Charrúa
| Tipu |
pueblo indígena (es)  |
|---|---|
| Población total | 6397 (2010) |
| Llingua |
idioma charrúa (es) |
| Xeografía | |
| Estáu | Arxentina y Uruguái |
 | |
Los charrúes foron un conxuntu de pueblos amerindios qu'habitaben nos territorios del actual Uruguái, de les actuales provincies arxentines d'Entre Ríos, Santa Fe y Corrientes y tamién nel Estáu (güei brasilanu) de Rio Grande do Sul.
Les llingües charrúes son un grupu llingüísticu únicu y xebráu d'otres llingües indíxenes. Colos únicos grupos llingüísticos que tienen dalgunes carauterístiques asemeyaes ye coles llingües del Chaco y coles llingües macro-yê de Brasil.
Etimoloxía
[editar | editar la fonte]Tres del vocablu "Charrúa" xorrecieren estremaes versiones del so orixe, les más d'ellos despeutives, a saber “los arrampleros”; “los saquiadores”; “los xaguares”; “los encetaos”, y otros un poco más románticos como “los acuáticos” o “los pintaos”. Lo cierto ye qu'epítetos nun faltaron per parte de los estudiosos tocántenes a cómo identificalos. Sicasí, nada nun se sabe entá sobro cómo s'autodenomaben los integrantes d'esta familia nativa.
L'antropólogu Daniel Vidart realizó, en 2001, un ananlís etimolóxicu del términu "Charrúa", del qu'hasta esi momentu nun se conocía'l so orixe. Según Vidart, "charrúa" ye una pallabra del gallegu, que designa unes mázcares de madera usaes como disfraz. L'orixe d'estes mázcares remontaríase a la prehistoria, probablemente pa ser usaes en fiestas populares, como l'antroxu. Quien usaba en Galicia estes mázcaras llamaes charrúes, amazcaraben y se pintaben de xeitu vistosu, mentes xesticulaben con cierta agresividá.
La collorida vistimienta de los indíxenes que los europeos adicaron na invasión de les costes del Ríu de la Plata, asina como les sos cares pintaes a mou de mázcares xunto a xestos estraños, renembraron nos navegantes castellanos a aquellos gallegos que se mazcaraben nel antroxu coles sos mázcares denomaes charrúes. En poco tiempu'l términu se popularizó y s'adoptó de m´´as en más hasta los nuesos díes.
El primer documentu qu'aparez identificando a la nación Charrúa son los escritos del espedicionariu andaluz Diego García de Moguer que, en 1527, los llamó "Charruases". Llueu, en 1536, Ulrico Schmidl, militar alemán integrante de la espedición de Pedro de Mendoza, llamólos "Zechuruass". La tercer mención foi la del sacerdote estremeñu, Martín del Barco Centenera, que nos apuntes que realizó en 1573 pal so futuru poema épicu "La Argentina o La conquista del Río de la Plata" asoleyáu en 1602 utilizó'l nome "Charruaes", asemeyáu al que güei conocemos.
Carauterístiques
[editar | editar la fonte]Al momentu de l'arribada de los castellanos, los charrúes dientro del actual territoriu uruguayu ocupaben l'área al norte y al sur del Ríu Negru (o Hum) y s'averaben a la costa nel actual departamentu de Rocha. N'otras partes del territoriu había otres tribus,[1] como los:
- Chanaes, qu'habitaben en la confluyencia del ríu Negro col ríu Uruguái, les costes y islles d'esti últimu y les islles del Delta del Paraná n'Arxentina ente les provincies d'Entre Ríos, Santa Fe, Buenos Aires y hasta na de Corrientes.
- Minuanos, qu'ocupaben la costa de l'actual Arxentina sobre'l ríu Uruguái al norte de la boca del Ríu Negro.
- Yaros, que vivíen na costa oriental del ríu Uruguái ente los ríos Negro y San Salvador (actuales departamentos de Río Negro y Durazno d'Uruguái) y na zona del baxu Uruguái na provincia d'Entre Ríos na República Arxentina.
