Carretera del Karakoram

De Wikipedia
Carretera del Karakoram
Tipu carretera
Llonxitú 1300 quilómetros
[editar datos en Wikidata]

La carretera del Karakoram (KKH, abreviatura del inglés KaraKoram Highway)) ye la carretera internacional asfaltada más elevada del mundu. Coneuta China con Paquistán pel cordal del Karakoram, al traviés del Pasu de Khunjerab, a una altitú de 4.693 metros (15.397 pies), con un cachu la carretera asfaltada más alta del mundu que treviesa una frontera. Enllacia la provincia china de Xinjiang colos Territorios del Norte de Paquistán, sirviendo al empar como una atraición turística bastante popular.

Un fitu na carretera del Karakoram en Paquistán.

Historia[editar | editar la fonte]

La carretera del Karakoran, tamién conocida en China como la Carretera de l'Amistanza, foi construyida polos gobiernos de Paquistán y China, y completóse en 1986, tres de 20 años de construcción. 810 trabayadores paquistaninos y 82 chinos morrieron[1], los más d'ellos en corrimientos de tierra y cayíes mentes se construyía la carretera. La ruta de la KKH sigue ún de los munchos caminos de l'antigua Ruta de la Seda.

Nel llau paquistanín la carretera foi construyida por FWO (Frontier Works Organization, Organización de Trabayos Fronterizos), qu'emplegó'l cuerpu d'inxenieros del exércitu de Paquistán. Anguaño, l'inxenieru xefe d'esta estaya del exércitu paquistanín ta trabayando nun proyeutu pa documentar la historia de la carretera del Karakoram. Ta siendo escritu pol brigadier retiráu Muhammad Mumtaz Khalid, que supervisó la so contrucción.

La carretera[editar | editar la fonte]

La carretera, coneutando los Territorios del Norte de Paquistán cola antigua Ruta de la Seda, percorre al rodiu de 1.300 km dende Kashgar, una ciudá de la rexón china de Xinjiang, hasta Havelian, nel distritu Abbottabad de Paquistán. Una estensión de la carretera enllaza cola Grand Trunk Road en Hasan Abdal, al oeste d'Islamabad, en Paquistán.

La carretera treviesa la zona de colisión ente los continentes asiáticu y indiu, onde China, Taxiquistán, Afganistán, Paquistán y la India conflúin nun espaciu de 250 km. Pola mor del sensible por demás estáu del conflictu por Kaxmir ente la India y Paquistán, la carretera del Karakoram tien una importancia estratéxica y militar.

El 30 de xunu de 2006 firmóse un memorandu d'entendimientu ente l'Alministración de Carreteres pakistanina y la Comisión de Supervisión y Alministración d'Activos Estatales (SASAC, del inglés State-owned Assets Supervision and Administration Commission) china pa reconstruyir y ameyorar la KKH. Acordies cola SASAC, l'anchor de la carretera espandiráse dende 10 hasta 30 metros, y la so capacidá de tresporte va ser incrementada tres vegaes más. Amás la carretera ameyorada va ser construyida pa soportar vehículos de gran tonelax y condiciones de tiempu estremes.

Turismu[editar | editar la fonte]

Nos años recientes la KKH convirtióse en destín pa viaxes d'aventura. La carretera tamién-yos dio un accesu más fácil a los montañeros a los altos montes, glaciares y llagos del área. La carretera del Karakoram da accesu a Gilgit y Skardu dende Islamabad per carretera. Estos son los dos principales focos de concentración de les espediciones montañeres nos Territorios del Norte en Paquistán.

Montes y glaciares[editar | editar la fonte]

La carretera del Karakoram ye camín d'espediciones a cuasi tolos picos de los Territorios del Norte de Paquistán y a dellos de Xinjiang en China. Les rexones inclúin dalgunos de los glaciares más grandes del mundu como'l Glaciar Baltoro. Cinco de de los ocho ochomiles (picos de más de 8.000 metros) del mundu, que tán en Paquistán, son accesibles pela carretera. Los picos inclúin:

Ríos y llagos[editar | editar la fonte]

La carretera tamién dexó accesibles dellos llagos. Estos inclúi;

El Ríu Indo sigue al par de la carretera unos 200 km, onde se divide'l cordar himalayu y Karakoram.

Referencies[editar | editar la fonte]

  • Curzon, George Nathaniel. 1896. The Pamirs and the Source of the Oxus. Royal Geographical Society, London. Reprint: Elibron Classics Series, Adamant Media Corporation. 2005. ISBN 1-4021-5983-8 (pbk; ISBN 1-4021-3090-2 (hbk).

Ver tamién[editar | editar la fonte]

Referencies[editar | editar la fonte]

  1. 25ᵘ Aniversariu de la carretera del Karakoram (1978 - 2003)". Oficina Postal de Paquistán, 16 de mayu de 2006. Recuperáu'l 10-07-2006.

Enllaces esternos[editar | editar la fonte]