Catherine Théot

Catherine Théot (5 de marzu de 1716, Barenton – 1 de setiembre de 1794, París) foi una visionaria francesa. Convencida de tar destinada a sirvir a Dios, ganó notoriedá en siendo acusada de participar nuna combalechadura pa baltar la República, siendo acusada tamién de tar implicada na cayida de Maximilien Robespierre.

Catherine Théot
Vida
Nacimientu	Barenton, 5 de marzu de 1716
Nacionalidá	Francia
Muerte	París, 1 de setiembre de 1794 (78 años)
Estudios
Llingües falaes	francés
Oficiu	predicadora

Vida antes de la Revolución

Théot nació en Normandía, nel senu d'una familia de llabradores, sufriendo allucinaciones dende una edá temprana. N'estudiando una llongura curso sobre ascetismu nel conventu llaicu de los Miramiones, en París, Théot yá nun volvió gociar de bona salú mental, llegando a proclamar en 1779 ser la Virxe María, la nueva Eva y la madre de Dios. En permaneciendo internada per dellos años nel Hospital de la Pitié-Salpêtrière, foi lliberada en 1782. Nun se sabe enforma alrodiu de los siguientes dolce años de la vida de Catherine, magar se conoz que construyó una casa na rue Contrescarpe, axuntando al poco tiempu a un pequeñu grupu de devotos creyentes nes sos profecíes. Théot creía tar destinada a ser la madre del nuevu Mesíes, siendo conocida como la "Madre de Dios".

Secta Theotista

Théot dixo a los sos siguidores que "Dios dexara 1789" y que les lleis revolucionaries fueren ellaboraes por aciu la inspiración de Dios, afirmando que desobedecer a la Convención suponía desobedecerlo a Él. Estes y otres creencies similares fueron espuestes en pequeñes xuntes, compuestes por aproximao cincuenta mujer, celebraes na casa d'un amigu de Catherine. La mayoría de los asistentes a diches xuntes yeren muyeres de condición humilde, magar ente elles tamién s'atopaben la duquesa de Borbón y delles muyeres cercanes a ella, según un antiguu diputáu, Christophe Antoine Gerle, quien buscaba la proteición de Robespierre.

Los Theotistas vieron la redención de la humanidá na persona de Maximilien Robespierre. Los enemigos del políticu, resentíos polos sos fines teocráticos, utilizaron los sos venceyos colos theotistas como mediu pa vengase. El conocíu como "asuntu de Catherine Théot" convirtió a la supuesta profeta nun personaxe públicu en 1794. Marc-Guillaume Alexis Vadier anunció na Convención Nacional la combalechadura pa baltar la República, acusando a Théot y a los sos siguidores.

El 27 de xunetu, Vadier anunció l'afayu d'una carta sol colchón de Théot na cual proclamábase a Robespierre como Xuan el Bautista del nuevu cultu. A pesar de que la carta foi probablemente fabricada col fin de perxudicar al políticu, supunxo una forma de condergalo pola so rellación con Théot y col Cultu del Ser Supremu. Estes acusaciones provocaron l'arrestu de Catherine y dellos de los sos discípulos.

El casu foi xulgáu pol Tribunal Revolucionariu, figurando nos procesos del 9 de termidor (27 de xunetu). Los acusaos fueron finalmente absueltos y lliberaos, magar Catherine Théot morrió na prisión de Plessis el 1 de setiembre de 1794, aproximao un mes dempués de la execución de Robespierre.

Bibliografía

• Garrett, Clarke (1974) - Popular Piety in the French Revolution: Catherine Théot. The Catholic Historical Review. 60: Páxines 215-219. JSTOR 25019540.

• Catalin Negru (12 de payares de 2015) - History of the Apocalypse. Lulu Press, Inc. Páxina 1119. ISBN 978-1-329-66764-8.

• Dominique Godineau (16 de febreru de 1998) - The Women of Paris and Their French Revolution. University of California Press. Páxina 259. ISBN 978-0-520-06719-6.

• Robert Darnton (30 de xunu de 2009) - Mesmerism and the End of the Enlightenment in France. Universidá de Harvard. Páxina 129. ISBN 978-0-674-03019-0.

• Chisholm, Hugh (1911) - Théot, Catherine. Encyclopædia Britannica. 26 (11° ed.). Universidá de Cambridge.

Enllaces esternos

• Wikimedia Commons tien conteníu multimedia tocante a Catherine Théot.

• Datos: Q2942090
• Multimedia: Catherine Théot