- Bohanes, que s'afayaben nos departamentos de Paysandú y Salto, anque, dalgunos mapes xesuíticos los asitien n'Entre Ríos.
- Guenoes, que taben na zona de los departamentos de Tacuarembó, Trenta y Tres y Cerro Largo estendiéndose tamién pel ríu Ibicúi, al sur de Brasil.
- Arachanes, qu'ocupaben los departamentos de Maldonado, Lavalleja, Rocha, Cerro Largo y Trenta y Tres, asina como gran parte de la zona sur de Rio Grande do Sul en Brasil.
Tres la fundación de Montevidéu, los charrúes desplazáronse haza'l Norte, absorbiendo a yaros, bohanes, guenoas, chanás y minuanos y quedando práuticamente confundíos con ellos, polo que davezu se-yos vieno designando a toos estos grupos xenéricamente como charrúes.
Esisten estimaciones diverses sobro la población de charrúes y etnies rellacionaes al momentu de l'arribada de los castellanos. Les mesmes varíen ente 8.000 (5.000 n'Uruguái) y 100.000 persones o más. Los guerreros indíxenes que cayeron na primer Buenos Aires sumaben 23.000, mentes que los guerreros mocoretae del Ríu de La Plata sumaben 18.000 homes. En 1828, cuando Uruguái s'independizó, la población indíxena yera de 30.000 persones y la de blancos de 70.000. Según dellos estudios históricos, esi númberu d'indíxenes y descendientes d'éstos nel territoriu uruguayu yera superior al qu'había na época de la conquista. Ello ye que'l territoriu recibió una importante inmigración de guaraníes que fuxeren de les misiones xesuítiques destruyíes y que s'establecieron al norte del ríu Negro.
Cultura
[editar | editar la fonte]Pertenecíen al gran conxuntu pámpidu, habiendo fisiotipos y cultura material mui semeyante a la het o pampes antiguos, a la de los tson'k o patagones, a la de los qom'lek y a la de los Cadigüegodí, pa facer mención namás de dalgunes de les etnies qu'habitaben la gran Llanura Chacopampiana y la Patagonia estra-andina. Sicasí, escontra'l sieglu XV recibieron importantes influxos culturales d'un pueblu amazónicu, el de los avá o guaraníes. De manera que muncho del léxicu actual conocíu del idioma charrúa remana d'aportes lexicales del avañe'é o guaraní, como son la toponimia y los nomes propios, al empar que'l llugar onde habitaben se refería a: "Ríu de los páxaros pintaos" (en guaraní).
Sociedá
[editar | editar la fonte]
Básicamente los charrúes nun yeren pacíficos; poseyíen una organización social perfuerte, organizaos en xefatures (esto ye: gobernaes por un 'cacique', xefe qu'anque solía pertenecer a un fonduxe debía ser escoyíu y consensuáu dafechu pol conxuntu), onde les rellaciones interpersonales yeren mui importantes y calteníen la filiación poligámica.
Ésto quier dicir que los charrúes vivíen en grupos nos qu'había un cabezaleru al que-y tiníen qu'obedecer.
Economía
[editar | editar la fonte]Nel momentu de la conquista castellana, el so mou de producción yera cazador-recoleutor, anque mui pronto supieron desenrollar un complexu ecuestre y, con ésti, una cierta ganadería basada nos bovinos y equinos. Dao'l mou de producción (cazador-recoleutor) yera una etnia (2) de "nómades" -como lo yeren cuasi tolos otros pámpidos-, polo que los únicos restos materiales de la so civilización son pequeñes envasiyes de folla asina como parte de les sos armes típiques, llances, fleches y boliadores, esta última ún de los oxetos más típicos de la rexón. Taben compuestes por dos o trés boles de piedra, uníes por un trozu de cueru d'aproximao un metru, nún noyu común. Emplegábense pa cazar principalmente al ñandú, ave típica de la mayor parte del Conu Sur, asemeyada al avestruz pero de menor tamañu.
