nome de Cor Caroli A (HD 112413 / HR 4915).[2] Ye una estrella blanca de 10.300 K de temperatura superficial, una lluminosidá 83 vegaes mayor que la del Sol y una masa de 2,8 mases solares. Ye d'especial interés el so campu magnéticu estelar, unu de los más intensos que se conocen, 1500 vegaes mayor qu'el campu magnéticu terrestre. Per otra parte, presenta concentraciones bien elevaes localmente d'elementos como siliciu, europiu y mercuriu; éstes varien col periodu de rotación de la estrella de 5,5 díes. Probablemente'l campu magnéticu ye'l responsable de la redistribución d'elementos na superficie de la estrella, col aumentu del conteníu d'unos y l'amenorgamientu d'otros. Ye'l prototipu del tipu de variables que lleven el so nome, variables Cor Caroli A.[3]

La componente secundaria del sistema, Cor Caroli B (HD 112412 / HR 4914),[4] ye una estrella de secuencia principal de tipu F0V, con una lluminosidá 5 vegaes mayor que la lluminosidá solar y una masa 1,6 vegaes mayor que la del Sol.[3] La so magnitú aparente ye +5,60.

La separación proyeutada ente dambes estrelles, 650 UA, implica un periodu orbital de, siquier, 7900 años.[3]

Referencies[editar | editar la fonte]