Llingua
[editar | editar la fonte]Esistíen multitú de llingües charrúes emparentaes ente sí. En cuantes al parentescu d'éstes coles d'otros grupos llingüísticos d'América del Sur esisten diferentes teoríes. Popúnxose que podría esistir parentescu de les llingües charrúes coles llingües arawak (Perea y Alonso, 1937), coles llingües matacoanes (Ferrario), coles llingües lule-vilela (Rona, 1964) y les llingües guaicurú (Suárez, 1974).[2][3] A mediaos de 2005 un habitante de la ciudá entrerriana de Nogoyá dio a conocer que caltenía por tresmisión oral familiar la llingua chaná, una de les que conformaben l'antiguu grupu llingüsticu charrúa, la veracidá d'esti descubrimientu ta n'estudiu, pero mencionó más de 250 vocablos y frases, ente elles toles pallabres charrúes y chanaes conocíes.[4]
Historia
[editar | editar la fonte]
Respondieron con una fuerte resistencia a la colonización castellana, siendo'l primer episodiu conocíu la muerte de Juan Díaz de Solís nel so "descubrimientu" del Ríu de la Plata, magar que, según los cronistes castellanos, Solís morrió énte una "tribu" antropófaga, dao que l'antropofaxa yera práuticamente desconocida na etnia charrúa, munchos suponen que la muerte de Solís pudo debese a un gurpu amazónidu que s'atopaba nesi momentu roldando les ribes platenses, sicasí tradicionalmente atribuyérase-y a los charrúes esti fechu.
El cronista de la espedición del adelantado Pedro de Mendoza, Ulrico Scmidel, reflexó a los charrúes na so obra Viaje al Río de la Plata'llamándolos zechuruass:
Asina, col favor de Dios arribamos al Ríu de la Plata nel añu 1535. Ellí atopámonos con un pueblu d'indios llamaos zechuruass que constaba como d'unos 2.000 homes, y que nun tenía más de xintar que pexe y carne. Éstos de la que nós aportemos, abandonaron el pueblu fuxendo con muyeres y fíos, de xeitu que nun fuimos quien a dar con ellos. Esta nación d'indios anda en cueros vivos, mentes que les sos muyeres atapécense les vergoñes con un dril que-yos cubre dende l'embeligru hasta la rodiella.
La epopeya de la oposición a la conquista castellana per parte d'esta etnia diera llugar a delles obres lliteraries, como la conocida Tabaré, escrita pol poeta uruguayu Juan Zorrilla de San Martín. Los charrúes supieron revistar ente les algares del prócer José Gervasio Artigas, yá escontra los castiellanos, yá escontra los portugueses, yá escontra los brasilanos. Nel sieglu XVIII, foron fuertemente diezmaos na campaña punitiva llevada a cabu por José de Andonaegui.
En 1715 la espedición del teniente García de Piedrabuena diz qu'alcontró pela ñora Calá n'Entre Ríos, 25 toldos de yaros y bohanes. En payares de 1749, el teniente de gobernador de la ciudá de Santa Fe, Francisco Antonio de Vera Mujica prindó 339 charrúes que fuxeren del territoriu uruguayu, ente ellos los caciques Maigualen, Gleubilbe y Dóienalnaegc, que se treslladaron a l'arredolada del ríu Salado en Santa Fe, dando orixe al pueblu de Nuestra Señora de la Concepción de Cayastá fundáu'l 17 de setiembre de 1750 nel llugar onde s'asitió la primitiva ciudá de Santa Fe (Santa Fe de Luyando) y la efímera reducción de San Francisco Javier de los mocovíes en 1743. Otra espedición de Vera Mujica en xineru de 1752 pela provincia d'Entre Ríos, tomó prisioneros a 53 charrúes que foron repartíos ente los espedicionarios pa la so servidume. La reducción de Nuestra Señora de la Concepción de Cayastá desapaeció escontra 1820.
Nes campañes socesives de los gobernadores de Buenos Aires pa "civilizar" a la Banda Oriental produxéronse combates colos indíxenes. Les espediciones de Juan Ortiz de Zárate, Juan de Garay y Hernandarias batiéronse socesivamente con indíxenes, provocando cientos de muertos. Les fundaciones de Colonia del Sacramento y de Montevidéu tamién foron motivu de conflictu colos indíxenes, afondando la mortandá. La Guerra Guaranítica, ente 1754 y 1756, onde españoles y portugueses s'unieron pa combatir al "infiel", tuvo efeutos llaceriosos. Inclusive, haza finales del sieglu XVIII, los Blandengues españoles aniciaron una campaña denomada como "guerra charrúa", onde participó l'entóncenes sarxentu mayor José Artigas. El 4 d'ochobre de 1800 el virréi Avilés unvió al capitán Jorge Pacheco a espedicionar escontra los charrúes asitiaos nel noroeste del actual Uruguái. Pacheco realizó 3 espediciones y fundó Belén el 16 de xunu de 1801.
Pocos años dempués, munchos indíxenes llucharíen nos exércitos independentistes d'Artigas, Juan Antonio Lavalleja, Manuel Oribe y Fructuoso Rivera. Amás de les aiciones béliques, les enfermedaes europees como'l gripe, la viruela y la sífilis diezmaron per sieglos a poblaciones indefenses.[5]
El xenocidiu de Salsipuedes
[editar | editar la fonte]El 11 d'abril de 1831, en Puntas del Queguay, tuvo llugar el xenocidiu conocíu como Matanza de Salsipuedes. A orielles de la ñora Salsipuedes, ente Tacuarembó y Ríu Negro, tenía'l so cuartel xeneral el presidente Fructuoso Rivera. Rivera convocó a los principales caciques charrúes, llamaos Polidoro, Rondeau, Brown, Juan Pedro y Venado, xunto con toles sos tribus, a un conceyu diciéndo-yos que l'Exércitu los necesitaba pa curiar les fronteres del Estáu. Según los rellatos, agasayaos y enfilaos, foron atacaos por una tropa de 1.200 homes al mandu de Bernabé Rivera. Dizse que'l propiu Rivera dio la señal d'iniciar l'ataque, faciendo fueu sobre'l cacique Venado, tres-y pidir que-y entregara'l so cuchiellu pa picar tabacu.
El saldu según la historiografía oficial foi de 40 indios muertos y 300 prisioneros, de los que dalgunos llograron fuxir siendo persiguíos por Bernabé Rivera. Ente les tropes hebo 9 firíos y un muertu.
La persecución de los charrúes nun acabó na matanza de Salsipuedes. Bernabé Rivera, en particular, tuvo un especial enfotu n'alcontrar y esterminar a los que llograron fuxir. El 17 d'agostu de 1831 sorprendió en Mataojo, cerca de la boca del Ríu Arapey, a un grupu de charrúes comandáu polos caciques El Adivino y Juan Pedro, a los qu'atacó zarrándose l'episodio con 15 muertos y más de 80 prisioneros. Informó de que conseguieron escapar 18 homes, ente ellos, el cacique Polidoro, únicu cacique sobreviviente. El 16 de xunu de 1832 llocalizó a un grupu de charrúes nuna urrieta llamada Yacaré-Cururú. Nún ataque sospresa, los charrúes mataron a Bernabé, a dos oficiales y a nueve soldaos.
D'alcuerdu col profesor Lincoln Maiztegui Casas, "la desapaición de los charrúes foi un procesu continuu que llevó más de 200 años y que se xeneró a partir de la ocupación del territoriu por europeos". Según Maiztegui, los guaraníes adaptáronse y los charrúes non y, por ello, foron gradualmente estinguiéndose. Miles morrieron, otros miles fuxeron al noroeste a Brasil, otros miles quedaron como siervos y se mestizaron colos blancos perdiendo la so cultura. La principal xustificación de la élite criolla yera'l supuestu intentu de "civilizar" a los indios, "meyorar" la raza uruguaya y evitar l'abigueatu. El país tenía un importante númberu de ganáu vacunu y equín amenazáu de contino de robu per parte de los indíxenes. A fines del sieglu XIX quedaben poco más de 1.000 charrúes "puros" n'Uruguái.
Anguaño calcúlase que n'Uruguái, Brasil y Arxentina hai ente 160.000 y 300.000 descendientes de charrúes, toos ellos mestizos. Un grupu d'éstos lleva a cabu un procesu de recuperación de la so identidá indíxena, especialmente n'Entre Ríos, onde reestablecieron seis comunidaes charrúes.
El rescate de l'alcordanza
[editar | editar la fonte]L'Asociación de Descendientes de la Nación Charrúa (Adench) creóse na ciudá de Trinidad (Uruguái) nel añu 1989, por mor del contautu que se produxo ente dellos de los que sentíen la so pertenencia a la etnia, a constafecha de dos eventos. Éstos foron: el primer revelamientu lleváu a cabu pol Ministeriu d'Educación y Cultura, convocando a les families de descendientes, y l'aición desenrollada pola Intendencia Municipal del Departamentu de Flores pa reivindicar los raigaños indíxenes.
El 12 d'ochobre de 1988, en Trinidad, realizóse'l primer autu públicu de reivindicación. De magar entós, decidieron aconceyar nuna organización que-yos permitiera participar "como suxetos activos y non como meros oxetos d'estudiu", dixo Enrique Auyanet, delegáu alternu por Uruguái énte'l Fondu pal Desenrollu de los Pueblos Indíxenes d'América y el Caribe, miembru de la Comisión Escontra'l Racismu, Xenobofia y Discriminación y fundador d'Adench.
Ún de los cometíos de Adench ye'l rescatar la memoria histórica de los puelos orixinarios pa da-yos la mayor difusión posible". A mou d'exemplu, en 1993 la Institución collaboró cola Universidá de la República d'Uruguái, permitiendo la toma de muestres de sangre de los sos integrantes pa la investigación de marcadores serolóxicos, lo que llanzó un resultáu d'un 13% d'aporte indíxena dientro de la so masa social.
Según los caberos estudios realizaos sobro muestres d'ADN mitocondrial, aproximao'l 39% de la población uruguaya poseye ascendencia indíxena por llinia materna, y en departamentos como Tacuarembó y el nordeste los valores apuerten a un 57%. Otru datu interesante surde de la encuesta de llares 2006 del Institutu Nacional d'Estadística, nel que 115.118 persones s'identificaben como indíxenes, un 4,5% de la población.
El parllamentu uruguayu tien a consideración un proyeutu de llei que declara l'11 d'abril de cada añu (escomenzando a partir de 2010) como "Día de la Resistencia de la Nación Charrúa y de la Identidá Indígena". Según la esposición de motivos, el 11 d'abril de 1831 se produxera'l "Xenocidiu del Pueblu Charrúa". Arguméntase que los charrúes practicaben "un sistema humanista" onde la propiedá resultaba un bien comunitariu. "Esti proyeutu pretende constituyise nún simple actu de xusticia y reconocencia a la nación de que la so esencia identifica como uruguayos nel mundu", arguméntase más alantre na esposición de motivos.[6]
Supervivencies culturales
[editar | editar la fonte]Nel añu 2002 truxéronse los restos del xefe Vaimaca Perú dende Francia y recibieron sepultura nel Panteón Nacional, nún xestu que motivara protestes de grupos que busquen honorar la memoria de los primeros habitantes del llugar. En particular, debe mentase q'esisten numberosos descendientes d'aquella nación, magar que seyan un pequeñu porcentaxe de la población uruguaya. Alcuéntrense, sobremanera, na ciudá de Guichón, averada a la zona onde tuvo llugar el xenocidiu.
Nes costes del Paraná mediu, en territorios de la provincia arxentina de Santa Fe habitaben los calchines (nun tracamundiar por paronomasia con "calchaquíes"), pequeña parcialidá que s'identificara como d'etnia charrúa, inda que probablemente mixoxenizada con otru pueblo afín, el de los ya mentaos chanaes.
Dao que la de los charrúa foi la etnia más cospicua qu'habitó'l territoriu d'Uruguái d'anguaño, coloquialmente los uruguayos u orientales son llamaos "charrúes". Güei y d'alcuerdu con recientes estudios del ADN , establécese que más del 40 % de la población d'Uruguái tien sangre Charrúa.
Asinamesmo, na provincia d'Entre Ríos n'Arxentina, esisten grupos de descendientes de charrúes mestizaos que s'alcuentren en procesu de recobramientu cultural. Creóse la Coordinadora de Comunidaes Charrúes d'Entre Ríos (Codecha) col apoyu de seyes comunidaes urbanes charrúes asitiaes en Villaguay (Comunidá charrúa del Pueblu Xaguar), Paraná (Onkaiujmar), Maciá (Comunidá Gue Guidai Bera), Concordia (Salto Chico), Federal (Comunidá Charrúa) y Sauce de Luna (Comunidá Sauce).[7]
Un pequeñu grupu non organizáu de descendientes charrúes afáyase na Provincia del Chaco, onde los sos ancestros se refuxaron tres la Rebelión Jordanista.
La Encuesta Complementaria de Pueblos Indíxenes (ECPI) 2004-2005, complementaria del Censu Nacional de Población, Fogares y Viviendes 2001, dio como resultáu que se reconocen y/o descienden en primer xeneración del pueblu charrúa 676 persoeas na Provincia d'Entre Ríos. De los que nengún reside en comunidaes indíxenes. En tol país autorreconociéronse 4.511 charrúes, nengún viviendo en comunidaes.[8]
La garra charrúa
[editar | editar la fonte]Col tiempu la pallabra "charrúa" foi adquiriendo pa los uruguayos connotaciones de valir, de fuercia, de fiereza, d'arguyu guerreru, de victoria bélica treslladada a xesta deportiva, al igual que la pallabra araucanu pa Chile o azteca pa Méxicu. Nel subconsciente uruguayu, la tribu indíxena lloñe de la complexidá y el desenrollu d'otres civilizaciones precolombines, foi tomando rasgos míticos.
Según el periodista y investigador, Luis Prats, la espresión "garra charrúa" entamó a utilizase a partir d'un campeonatu suramericanu de fútbol disputáu en Lima, en 1935, ganáu por Uruguái. La seleición celeste llegó con un equipu de "veteranos" de les xestes olímpiques y de la Copa Mundial de Fútbol de 1930, pero igual venció al restu.[9]
Referencies
[editar | editar la fonte]- ↑ Ye común que s'use la pallabra "tribu" pa toa población que dende un etnocentrismu européu fuere considerada "xabaz" o "primitiva" y inclusive, llámase "tribu" a sociedaes estatales urbanes mui complexes como les de los mayes, azteques, quechues, chibches, etc. N'antropoloxía prefiérese falar d'etnies, seyan o non europees.
- ↑ Les primeres trés propuestes son discutíes por Longacre (1968: 353–4), qu'alcuentra como más convincentes les propuestes de Ferrario a favor de la conexón coles llingües matacoanes, citáu por Censabella (1999: 61)
- ↑ Sušnik (1978: 94) paez decantase a favor del parentescu col grupu guaicurú.
- ↑ «Foro Social Paraná Medio - Palabras indias para el asombro». Archiváu dende l'orixinal, el 2007-11-03.
- ↑ El Observador: Pesu de los charrúes na sociedá, ensin asideru científicu
- ↑ Proyeutu de Llei: Día de la resistencia de la Nación Charrúa y de la Identidá Indíxena
- ↑ Indymedia: Entre Ríos: La Convención reconoció por unanimidá los derechos de los pueblos indíxenes
- ↑ «INDEC. Censo 2001 - Encuesta Complementaria de Pueblos Indíxenes». Archiváu dende l'orixinal, el 2007-04-06.
- ↑ El Observador: Inicios de la “garra charrúa”
Enllaces esternos
[editar | editar la fonte]- NACIÓN CHARRÚA, Páxina en Facebook na que se vinculen tolos descendientes de sangre y de corazón
- Asociación de Descendientes de la Nación Charrúa
- Conseyu de la Nación Charrúa Archiváu 2011-11-11 en Wayback Machine
- Historia de los charrúes
- Roberto Echavarren: Uruguái: los primeros desaparecidos
- La escuela dixital: Les poblaciones indíxenes d'Uruguái
- Comunidá Charrúa "Jaguar"
- Nuevos testimonios de llingües charrúes (2005) Archiváu 2019-09-12 en Wayback Machine
